مصطفى الطبجي يكتب:قصيدة .. يا أم الشهيد آسفين

يا أم الشهيد آسفين
لما قلنا لك من حقك تفرحي بحلاوة بلادك
يا أم الشهيد آسفين
إزاي ممكن تفرحي ولسة مجاش حق ولادك
يا أم الشهيد آسفين
حكومة ومعارضة، مايعرفوش إن الدم تمنه غالي
يا أم الشهيد آسفين
محدش فيهم يفهم يعني إيه أتحرم من حضن عيالي
يا أم الشهيد آسفين
قلنا إبنك مات ومحلتكيش غيره
قلنا إبنك مات علشان بس فدى غيره
أتابي غيره ماهموش، ودور على مصلحته هو وخيره
يا أم الشهيد آسفين
إبنك اللي مات شكله كده مات فطيس
العيب فينا ولا في الزمن ولا في الخسيس
هو مش برضه كان باطل جواز فؤادة من عتريس
يا أم الشهيد آسفين
لما قلنا على أهل البلد حبات لولي معقودة
أتابي حق الشهداء مش أكتر من عمارة مهدودة
الكل هرب منها وقضية في المحاكم مش موجودة
يا أم الشهيد آسفين
متهمين محبوسين في البراءة
وابتسامة صفرا على الخدين
طلبوا الحرية بكل جراءة
ما خلاص مفيش عليهم دين
يا أم الشهيد آسفين
شكل الأرض من 30 سنة عطشانة
وإيه ممكن يرويها غير الدم
ومفيش أحن من دم الناس الغلبانة
في التموين... بيصرفوا لهم الهم
يا أم الشهيد آسفين
حقك مش هنعرف نجيبه
مع إنه حق مشروع وسهل... وده عيبه
يا ريته كان حق محال
كنا قلنا ده في علمه هو وغيبه
يا أم الشهيد آسفين
خايف أقولك هاجيب حقك السنة دي
تقومي تفرحي وتقولي ولادي هيجيبوا حق ولادي
وتمر سنة ورا سنة على نفس الحال
إنت في وادي... والبلد كلها في وادي
يا أم الشهيد آسفين
إبنك كان آخر الرجالة
مات وساب البلد على دي الحالة
مفيش فيها صوت عالي إلا في المصلحة
وأي حاجة تانية مجرد قوالة