أحمد عفيفي يكتب: وزارة الملابس « الداخلية » ... الحريمي!!

هو انتوا اما تكونوا زي احمد زكي عقيد الشرطة في " زوجة رجل مهم " .. واما تكونوا زي دينا الرقاصة في شريطها المشهور مع ابو الفتوح ؟ .. مفيش وسط خالص .. إما اقصى اليمين وإما اقصى السرير .. قصدي اليسار.. إما انكم ترجعوا تشخطوا وتنطروا وتضربوا بالقفا وتقولوا " أ .. " ويا " ... " امك .. وإما تخافوا وتكشوا وتجيبوا واطي على الأخر .. وانتوا لا مؤاخذة اللي تنضربوا على قفاكم؟


ده ايه اللي بيحصل ده .. ايه الرقة دي كلها .. عشان كده سامحوني في العنوان .. " وزارة الملابس الداخلية ... وتلات نقط ، الحريمي " .. كان ممكن اقفل العنوان من غير كلمة الحريمي .. بس كان حيبقى مفتوح ..او الناس حتفتكر اني اقصد الملابس الداخلية الرجالي .. وبكده يمكن الداخلية متزعلش مني و" تتأمص " .. مالها الملابس الداخلية الرجالي .. اشي كت واشي شورت واشي قطونيل .. واشي " لباس " العمدة اللي في الإعلان " رحرحة صح " .. ولا الشاعر البطيخة اللي كان بيقول طمعانة فيا ولا في قطونيلي .. ياتك نيلة عليك وعلى قطونيلك .. ايه اللي يطمّع واحدة ست في واحد لابس " لباس " قطونيل .. المهم مكنش ينفع العنوان الا بالتخصيص والإشارة الصريحة .. لان اللي بيحصل من الداخلية دلوقتي قصاد كل الانتهاكات والقرف والوساخة اللي بيعملها الإخوان والسلفيين .. حاجة كده في رقة " الكيلوتات" الحريمي .. يعني الواحد يتفرج على شوية رجالة بشنباب في إعلان عن قطونيل ولا بوكسرات .. ولا إعلان أجنبي عن ملابس داخلية حريمي .. هناك فرق .. عشان كده تلاقي العيال المراهقين واللي مش مراهقين واقفين قصاد محل فخم بيعرض اشكال وانواع من الملابس دي .. اشي احمر واشي اخضر واشي فوشيا .. حاجة ببلاش كده .. وانت وخيالك بقى .. اما تروح تتجوز وبسرعة .. واما تلعن في السر والعلن أبو الإخوان المسلمين اللي لو دستورهم مشي واعتمدوه ، مش حتشوف صنف الحريم في حياتك .. ليه بقى ؟ .. لانك لا حتلاقي شغل ولا حتلاقي شقة تتجوز فيها ولا حتلاقي مستشفى تعالجك ولاحتلاقي تحلق .. وحيبقى عندك 60 سنة ويمكن اكتر ، وأخرك يا حلو تيجي تتفرج على النسوان المانيكان في " الفتارين " وملابسهم الداخلية فوق وتحت.


ارجع للداخلية واسأل زي ما ملايين غيري بيسألوا وبيضربوا كفا بكف .. هو ايه اللي حصل للضباط الشنبات وأمناء الشرطة اللي الواحد فيهم كان عامل فيها لواء ويشخط الشخطة يرعب بيها الناس الغلابة .. مالهم النهاردة مرعوبين رعب اسود من مليشيات الإخوان ، وشوية المعاتيه بتوع حازم ابو اسماعيل .. تعالوا نرجع كده 15 يوم لورا .. اليوم الاسود الدامي اللي حصل عند الاتحادية وشوية جرابيع ولاد كلب ماسكين شباب وبنات زي الورد وهاتك يا ضرب فيهم وتحرش قذر مع البنات طبعا اللي جزمة الواحدة منهم بميت واحد نتن ماسك شومة ولا مطواة .. والشباب اللي اتاخد على خوانة .. مع انهم وقسما بآيات الله لو المسألة مين اقوي ومين يقدر على مين .. والمعركة السن بالسن والعين بالعين والبادي اظلم .. قسما بالله كمان مرة ليعلموكوا الأدب ويخلوكوا تمشوا ب " طرح " في الشارع .. والتخين فيكم يقول انا " مرة ".


ده بس عشان تحسبوها صح المرة الجاية .. لكن المهم في المشهد الوسخ ده هما السادة البهوات ضباط الداخلية اللي قاعدين يتفرجوا عليكم وانتوا بتحققوا مع الناس ، وفي الأخر يستلموهم منكم بمحاضركم ويشحنوهم ع النيابة .. على اعتبار ان اللي انتوا عملتوه ده صح وقانوني .. ولا مشهد تاني أوسخ من الأولاني : لمّا صحيتوا الصبح ومن غير ماتغسلوا وشكم ، وريحتكم معفنة .. قال ايه بتعملوا تمارين الصباح في شارع الميرغني .. وانتوا بتجروا وتقولوا : همة عزيمة ايمان .. رجالة مرسي في كل مكان .. والبهوات ضباط الشرطة عاملين كردون أمني عليكم لحمايتكم ، وانتوا مناظركم " عِرة " وشكل أمكم يموّت م الضحك .. البهوات قال ايه بيحموكم بدل ما يمسكوا واحد واحد منكم وكام قلم على قفاكم .. وكام شلوت على مؤخراتكم .. وكلمتين محترمين تحسسنا انهم ضباط بجد : فاكرين نفسكم فين يا ولاد " الو... " .. يالا يا " مع .. " منك له له له ..العب بعيد ، والا ليلة اللي خلفوك واللي قال لك تعمل كده سودا.


خايفين منهم ليه .. دول شوية عيال " صيّع " .. لو شخطة واحدة بجد وتبريقة عين بجد حيعملوها على نفسهم .. ولا هى الأوامر جاية من فوق .. الجماعة دول بتوعنا .. سيبوهم يعملوا اللي هما عايزينه .. محدش يقرب منهم .. ماذا والا .. انتوا عارفين ممكن نعمل فيكم إيه.


واضح ان الداخلية من اللي عملوه في الإخوان زمان .. خايفين ومرعوبين منهم دلوقتي .. السلطة والبلد بقت في ايديهم ، وممكن يخلّصوا حقهم " تالت ومتلت " .. والكلام الصريح اللي مفيهوش فصال ولا هزار : حتمشوا زي ما احنا عايزين ، ولا نفتح الدفاتر ونطلّع القديم .. عقلك في راسك تعرف خلاصك .. حتبقى معايا .. حنسى الذل وليالي السجن السودا والكهربا وحقن السافو الشرجية .. حتبقي ضدي نام .. على بطنك واقلع لا مؤاخذة اللباس ..وهات الحقنة يا فرج.


طيب دول الإخوان وزعيمهم هو الرئيس.. عشان كده انتوا خايفين منهم ع الأخر .. ماشي .. انما مين بقى حازم ابو اسماعيل ابن الامريكية عشان تخافوا منه هو كمان .. سبتوهم يحرقوا حزب وجريدة الوفد وبعدين يروّحوا بيوتهم .. مفيش واحد اتقبض عليه .. ده سلفي مش إخواني .. ولا اى واحد دلوقتي بدقن بقى يعمل لكم حساسية .. وانتوا بقيتوا في منتهى الادب ومطيعيييين وحلويييين .. والعيبة متخرجش منكم.


بقى انتوا وزارة داخلية بعد الثورة .. ملعون ابوها ثورة لو حترمي القانون في الزبالة ، وتخلي رجل القانون ياخد بالجزمة لو امتنع عن تنفيذ الأوامر الإخوانية العليا اللي جاية من فوق.


ارجعوا تاني وزارة داخلية بجد .. رجالة بجد.. الحق حق لو على رقبة التخين والزعيم .. مش عايزين وزارة الملابس الداخلية الحريمي الفوشيا دي .. عايزين نشوف رجالة بمعنى كلمة رجالة .. مش مانيكانات .. ب كيلوتات!!