أحمد عفيفي يكتب : « نهارك اسود » يا وزير الإعلام !!

طيب اعمل له إيه إبراهيم عيسى .. مش ذنبي انه رئيس تحرير الموقع اللي بكتب فيه مقالاتي ، فأنا أتعامل معه ناسيا تماما هذه الصفة ، وذلك من خلال كتاباته وبرنامجه الرائع " هنا القاهرة " .. مش ممكن أغمض عيني عن حاجة طرحها وتستحق مني الالتفات واطنش .. عشان أجنب نفسي الحرج أن يظن ضعاف النفوس أنني أجامل الرجل أو أطبل له او اعمل دعاية .. ومتهيألي اللي متابع كتاباتي يعرف عني إني ماليش حبيب إلا في الحق .. واللي يعمل حاجة غلط مش بيسلم من طولة لساني.

ده بس في البداية .. عشان المسائل تبقى واضحة على رأى أبو خليل ..

وعلى فكرة عنوان المقال مش عنواني ، انما التقطه من إبراهيم عيسى نفسه وهو يتحدث مع عمرو سليم في حلقة امبارح " ربنا يفوّتها على خير وماسمعش واحد محامي من ابو قرشين مقدم في الاتنين بلاغ للنائب العام " .. المهم كان الكلام عن قفا مبارك ودقن مرسي وحكاية وزير الإعلام وقراره بالتحقيق مع مذيعة ومخرج برنامج " نهارك سعيد " عشان استضافوا واحد صحفي لسانه طويل شوية مش حلوين .. وانا هنا لا يعنيني مبارك القفا .. ولا دقن عم الريس مرسي .. اللي يهمني حكاية وزير الإعلام الجديد الإخواني حتى النخاع واللي اسمه صلاح عبد المقصود، وقرار الإحالة إياه بسبب عماد الصابر، مدير تحرير جريدة «الكرامة»، اللي قال كلمتين من وجهة نظر سيادة الوزير مش حلوين في حق الريس مرسي .. وقال عن حكومة " قنديل ام هاشم " انها حكومة عمياء لارؤية لها .. ومشروع النهضة اتضح أنه وهم، وأننا أمام رئيس دولة انتخبه الشعب المصري وإذا بنا أمام شيطان لا يردعه إلا شيطان مثله».

.. يمكن يكون الضيف أخذته الحماسة حبتين من ضيقه وغيرته ع البلد ، لكن اللي لفت نظري في كلام الوزير في جرنال " المصري اليوم " توبيخه الشديد للمذيعة .. ازاى تسكت للضيف على هذا التطاول من وجهة نظر جنابه .. وهنا اسأل : يعني كان المفروض على المذيعة تعمل إيه بالضبط ؟ .. " تشخر " للضيف مثلا ، وتردح له وتقوله : اتلم ياروح خالتك .. اقف عوج واتكلم عدل .. انت عارف يا " نمرة " انت بتتكلم عن مين .. ده مرسي يا حبة عين أمك .. ومرسي غير مبارك.. وان كان المخلوع زمان بيسكت ، فاحنا بقى مش بنسكت .. واللي يطوّل لسانه في عهد مرسي نقطعهوله .. واللي شايف نفسه حبتين ، نطلع دين أمه .. واللي ميشفش م الغربال يبقى أعمي .. فوق وصحصح وشوف انت فين وبتتكلم عن مين .. يالا اتفضل في ستين مصيبة تاخدك وتاخد اللي خلفوك .. وابقى بنت ستين كلب لو جبتك هنا تاني.

وزير الإعلام الهُمام كان عايز المذيعة ترد غيبة د - مرسي .. وتدّي ضيفها على قفاه .. وبالمرة شلوت على مؤخرته " صياعة بقى " .. ساعتها كانت أخدت مكافأة ، ويمكن تترقى كمان .. أما وقد استمعت للضيف دون أن تقاطعه، وأعطته وقته ليتحدث بحرية ، فلازم تتأدب وتعرف قيمتها وقدرها وتعرف كمان - وده المهم - ان مفيش حاجة اتغيرت من النظام القديم .. مبارك هو مرسي .. ومرسي هو مبارك .. واحنا في هذا المبنى العملاق المسمى ماسبيرو .. شوية اراجوزات وزمّارين ومطبلاتية ورقّاصين .. من الغفير اللي على الباب تحت ، لحد الوزير اللي قاعد فوق.

م الأخر .. عشان منحلمش كتير ونتعامل مع الواقع الجديد القديم .. الإعلام حيفضل هو هو .. مع اللي بيحكم .. زي الله يمسيه بالخير اسامة هيكل لمّا كان وزير برضه ، كان بياخد أوامره من المجلس العسكري .. يقوله يمين يبقى يمين.. يقول شمال تمام يا فندم .. اتحزم وارقص .. طلباتك أوامر .. عايز عجين الفلاحة .. م العين دي قبل العين دي.. مقدرش على زعلك ياحبة عيني ومستحملش " بيادتك ".

عشان كده اقترح على وزير الإعلام الإخواني الأصيل المتأصل انه يغير اسم برنامج " نهارك سعيد " ويسمّيه " نهارك اسود ومهبب بهباب ازرق " .. وبرنامج " مباشر من العاصمة " إلى " مباشر من أمن الدولة " .. وشوية شوية ندخل على الفضائيات الخاصة .. ماهى تابعه له برضه .. ونخلّي برنامج " صباحك عندنا " اللي ع المحور " نهايتك على ايدينا " .. وبرنامج " 90 دقيقة " إلى " قدامك 90 دقيقة.. تطلب إيه قبل ما تموت " .. وبرنامج " صباحو اون " إلى " صباحك زفت وطين " .. و " برنامج ريم ماجد " بلدنا بالمصري " إلى " بالمصري.. بالعبري بكل لغات العالم.. اللي حيقل أدبه حيتنفخ ، وينضرب بالجزمة القديمة " .. وريم بدل ما تختم وتقول " اتمسوا بالخير" .. تبرّق عينيها وتقول لنا " تصبحوا على نقالة ".. اما يسري فودة فبدلا من " أخر كلام " يبقى " أخر مرة حاحذر أمك " .. اما برنامج محمود سعد " أخر النهار " حيبقى اسمه " ليلتك كوبية " .. وبرنامج معتز الدمرداش " مصر الجديدة " ، حيبقى اسمه " مصر هى هى متغيرتش ومش راح تتغير" .. اما طوني خليفة وبرنامجه " أجرأ الكلام " حيبقى " تعالي وكفنك على ايدك " .. اما برنامج ابراهيم عيسى " هنا القاهرة " فقد تقرر تغيير اسمه بما يتناسب مع طبيعة المرحلة المهببة السودا اللي احنا داخلين عليها.. وهاهو ابراهيم عيسى بطريقته اللذيذة يعلن عن تغيير اسم برنامجه ، وينبّه ضيوفه قبل ماحد منهم يقل عقله ويجي له : عشان بس تبقى المسائل واضحة .. ومحدش يفتكرني ضحكت عليه أو اني بورّطه .. اسم البرنامج الجديد بعد التعديل " هنا القاهرة.. وهناك بره الاستوديو ، مستنيك فرج بتاع الكرنك .. واللي ميعرفش مين هو فرج .. يسأل الله يرحمها سعاد حسني!