اختراق

6/10/2010
عمروالليثى : عندما انتصرت إسرائيل فى حرب يونيو 67 اعتقدت أنها آخر الحروب وأن على العرب أن يوقعوا صك استسلام دون شروط لان حرب يونيو توجت من وجهة نظرها 3 جولات من الحروب بانتصار ساحق وجسد هذا المعنى موشيه ديان وزير الدفاع الاسرائيلى عندما قال إنها الحرب التى أنهت كل الحروب وما على العرب إلا أن يطلبوا مقابلته لتقديم فروض الولاء والطاعة خاصة أنهم يعرفون رقم التليفون والعنوان 31 شارع كابلان القدس ويقصد عنوان منزله لكى يقدموا له كوزير دفاع هزمهم فى الحرب فروض الولاء والطاعة وكانت إسرائيل ترى أن حجم انتصاراتها تتصاعد منذ حرب 1948 إلى نكسة يونيو 67 وحجتها فى هذا أن عدد أيام القتال كان يقل وحجم النصر كان يزيد فخلال 6 أيام قضت على جيوش مصر وسوريا والاردن لكن جاءت حرب أكتوبر لتضع الحد الفاصل بين عهدين فى تاريخ الصراع العربى – الاسرائيلى فقد كانت بمثابة نقطة فاصلة فى الصراع لاستعادة الحقوق المصرية حيث لم يكن هناك مفر من خوض هذه الحرب فقد انتهت حرب يونيو إلى طريق مسدود وحالة من اللا سلم واللا حرب وأراضى عربية محتلة فكان لابد من عمل يزيح هذا الهوان ويعيد للعرب كرامتهم فكانت حرب أكتوبر 73 حيث وجدت إسرائيل نفسها وقد انهارت الهالة التى رسمتها لنفسها وتجرعت من كأس الهزيمة مرة أخرى وفى هذا الملف أقدم لكم شهادات مجموعة مهمة من الشخصيات الذين عايشوا الاحداث بعضهم توفى والاخر ما زال على قيد الحياة وقد تسنى لنا فى اختراق أن نسجل معهم حوارات عن حرب أكتوبر فماذا حدث فى هذه المعركة التى حطمت نظرية الامن الاسرائيلى وكيف استعدت مصر وسوريا لها وما هى أسرار الايام التى سبقت العبور العظيم وكيف تمكننا من خداع إسرائيل وما هى كواليس معركة الثغرة للاجابة على هذه التساؤلات تابعونا بعد هذا الفاصل القصير
فاصل
عمروالليثى : يؤدى النصر الذى أحرزته إسرائيل فى حرب يونيو 1967 حلا لمشاكل الشرق الاوسط وأعلنت مصرعدم فتح قناة السويس قبل إعادة إسرائيل الاراضى العربية المحتلة ولم يكن لدى إسرائيل أى استعداد لذلك وقامت رئيسة وزراء إسرائيل جولدا مائير بزيارة إلى قواتها فى صحراء سيناء بالقرب من قناة السويس بينما القصف مستمر ، فى سبتمبر 1970 مات الرئيس جمال عبد الناصر بعد أن مكث فى السلطة 18 عاما وأصاب رحيله مصر والعالم العربى بصدمة كبيرة وتولى السادات الرئاسة ، أقامت إسرائيل خطا دفاعيا على طول قناة السويس
فاصل
عمروالليثى : وكانت القناة مغلقة منذ حرب يونيو فطرح السادات أن يتراجع الاسرائيليون بضعة كيلومترات لكى يعيدوا فتح القناة وكان موشيه ديان فى ذلك الوقت مقتنع بحتمية إعادة سيناء إلى مصر
صوت/ موشيه ديان : إننا سنبقى هنا طالما توجد حرب بيننا لكن إذا عقدتم سلاما فلن يكون هناك ما يوجب بقاؤنا فى قناة السويس
عمروالليثى : لكن رئيس الوزراء الاسرائيلية لم تكن مستعدة للتنازل عن الاراضى العربية ، الرئيس الامريكى اختار مبعوثا للضغط على جولدا مائير لقبول عرض السادات
السيد/ جوزيف سيسكو: أتذكر كلمته نفس اليوم قال لى اضغط على جولدا اضغط عليها بالقوة ولكن لا تسبب خرق كبير بين إسرائيل والولايات المتحدة ، فى اليوم الثانى ذهبت إليها ومعى باقة ورود فقالت يا جو الان أنت تقول ما نأمره هذا لن ينفع
عمروالليثى : فى القاهرة وبعد رفض إسرائيل المبادرة المصرية بدأ السادات فى الاستعداد للحرب
الرئيس السادات : داخلين معركة حتمية مهما كانت التضحيات ومهما كانت تكاليف هذه المعركة ولكن لم نسلم فى إرادتنا ولا فى سنتى من أرضنا ولا من الاراضى العربية
عمروالليثى : كان الرئيس السادات واضحا فى إعلان نواياه تجاه دخول الحرب وفى حديثه أمام المجلس الاعلى للقوات المسلحة فى يوم 24 أكتوبر عام 1972 والمعروف بمؤتمر الجيزة قال السادات
الرئيس السادات : احنا مش عايزين تحريرالارض بقى بس لا ده احنا عايزين نضرب غرور وعنجهية إسرائيل فى المنطقة
عمروالليثى : كان هذا الكلام يعنى أن السادات يخطط للحرب بأى ثمن وكان قراره بخوضها بما لدينا من أسلحة أحد القرارات الهامة التى اتخذها لشن الحرب وأصدر أوامره للقوات المسلحة فى تجهيز وتطوير نفسها وقام بتعيين الفريق أول أحمد إسماعيل وزيرا للحربية
الرئيس السادات : كان اعتقادى دائما أننا يجب أن نبدأ من البداية الصحيحة وأن نضع أنفسنا فى الموقع الذى نخوض فيه معركتنا إلى نهاية منتصرة بإذن الله وهكذا فإن فى الشهور الماضية وضعت أمامى الاولويات الثلاثة التالية أولا إطلاق كل القوى الكاملة فى الجهاز التنفيذى ، ثانيا ترتيب أوضاع قواتنا المسلحة ، ثالثا تعبئة كل إمكانيات التنظيم السياسى
أ/ صلاح قبضايا : كان مسافر الريس السادات إلى ليبيا فطلبه قائد القوات الجوية حسنى مبارك وقائد الدفاع الجوى أحمد على فهمى كل واحد قال الريس مسافر وعايزينكم معاه وركبوا معاه الطيارة وهو فى الطيارة بقى قال لهم قال يا فهمى موقفك إيه وكذا وكذا قاله يا فندم احنا لا تستطيع طائرة إسرائيلية تقترب من قناة السويس ل11 كيلو وهم عارفين كده ولذلك الطائرات الاسرائيلية قبل 15 كيلو من القناة ما بتقربش على طول القناة فاضل الطيارات تيجى من الشمال تيجى من البحر تيجى من مناطق أخرى يبقى ده مسئولية مين مسئولية طائرات الاعتراض الجوية يعنى السلاح الجوى القوات الجوية المصرية طب انت يا مبارك إيه رأيك قاله احنا جاهزين يا فندم علشان نؤدى المهمة الموكلة إلينا واحنا جاهزين لها فهذا الاجتماع أهميته إيه بقى أهميته إن لما حصل اجتماع المجلس الاعلى للقوات المسلحة فى بيت السادات فى الجيزة كان الناس اللى معترضة على الحرب وبتقول احنا ما لديناش الامكانيات الكافية كانوا بقوا أقلية
المشير/ عبد الغنى الجمسى : فى 24 أكتوبر 72 فى المجلس الاعلى للقوات المسلحة الرئيس السادات وخد القرار التالى قال أنا قلت لوزيرالدفاع إنه يستعد للحرب عشان أدخل معركة سياسية مع الامريكان ولكن لم يستعد واحنا كلنا فى المجلس الاعلى بوجود الفريق صادق الله يرحمه بعدها بيومين اثنين يوم 26 نوفمبر عين الفريق أحمد إسماعيل قائدا عاما للقوات المسلحة ليحل محل وزير الحربية وجاء المشير أحمد إسماعيل ينادى بما نادى به السادات
عمروالليثى : بداية عام 1973 تبلورالاتفاق السياسى بين الرئيس السادات والرئيس السورى حافظ الاسد على بدء الحرب بتنسيق تام بين البلدين وكانت عملية التنسيق تحتاج دراسة عن أنسب التوقعات للقيام بالعملية الهجومية وهذه الدراسة كانت تتناول كل العناصر المؤثرة على القيام بكل العمليات العسكرية سواء على الجبهة السورية أو الجبهة المصرية وهذه الدراسة أعدها الفريق عبد الغنى الجمسى رئيس هيئة العمليات بالقوات المسلحة المصرية وبخط يده ومن نسخة واحدة لضمان السرية وأطلق عليها السادات اسم كشكول الجمسى ، سيادتك كنت واضع لخطة حرب أكتوبر أرجو أن تعطينى نبذة عن تفاصيل هذه الخطة
المشير/ عبد الغنى الجمسى : فكرة الخطة كانت تقوم القوات المسلحة المصرية والسورية فى وقت واحد بالهجوم على القوات الاسرائيلية فى جبهة سيناء وفى الجولان فى وقت واحد تبدأ الحرب بضربة جوية تقوم بها مصر بأكتر من 200 طيارة ضد الاهداف المعادية فى سيناء وفى نفس الوقت أكتر من 100 طيارة فى سوريا تهاجم الاهداف الحيوية فى الجولان المعادية فى الجولان بعد التمهيد النيرانى تحت ستار التمهيد النيرانى فى مصر يعبرالجيشين الاثنين أو يقتحم قناة السويس الجيش الثانى والجيش الثالث يعبروا ويقتحموا القناة وينشئوا رؤوس كبارى جيوش على الضفة بعمق من 10 إلى 15 كيلو متر مؤمنة بالدفاع الجوى اللى موجود عندنا بعد وقفة تعبوية أو بدونها النص بتاعها كده أو بدونها تتقدم القوات المصرية حتى خط المضايق
عمروالليثى :توجه ضباط سوريون كبار إلى الاسكندرية لمقابلة نظائرهم المصريين
العماد / مصطفى طلاس: سافرنا بثياب مدنية وأنا سافرت بجواز سفر مصرى مستعار أخذت اسم جمال حسن
أ/ صلاح قبضايا : حصل اجتماع بين المجلس الاعلى للقوات المسلحة السورية وأعضاء المجلس الاعلى للقوات المسلحة المصرية كان فى رأس التين فى إسكندرية وهم جاؤوا متنكرين طبعا ومحدش عارف واجتمعوا فى قصر رأس التين فى اسكندرية علشان يتفقوا على اليوم والساعة والخطة يعنى النهائية يحطوا الملامح النهائية للخطة وكانوا اتقفل عليهم قوى التسجيل ممنوع أى أجهزة إلكترونية كان بيكتبها بس الجمسى بالقلم والاجتماع يعنى محضر الاجتماع وفضلوا مقفول عليهم فى قصر رأس التين لغاية ما وصلوا لاتفاق بعد 11 يوم
عمروالليثى : على أى أساس تم تحديد يوم السادس من أكتوبر موعد بدء الهجوم؟
المشير/ عبد الغنى الجمسى : وجدنا فى هيئة قوات العمليات المسلحة المصرية من الواجب علينا وبحكم المهنة اللى موجود لازم يفكرمتى نحارب قلنا نختارتحديد ميعاد الحرب أو ميعاد الهجوم يحسث يحقق أحسن الظروف لنا كمصر وسوريا وأسوأ الظروف بالنسبة لهم لقينا الموضوعات متشعبة كثير جدا الاوضاع بتاعتهم مفيش حاجة شفنا حالة الجو والصوت والضوء وحالة البحرالابيض والاحمر والمواصفات الفنية لقناة السويس لوحدها وآجى بقى لقناة السويس علشان ده المانع الرئيسى اللى هنعدى منه وافقة وفقنا فيه شوية الباقى خلصناه بسرعة وخد الوقت بتاعه وبعدين قلنا نشوف إمتى العدو ما يكونش مستعد يعنى الاجازات بتاعته والاعياد والمناسبات
ل. ط / صلاح المناوى : اختيار التوقيت بتاع الحرب ده كان فيه منتهى الذكاء لان اليوم ده اليوم ده بيعتبروه يوم دينى كبير جدا اللى هو يوم السبت اللى بيقولوا عليه فى القرآن وكل حاجة زى ما قال ربنا سبحانه وتعالى مفيش حد يكلم الثانى مفيش حد يعمل كده إيه يقعد على راحته واحنا كنا عارفين ده
ل.ب / يسرى قنديل : القوات البحرية لها مطالب أن يكون فترة الليل طويلة عشان تروح تعمل عملياتها وترجع فى الظلام عدة اعتبارات وضعت كذلك بيننا وبين سوريا فوجدوا إن أنسب ساعة ساعة الصفرتكون الساعة 2 بالظهر يوم 6 أكتوبر برضه الشمس كده هتكون بتغرب هتكون فى عين الاسرائيليين ومن ورائنا احنا كان فيه عدة عوامل لدراسة ساعة الصفر بين القيادة العامة تجاه القوات المصرية وبين القيادة العامة المصرية وبين سوريا فوجدوا إن أنسب وقت لساعة الصفر الساعة 2 يوم 6 أكتوبر
ل. ط / صلاح المناوى : الاختبار الثانى بقى بتاع الساعة 2 اللى لازم تعرفه إن المدوالجزرفى القناة رهيب جدا الساعة 2 دى تبقى مفيش مد ولا جزر لفترة تقدر لللانشات مباشرة يعنى لو كانت العملية دى تمت والمد على آخره كان اللى عاوز ينزل هنا ينزل بعدها ب10 كيلو كل حاجة محسوبة
عمروالليثى : كانت الاستراتيجية العسكرية الاسرائيلية تقوم على عدة عناصر من أهمها توفير المعلومات المبكرة عن نوايا العرب الهجومية فإذا فكر العرب فى القيام بحرب شاملة فإن المخابرات الاسرائيلية بما عرف عنها من كفاءة وتعاون وثيق مع المخابرات الامريكية تستطيع إجهاض الهجوم قبل بدأه واستلزم ذلك ضرورة إعداد خطة متكاملة للتضليل والخداع لتحقيق عنصرالمفاجئة
ل. ب / يسرى قنديل : قبل 6 أكتوبر كان فيه إجراءات خداع كبيرة جدا يعنى كنا بنبعت بعثة للتعاقد على أسلحة من الدول زى انجلترا زى فرنسا بنتعاقد على ميعاد يوصلنا الحاجات دى بعد ميعاد حرب أكتوبر عشان نبين إن احنا لسة مش مستعدين لدخول الحرب ومحتاجين وحدات بحرية جديدة أو محتاجين لعناصر حرب ألكترونية مكملات للوحدات البحرية نتعاقد عليها عشان تجيئ لنا بعد 6 أكتوبر
أ/ صلاح قبضايا : طلبنا من بريطانيا تبيع لنا طائرات متقدمة جدا اسمها جاوا وهم رفضوا فابتديت طبعا الكلام ده تسرب لاسرائيل إن المصريين ما عندهمش ومحتاجين
ل. ب / يسرى قنديل : تعاقدنا مع باكستان على إن احنا نبعت الغواصات باكستان يحصل فيها عمرة إمتى فى يوم 6 أكتوبرلكن احنا بقى بدينا نعد الغواصات من بدرى وبيقنا نعد الاحواض اللى هتروح فيها الغواصات باكستان وننشر هذا الموضوع علنى عشان تتسرب هذه المعلومات لاسرائيل فهى تحط فى اعتبارها إن لسه احنا مش مستعدين للحرب ففى يوم 6 أكتوبر بدل ما تكون هناك الغواصات بتاعتنا فى موانئ جراتسى موانئ باكستان كانت بتحتل موقعها بين جدة وبورسودان للتعرض للنقل البحرى الاسرائيلى
ل. ط / صلاح المناوى : هو السادات كان بيؤكد بشكل واضح جدا وكان بيتصل بناس فى العالم علشان يقول لهم احنا لا قادرين نحارب ولا نعمل حاجة وبتاع علشان يوصل الكلام ده للعدو وده هو الخداع الحقيقى يعنى لا يتصور أحد أن المخابرات الامريكية لما عرفت استعدادنا للحرب ، كانت القوات اللى رايحة القنال كانت بتمشى فى وسط القاهرة فى عز الظهر حد يتصور إن ده استعداد هم عارفين إن احنا بنحب دايما نضرب فى أول ضوء هو الحزب اللى اتحرك بشويش كده بالليل قوى فكل ده كان مراقب
المشير/ عبد الغنى الجمسى : عملنا مناورة أعلنا عنها فى الجرائد المصرية ، المناورة لمدة 7 أيام من يوم 1 إلى 7 أكتوبر 73 ونشرت فى الصحف وكل الناس عرفت استدعينا آلاف من الجنود والضباط الاحتياطى لاحضار المناورة كإنها زى أى تدريب عادى اللى موجود بعد ال3 أيام الاول منها سرحنا آلاف منهم غير مطلوبين راحوا الوزرات وراحوا القرى وأهم حاجة راحوا السفارات الاجنبية خصوصا اللى بيساعدوا إسرائيل علشان يقولوا المناورة انتهت خلينا القوات الموجودة بتاعتنا جزء منهم يلعب كورة بس أعداد قليلة لا يؤثر على كفاءة القتال بقى يلعب كورة مع بعض وناس نزلت تستحمى اللى موجود والبلدوزرات المدنية كانت بتخدم القوات المسلحة فى الاخرعلى مسافة كيلو مننا مفيش حاجة يعنى محدش فيه حاجة خدنا الحياة عادية
د/ محيى الدين عشماوى : مفيش حد كان يعرف توقيتات الحرب إلا عدد محدود جدا وإن الاظرف اللى طلعتها هيئة العمليات طلع ضابط عمليات من هيئة العمليات لكل قائد جيش وكل قائد فرقة يوم 5 أكتوبر سلموا الاظرف المغلقة وبالتالى لم يكن هناك مخلوق على الارض يعرف التوقيتات ولا إسرائيل تعرف التوقيتات
فاصل
- عبارة عن قراءة للتوجيه الاستراتيجى الذى أرسله أنور السادات إلى الفريق أحمد إسماعيل بخصوص حرب أكتوبر 73
- مشاهد من حرب أكتوبر
عمروالليثى : فى الرابعة من صباح 6 أكتوبر تلقت القيادة الاسرائيلية معلومات من مصدر موثوق به تؤكد أن مصر وسوريا ستشنان الحرب قبل غروب شمس هذا اليوم وخلال اجتماع عقدته جولدا مائير لمجلس الوزراء المصغر كان تقديرمدير المخابرات الاسرائيلية أنه من غيرالمحتمل أن يعبرالمصريون القناة ولمواجهة هذا الموقف قررالاسرائيليون إرسال تحذيرعن رئيس الولايات المتحدة لمصر وسوريا بالامتناع عن بدء الحرب
أ/ صلاح قبضايا : ابتدت تظهر بعض مظاهرالاعداد والحشد والحشد كان على الاقل فى قناة السويس وفى الجبهة المصرية حد دفاعى فابتدى الشكل يتغيرتمهيدا لعمليات هجومية فطلبوا أوكانوا عايزين إسرائيل تعلن التعبئة اتقالت الكلمة المشهورة اللى قالها موشيه ديان فى مذكراته انتوا محتاجين اللى عايز يعبر قناة السويس يتعامل مع سلاح خط بارليف ده لازم يكون السلاح السوفيتى والامريكى معاه دى الكلمة اللى قالها الراجل الجنرال بارليف ؛ الجنرال بارليف ده اللى اتسمى على إسمه الخط وهو صاحب فكرة المواقع الدفاعية الجنرال بارليف قال إن من المستحيل أن يصل الجندى المصرى إلى المواقع الحصينة دى- عابرا هذا المانع المائى الخطير ومتجاوزة الساترالترابى العالى وإن ده لو حصل هيبقى سهل جدا إن احنا ندفنه هناك
ل / منير شاش : ويوم 6 أكتوبر أنا طلعت بنفسى لان كان ممنوع إن احنا نقول على ساعة الصفر لا بالتليفون ولا باللاسلكى فطلعت بنفسى مريت على كل الكتائب الساعة 7 الصبح ورجعت الساعة 12 الظهر وقفت على كل مكاتب المدفعية وقلت لهم على ساعة الصفروأكدت معاهم الاهداف على الارض
المشير/ عبد الغنى الجمسى : لغاية ما جاء ديان يوم 6 أكتوبر صباحا علشان يوم كيبور فابتدى علشان يهنئ العساكر بتوعه وفى نفس الوقت يشوف الموقف وطلع فوق فى الابراج وشاف كل حاجة ورجع قال كل شئ تمام وحاجة أبهة فهي حاجة جديدة أبدا ده يؤيد كلام مديرالمخابرات العسكرية بتاعهم اللى هو الموساد اللى هو قايل مفيش حرب دلوقتى وكل الاعمال اللى بتقوم بها مصر وسوريا دى أعمال دفاعية بحتة وليس لها أى قيمة لان عملوا الحركة دى فينا فى مايو سنة 73
عمروالليثى : بينما كان موشيه ديان بتفقد الجبهة فى الساعة الواحدة والنصف ظهرا وصل السادات ومعه الفريق أول أحمد إسماعيل لمركز القيادة وأغلقت الابواب الحديدية وتم استبدال خرائط التدريب بخرائط العمليات وظل الجميع فى انتظار ساعة الصفر
فاصل
عبارة عن بعض مشاهد حرب أكتوبر
ل. ط / صلاح المناوى : أنا الوحيد اللى أبلغ من القوات المقاتلة كلها قبل ب 24 ساعة الرئيس مبارك كان يعرف قبلى طبعا لان هو اللى قال لى وقال لى احنا كنا عاملين كلمة كودية فى الخطة نبلغها للناس بالتليفون قلت له مش هنستخدم التليفون ولا اللاسلكى أبدا أنا هروح للناس فى المطارات البعيدة وأنا كل يوم بروح الف فى القواعد الجوية أكد موضوع الحرب والتدريب وكله عملية طبيعية خالص هقول لقائد اللواء فقط وأقوله الحرب الساعة 2 ما تقلش لحد أبدا إلا لما أجهزالطائرات بالصواريخ والقنابل وكل حاجة قول هنعمل طلعة تدريبية وقبل الطلعة بساعتين تبتدى تقول للناس
فاصل
عبارة عن مشاهد للطلعة الجوية
ل. ط / صلاح المناوى : لما طلعت الطيارات بتاعت الضربة كان قائد القوات الجوية محمد حسنى مبارك كل شوية أحس إن إيده على التليفون عاوزيكلم القيادة بتاعت التشكيلات الجوية ويشجعهم وبتاع أول ما ألاقى إيده على التليفون أروح ماسك إيده وأقول له احنا اتفقنا ما نتكلمش فى التليفونات خالص يقول لى طيب وبعدين لما نزلت الطيارات راح متكلم على طول وإدى نتايج الطلعة كلها للقيادة بالريس وكله
عمروالليثى : سمع الاسرائيليون نداء السلاح من الاذاعة ومن رجال الدين فى المعبد وفى الساعة الثانية بعد الظهر وبينما كان المدنيون يتقدمون بتسجيل اسمائهم على لوائح التجنيد فتحت مصر النيران على القوات الاسرائيلية وانطلقت 42 طائرة فى موجات كالوحوش المنقضة وجاءت ضربة الطيران الاولى بنتائج أكثر مما توقع القادة العسكريون
فاصل
عبارة عن طلقات نارية من الطائرات المصرية
ل . ط / صلاح المناوى: احنا قررنا إن احنا هنضرب العدو ب220 طيارة فى ضربة واحدة الضربة الاولى كل الضربات كانت تعتمد على هذا الفكر ليه لان لا يستطيع العدو أن يصدها إلا بصعوبة شديدة جدا لان احنا بنحدد لكل هدف مهم عدد معدود من الطائرات عشان العملية دى تتم بمنتهى الدقة ال220 طيارة دول بيطلعوا من مطارات كتيرة أنا عاوزهم يوصلوا كلهم على نقطة واحدة مش نقطة واحدة على خط واحد قريب من القنال عشان العدو ما يعرفش إن أنا جاى لانى لو ضربت لو أنا عالى هيعرف إن أنا جاى من بدرى وأبص ألاقى القوات الجوية كلها الاسرائيلية مستنيانى فى الجو لا ده أنا عاوز أديهم أقل حاجة ممكنة وبعدين أول ما يوصلوا الحتة دى كل واحد رايح يضرب فى حتة رايح والمقاتلات تطلع تشتبك مع العدوإنما كان فى الجو تصوروا أن العالم كله لم يتصور أبدا إن طلعة جوية و أقوى عدوبيقول أنا بقى أقوى طيران فى العالم وأنا وأنا وأنا بقوات الدفاع الجوى وبمقاتلاته اللى طلعت كلها لم يستطيع أن يسقط أكتر من 4 طائرات من ال220
أ/ صلاح قبضايا : الطيارات طلعت الساعة 2 بالضبط أول طلقة اتضربت كانت 2 و5 على أهداف منتقاه فى سيناء وبالتحديد أهم حاجة كان مركزالقيادة الاسرائيلى عشان نربكه وكانت معمولة الخطة عشان نضرب الارايل يعنى الايريال مش ضرورى نضرب العمق بهدف إن احنا نعطله وفى نفس الوقت كان فيه محطات تشويش فى حتة اسمها أم خشيب معمولة عشان تشوش على الطيارات وتشوش على الاتصالات المصرية بصفة خاصة دى كمان اضربت والمطارات اللى موجودة فى سيناء علشان العدو كان بينقل طياراته من عمق إسرائيل إلى الجبهة اللى بيشتغل عليها فدى تمنع الطائرات إنها تطلع أو تنزل فيها
ل. ط / صلاح المناوى : العدوقعد كذا يوم ماهوش قادريسيطر على قواته لان احنا ضربنا مناطق السيطرة بتاعت قواته على القوات ما بقاش فيه اتصال بين القيادة والقوات بشكل سليم ولا تخطيط سليم فكانوا بيعملوا حاجات غريبة يعنى حتى الدشم اللى كانت معمولة واللى محدش يقدر يدمرها هربوا منها وسابوها وجريوا وبتاع وكلام من ده يعنى
فاصل
عبارة عن لقطات لسلاح الدفاع الجوى
أ/ صلاح قبضايا : الضربة الجوية الاعداد لها قعد أكترمن سنة ونص إيه الاعداد لها أولا احنا كنا نعمل حاجة ظريفة قوى يوم طيارات مصرية تتجه من الشمال وعلى البحرونواحى إسرائيل وكده وواحد مرتفع على ارتفاع عالى يعنى وارتفاع ترصده الاجهزة علشان إسرائيل تبتدى تقول الله ده فيه هجوم من هنا وللا كذا وتبتدى تلفت نظرها إلى هذا ,فى نفس الوقت تقوم طيارة استطلاع بارتفاع منخفض جدا عشان تصورالاهداف اللى داخل سيناء اللى هتضربها فى ساعة الصفر يبقى إذن من كل المعلومات دى أصبح ظاهرأو أملنا القدرة على إن احنا نعمل نماذج للاهداف اللى هنضربها وعرفنا كل ذخيرة مع كل هذا وازاى هندخل له من أى مكان والارتفاع وازاى كله يبقى فى وقت واحد رغم إن الطيارات طالعة من قواعد جوية مختلفة متباينة وقعدوا الطيارين يتدربوا عليها بالتصوير الاول يعنى يضرب الهدف تبان إن الهدف أصيب وللا لا بالصورة ثم بالذخيرة الحية إلى أن تم الاعداد لهذه العملية بدقة شديدة حققت الهدف منها فى وقت قياسى
ل. ط / صلاح المناوى : دمرنا كل قواعد الصواريخ اللى بتفجرالطيارات ودمرنا نقط السيطرة البرية بتاعته كلها على الارض عشان ما يعرفش يسيطرعلى قواته واحنا بنعبر
ل/ منيرشاش : قلنا هنبتدى التمهيد النيرانى سى طراز 15 ليه بقى سى طراز 15 دى ليه بقى لان القوات اللى موجودة عقبال ما توصل من محلاتها إلى القنال هتاخد 10 دقائق زائد إن احنا عايزين فى هذا الوقت نمنع مدفعية العدوأوالنقاط القوية إن احنا نكبدها أكبر قدر من الخسائر بعد كده تبتدى عملية العبور
فاصل
عبارة عن لقطات أرشيفية لحرب أكتوبر خاصة باختراق
عمروالليثى : قامت المدفعية على الجانب الاخربعملية تمهيد نيرانى لعمل ساتر لعبورالقوات 2000 مدفع يصبون نيرانهم على المواقع الاسرائيلية لمعدل 1500 دانة فى الدقيقة الاولى
ل / منيرشاش : عملية العبورعشان نحميها عملنا قصفة ثانية 22 دقيقة لضرب مباشربمدافع أعيرة جامدة 152 ، 155 ،122 على أساس إن احنا نمنع أى نقطة قوية للعدوإنها تقدر تفتح النيران وكنا نضرب على المزارع ؛ المزارع اللى كان موجود فيها الاسلحة بنادق أو رشاشات أو مدافع بحيث إن العدو ما يقدرش أبدا يستخدم النقطة القوية فى ال4 قوات
المشير/ عبد الغنى الجمسى : كان عندنا ما يعادل 2000 مدفع مختلفة الاعيرة فى الضفة الغربية ووحدة صاروخية مداها تكتيكى 60،70 كيلو اللى موجودة المدفعية وهى بتضرب أكثرحشد بنيران حصل فى المنطقة بتاعتنا منذ الحرب العالمية الثانية هى ضربت 10500 ( عشرة آلاف وخمسمائة ) دانة مش طلقة دانة فى الدقيقة الواحدة فى الدقيقة الاولى متأسف بمعدل 175 دانة فى الثانية
ل/ منيرشاش : أول طلعة فى النيران عبرنا وحدات تدمير عبارة عن صواريخ مضادة للدبابات تصل إلى مكانها خلال 23 دقيقة ومحسوبة بحيث إن أى دبابات للعدوهتتحرك عشان تركب المساطب وتتدخل فى عملية العبور يبقى الوحدات المضادة للدبابات اللى عبرناها دى صواريخ يعنى مضادة للدبابات تدمرهذه الدبابات ما تطلعش وتتدخل فى العبور بعد كده القوات بقى بتعبر
فاصل
عبارة عن مشهد عبور القوات البحرية لقناة السويس
عمروالليثى : تلقت القوات المصرية تعبرالقناة فى دوريات متتالية تحت ساترنيران المدفعية تقويهم صيحات الله أكبر
المشير/عبد الغنى الجسمى: عبرت القوات بخطة موجودة بالتفصيل وكل قارب مين اللى هيمشى فيه ومين اللى هيركب فيه ويطلع كذا ما يعادل 500 قارب و700 سلم حبال اللى موجودة ومتمرنين عليها قبل كده بمجرد ما يعبروا دول اللى موجود يأمنوا الضفة الشرقية يبتدوا العبورعلشان الكبارى تتعمل ويكفى إن انت تعرف النجاح بتاعها فى أول الدقايق الاولى للعبور فى ال170 كيلو دول كان لنا حوالى 8000 مقاتل على الضفة الشرقية 8000ده يعنى عدد مهول بعد ساعة ونص كان لنا 30 ألف لغاية ما وصلنا بعد ال8 ساعات كان لنا 80 ألف
ل / منيرشاش : خسايرنا لاسرائيل الجيش الثالث فى العبوركانت 141 عسكرى ما بين قتيل وجريح واحنا بنعبربفرقتين لوكنا بنعمل مشروع كنا خسرنا أكترمن كده يعنى قارب يخبط الثانى ، قارب يغرق بتاع كدة لكن دى كانت معجزة إن يتم العبوروتقريبا مفيش خساير
عمروالليثى : المهندس محمود نافع أول من رفع العلم المصرى على خط بارليف من الفرقة 16 مشاه احكى لى إيه اللى حصل؟
م / محمود نافع : أنا كنت حكمدار الدفاع عن قائد اللواء ورفع العلم نزلنا المركب المطاط قارب مطاط
عمرو الليثى : كنتوا أول ناس تنزلوا؟
م / محمود نافع : أول ناس ننزل نزلوا قبلنا اثنين علموا من سلاح المهندسين وحطوا سلم خشب حبال وفيه عقل خشب أنا وقفت تحت أدام السلم طب هطلع إزاى طيب ما هوالساتر الترابى ده ممكن يكون فيه ألغام طب ما نبص على اللغم كانت فكرة وأنا ماسك العلم فضلت أجرى ورجلى لازم تنزل على الخشبة بتاعت الحبال ما تنزلش على الارض أبدا اعتقادى إن ممكن ده ما يفجرش اللغم عدينا القنال أول ما طلعت على الجبهة فوق على خطر الساترالترابى رفعت العلم وقلت الله أكبركل الناس بعديها كان الصوت بيرن من أول بورسعيد لغاية السويس الله أكبر
فاصل
عبارة عن لقطات أرشيفية خاصة باختراق لحرب أكتوبر
عمروالليثى : شعورك إيه وانت بترفع العلم أول واحد بيرفع العلم على خط بارليف
م/ محمود نافع : خدت تارى جبت أرض مصر تانى واللى ضيعته 10 سنين من عمرى جبته جبت مصر جبت الاسلام جبت مجد الامة العربية كلها
د/ محيى الدين عشماوى : السادات لما خلص الحرب وبعد الضربة الجوية ما تمت قال لى اللواء نصار ارفع السرية يا عشماوى رفعنا السرية الكلام ده كان الساعة 2 ونص 3 إلا ربع يوم 6 أكتوبر اتصلت بالاعلام كلمت الاستاذ عبده مباشر ، الاخ محمد عبد المنعم فى الاهرام جاؤوا لى فورا اتصلت بوزير الخارجية مكتبه جاء لى السفير الابراشى والسفير عصام حواس والسفير نبيل بدر جاؤوا لى فى مكتبى فى القيادة المشتركة واطلعوا على الخرايط واطلعوا على سير العمليات وبدأ العبور والاخ عبده مباشر محمد عبد المنعم جاؤوا للجبهة وقاموا بالتغطية الاعلامية بعد الحرب
فاصل
عبارة عن بيان العبور الصادر عن القيادة العامة للقوات المسلحة
أ/ صلاح قبضايا : احنا بقى كنا مراسلين حربيين لا ندرى إطلاقا يعنى أفضل ناس خدعت كمان زى العدو كده وأكثر لم نكن ندرى أبدا عن ساعة الصفر ولا عن قرار الحرب إلا قبل العبور أو قبل ساعة الصفر بنص ساعة وعرفناها ازاى كمان احنا عرفناها بطريقة برضه فيها خداع الاذاعة المصرية قطعت إرسالها وأذاعت خبر قالت اللى حصل عدوان إسرائيلى على الزعفرانة وإن احنا جارى إبلاغ الامم المتحدة ومجلس الامن وما كانش فيه ده صحيح ولا حاجة فاحنا بقى الصحفيين جرينا عايزين نروح الزعفرانة ونشوف إيه الحكاية والعدو ده ضربنا ليه وكده الحكاية دى كانت مستبعدة منطقيا ليه لان ده كان عيد الغفران عند إسرائيل ومش هتحارب ولا هتضرب الزعفرانة فى ذلك اليوم لكن هم ارتبكوا أيضا واحنا بقى جرينا عشان نروح نشوف إيه الحكاية بتاعت الزعفرانة دى ففوجئنا بأن الامر هو عبورقناة السويس بكل طولها من غيرما نحدد أى مكان ثم بداية الضربة الجوية ثم عربيات العبور وده ما خلناش حتى نقدرنوصل لمناطق العمليات فى الجبهة إلا ثانى يوم وثانى يوم كمان بإلحاح مننا بس طبعا كنا لابسين بقى الافارولات وبتاع وكده فحتى المحررين العسكريين كانوا يجهلوا حاجة عن ساعة الصفر أو حتى عن قرار الحرب
عمروالليثى : قاتل الاسرائيليون بشراسة ودافع بدباباته تجاه المقاتلين المشاه الصاعقة الذين صعدوا الساترالترابى بسلالم من الحبال والذين كان عليهم تدمير الدبابات الاسرائيلية لعدة ساعات حتى يتمكن الدبابات والمدفعية المصرية من العبور إلى الضفة الشرقية للقناة واستمرعبورقواتنا عبرالقناة على القوارب المصنوعة من المطاط
المشير/ عبد الغنى الجسمى : بتوع الصاعقة الاول يعدى بتوع الصاعقة علشان يركبوا الساترالترابى اللى ارتفاعه من 12 إلى 20 عشان دبابات العدوما تجيش تركبه والحتة اللى هم موجودين فيها اللى هى مساطب الدبابات اللى هم عاملينها 300 واحد اللى موجود فى الضفة الشرقية كل النقط فيها ألغام علشان ما يجيش فبقت المشاة تحرر كل ده
أ/ صلاح قبضايا : قناة السويس بالمناسبة مانع مائى مش بس بيتميز بعرضه أو مشكلته فى عرضه وفى عمقه يعنى صعب قوى اجتيازه إلا بإمكانيات هندسية هائلة وده على فكرة اللى خلى فيه تصريح عظيم أياميها لموشيه ديان وزير الدفاع الاسرائيلى لما قال عبور المصريين لقناة السويس يستحيل إلا فى حالة وجود سلاح المهندسين السوفيتى والامريكى معا لا يا سيدى احنا عبرنا بسلاح المهندسين المصرى لوحده
عمروالليثى : تحت تهديد النيران الاسرائيلية قام سلاح المهندسين بتنفيذ أروع عمل هندسى حيث تمكنوا من فتح 30 ممر بالساترالترابى باستخدام مضخات قوية للمياه وتمكن الجيش المصرى من إنشاء رؤوس كبارى سمحت بتدفق المعدات الثقيلة شرق القناة
أ/ صلاح قبضايا : حصل حاجة غريبة قوى أحد الضباط المصريين كان فى اللواء إسمه اللواء 19 مشاه كان منتدب فى السد العالى وجاء لما بيفكروا يعملوا التجارب لازاحة هذا الساتر الترابى أو فتح ثغرات فيه يعنى قال لهم ده احنا فى السد العالى كنا بنعمل تجريف للرمال وكانت بتتم بطرمبات قوية وبنجرفها وبيتم شفطها وبنرميها ففكروا نعمل كده بس فيه مشكلة اللى كان حاصل فى السد العالى كان حاصل بالكهرباء يعنى هذه الضباط كانت بتستعمله بالكهرباء احنا مش هنعرف نجيب كهرباء جبنا بقى طرمبات وحولناها للعمل بالمازوت احنا كنا محتاجين بقى شفطها لان كانت الميل اللى كان عامله العدو للساتر الترابى هينزلها فى القناة نجحت هذه التجربة واتعمل حتى سماها أياميها المدافع المائية
ل/ منير شاش : فاحنا ما بنجيش تقرير كده إن حظنا وحش لان كان الساتر الترابى اللى أدامنا كان عبارة عن رمل و... فقعدنا ما عملناش احنا يعنى دى ترقيعها بعد 6 ساعات اللى هى الفتحات اللى بتتعمل عشان الكبارى احنا قعدنا لثانى يوم الساعة 7 ونص وقعدنا طول الليل ودى كانت أطول ليلة مرت على فى حياتى لان ما كانش بيحمى القوات اللى موجودة فى شرق غيرنيران المدفعية
موشيه ديان : نحن الان فى حرب مختلفة ليست مثل الحربين الماضيتين حرب الايام ال6 هذه حرب صعبة والمواجهات عنيفة ومريرة فى الارض والجو حرب لعدة أيام سالت فيها الدماء فى حرب الايام ال6 تم تسليم رسائل أسرالضحايا بعد الحرب حتى نقف على الاعداد الحقيقية لمن لقوا حتفهم ومن فقدوا إنما الان نحن فى ذروة الحرب ولا نستطيع أن نعطى الاعلان الشعبى وهوالعبئ الشديد حول أعداد الموتى فنحن الان يتعين علينا أن نحارب بنفس عنيدة وبيقين بأننا شعب يحارب من أجل بقائه فنحن نحارب دفاعا عن حياتنا