عبد المنعم حسين يكتب: الثوره مش ح تتسرق

عبد المنعم حسين
لَمْلم تعابينك يا حدِق
الثوره مش ح تتسرق
يا حاوى
ومخاوى
وفى كدبه غِرِق
لا خَوفنا خرطوشك
ولا كلابوشك
واللى اتسحل
واللى اتنحل
واللى دمه اتسحق
لا رجعنا لورا
ولا نسينا ما جرا
و لا حلمنا اتخنق
رغم ضحكتك الصفرا
وكلامك المِرِق
ورغم عهودك
ورغم وعودك
قد أفلح إن صَدَق
احنا لسه زى ما احنا
لا ظلمك أثر
ولا ضلالك فَرَق
شُعلتنا لسه قايده
رغم سواد العتمه
عنينا شايفه كل الطُرق
عارفين تكملة المفترق
وزي الضوء والفراش
يصطاد الحق
صاحب الحق
مهما بعد أوافترق
وأخر الخبره
مكيده وخطه
وللشباب القوه
وعزيمة آخر السبق
لملم تعابينك يا حدق
الثوره مش ح تتسرق
الثوره مش ح تتسرق