أحمد عفيفي يكتب: هل طلق أبو هشيمة هيفاء وهبي بأمر من مرسي ايضا؟

اكيد المسألة فيها " إنّ " .. فيه واحد يبقى متجوز لهطة قشطة زي هيفاء وهبي ويطلقها في ثانية ؟ ..

إلا اذا كان ورا الحكاية دي حاجة أهم من هيفاء وهبي واللي خلّفوها .. بس السؤال : ايه هو الأهم من هيفاء وهبي بتاعت رجب حوش صاحبك عني وبوس الواوا ؟ ..

والإجابة سهلة وبسيطة .. البيزنس ميعرفش لا هيفاء ولا دينا الرقاصة ولا حتى مارلين مونرو في عز عز مجدها .. يمكن كيم كادرشيان تفرق شوية وتخلي الواحد يفكر .. هى ولا فلوس الدنيا كلها .. وأكيد برضه في النهاية حتبقى الفلوس أهم من اى حاجة تانية ، حتى لو كانت في جمال ودلال وأنوثة بنت الشياطين اللي اسمها كيم كاردشيان.؟الكلام ده بمناسبة الزوبعة الكبيرة اللي فجّرتها صحيفة " الفجر" .. ونشرت ان ياسر على المتحدث باسم الرئاسة المصرية اتجوز واحدة صحفية تلات تيام فقط لاغير ، ويمكن حتى ملحقش يدخل عليها .. " بتحصل كتير مع ناس كتير .. ممكن يوم واتنين واسبوع ولسه المسائل قفشة " .. عادي يعني .. وبعدين يقوم يطلقها ..

وعلى عهدة " الفجر " بأمر من الرئيس مرسي .. وانا بسأل نفسي ليه صحيح الريس مرسي مش فاضي للبلد وللي بيحصل في سيناء .. اتاريني كنت ظالم الراجل .. فيه حاجة أهم من مشاكلنا وحالتنا المهببة بستين هباب .. ازاى سي البيه الدكتور ياسر علي يتجوز في السر من ورا مراته ومن ورا ضهر رئيس الجمهورية الدكتور مرسي .. مع ان الحكاية دي عادي جدا .. اللي عايز يتجوز يتجوز والشرع بيقول اربعة .. ورئيس الجمهورية مالوش دعوة باللي اتجوز واللي طلق .. ايكش يكون اتجوز رقاصة .. مش عاجبك افتح الباب واطرده .. انما تجبره يطلقها وهو يمكن لسه مدخلش عليها .. ده يبقى حرام.عشان كده جه على بالي السؤال نفسه بعد ابو هشيمة ماطلق العسولة هيفاء وهبي .. وقام ايه داخل على الاتحادية بقلب حديد " ماهو احمد عز الجديد " .. وناوي يكسب ود الإخوان ومرسي بحجة " أصل انا بحب البلد دي موت موت موت" .. ورغم محاولة نفى ابو هشيمة اى مصلحة يبتغيها من ذهابه الى الاتحادية .. في مداخلة مع إبراهيم عيسى ببرنامجه " هنا القاهرة " .. الا ان الامر كله برمته غير مقنع .. على الأقل بالنسبة لي انا شخصيا .. لذلك اتصور - وليس على تصوري اى حرج فهو مجرد تصور - ان ابو هشيمة لقى الإخوان مسكوا البلد .. وواضح انهم هيتحكموا في اقتصادها ..

وده ربما او أكيد حيضرب البيزنس الخاص به .. ان لم يفكر بجدية ازاى يدخل في زواريق الناس دي ويبقى واحد منهم .. ومش مهم يربي دقنه .. بس المهم ميكنش متجوز واحدة زي هيفاء وهبي اللي " مهيّجة " نص شباب ورجالة العالم العربي .. مينفعش تدخل في بيزنس مع الإخوان ومراتك هيفاء وهبي .. لأن ممكن ستات رجالة الإخوان يخافوا ان اجوازهم ورجالتهم عينهم تفتح على النسوان المهلبية .. ومادام في الحلال ياسي السيد يبقى مفيش مشكلة.عشان كده لا اتصور ان تصوري ده غلط او بعيد عن الحقيقة .. وابو هشيمة عشان يحافظ على مصالحه في عهد مرسي والإخوان لازم يطلق هيفاء .. مينفعش" يبوس الواوا " وينزل يصلي الفجر .. فراح قال لك طظ في هيفاء .. المصلحة دلوقتي مش طالبة هيفاء .. فقام مطلقها ورضاها ع الاخر .. وهيفاء نفسها مش فارقة معاها .. بدل ابو هشيمة تلاقي مليون زيه واحسن منه.. وابو هشيمة ذات نفسه بمجرد مايثبّت نفسه ويأمن مصالحه يقدر بفلوسه يراضي براد بيت ويسيب له انجيلينا جولي خالصة مخلصة له .. بس بعيد .. عن مصر والإخوان ..

ومش مهم يبقى جواز رسمي معلن عنه ومعروف للكافة .. خليها دكاكيني يابو هشيمة .. لحد ماتتمكن كويس من " حديد " مصر ، وتراضي اصحابك الحلوين " الشطّار " اللي حيفتحوا لك السكة وتخش على طول .. وساعتها وبقلب جامد لو عايز ترجع هيفاء .. رجّعها .. بس شوف لاصحابك الحلوين كام مزة زي هيفاء .. او بفلوسك وفلوسهم ممكن تستنسخوا من هيفاء يجي 20 .. وخلي الكل يهيّص ويبوس الواوا .. ومتنسوش قصر الاتحادية .. لازم ينوبه من الحب جانب .. والمثل بيقول اللي ياكل لوحده " يزور" .. وعبد الوهاب قالها زمان تراعيني قيراط اراعيك قيراطين .. وتشوفني بعين اشوفك بكام ميت مليون.. ياعالم ياللي واكلينها والعة وملعون ابو اللي مش عاجبه .. وكل اللي يشوف الملايين اللي على قلبنا ولا يصليش ع النبي.