أنا‏..‏ وأبوالسييد

الأهرام: 12/3/2009
في أواخر الشهر كانت الحالة المادية معايا مش ولابد يعني‏..‏ قلت أطلع همي في قراءة الجرنال وفجأة لقيت صورة أبوالسييد في اعلان كبير ماسك إيصال فاتورة الكهرباء وهو منتشي قوي ووراه مراته وأولاده أمام الكمبيوتر والفرحة مش سيعاهم‏..‏ بصراحة الحقد ملا قلبي لما شوفتهم كده‏..‏ ده الرجل وفر في الكهرباء جوه بيته‏..‏ والكمبيوتر دفع أقساطه‏..‏ فقلت أنا كمان أحسبها صح‏..‏ أعيشها صح‏,‏ بصيت في الاعلان كويس لاقيت ورقة أجندة تحمل عنوان مصاريف الشهر أول بند فيها كان فاتورة الكهرباء المفروض اخفضها من‏60‏ إلي‏30‏ جنيها‏,‏ قلت وليه لأ‏..‏ قمت طافي النور علي ولادي ليل ونهار ومش بس كدة سخان الكهرباء هو أس الفساد فقررت أستغني عنه حتي لو كنا في عز البرد‏..‏ إيه يعني نزلة شعبية تجيلي أوتيجي للعيال مش أحسن مادفع كهرباء كتير‏..‏ أنا قلت لازم أبقي زي أبوالسييد‏!‏ تعالي لتاني بند‏..‏ فاتورة الغاز من‏20‏ إلي‏10‏ جنيهات بس‏..‏ فورا قمت قافل المحبس وجبت لمراتي وابور جاز مش بالذمة أوفر‏..‏ لسه الميه‏,‏ أبوالسيد خلاها من‏30‏ إلي‏20‏ بس‏,‏ فنبهت علي أولادي أن الميه للشرب بس ولا حموم ولا غيره‏..
‏ آه هو أنا أقل من أبوالسييد‏,‏ جينا للسجاير من‏100‏ إلي‏50‏ جنيه طب أعمل إيه؟‏!‏ دي العلبة المصري دلوقتي ب‏3‏ جنيه يعني‏90‏ جنيه في الشهر‏,‏ لكن علي مين‏!‏ هي السجاير الفرت راحت فين؟ أيه أبوالسييد‏!,‏ جينا للعيش من‏50‏ إلي‏20‏ جنيه‏..‏ صعبة أوي الحكاية دي‏..‏ لكن إيه المشكلة‏..‏ كل يوم من صباحية ربنا أروح أقف ساعتين في طابور الفرن عشان أجيب‏5‏ أرغفة‏,‏ نروح للعلاج‏..‏ أبوالسييد خفضه من‏70‏ إلي‏30‏ جنيه‏..‏ طب أعمل فيها إيه دي كمان؟‏!‏ ده الدكتور هو اللي بيكتب الروشته لكن أقولك بلاش دكتور هي مالها الوصفة البلدي والشفا من عند الله‏.‏
‏
..‏ فاضل المواصلات من‏80‏ إلي‏20‏ جنيه في الشهر‏..‏ أهي دي بقي يا عم أصعب حاجة عشان المواصلة الواحدة بقت بجنيه ونص رايح‏,‏وزيهم جاي‏..‏ خلاص‏..‏ أحاول أزوغ من الكمسري وسط الزحمة وأهو مرة تصيب ومرة تخيب‏..‏ المهم أبقي زيك يا أبوالسييد‏!!‏