عمر طاهر يكتب: الناس نامت

الناس نامت إلّاك.. (يا شهيد).
الناس نامت إلّاىَ.. (كشهيد محتمل).
واقف لك فِ الشباك.. ( بعد ما شيلت كل فِيش التواصل الاجتماعى).
باستنّى اليوم الجاى.. ( اللى هييجى بخلع الضوافر).
يمكن يسقينا الشاى.. (يبل ريقنا).
يمكن يعطينا النّاى.. (نبتدى الغُنا الحزاينى الصافى على اللى راحوا).
أنا قَدّ الهوى وقدود.. (بما إنى شايل جنسيتك).
لو حتى الهوى نسّاى.
واقف بتغنّى لمين.. (بصوت متغطى بتراب السجاير وحَب البن).
لحبيبتى وللأطفال.. (مراتى وبنتى).
طب بُص ورا الفتارين.. (فتارين «تويتر» و«فيسبوك» والتليفزيون).
شايف مُهرة وخَيَّال.. (لسّه ماظهروش لحد دلوقتى).
القيد بيضيق ويضيق.. (الدايرة اللى بنلف فيها كلنا بقالنا سنة).
لكن أنا قلبى بَرَاح.. (كثورى).
باصص على مين يا صديق؟.. (سؤال).
على طفل معاه مفتاح.. (الجيل اللى بعد ده اللى هيفتح لنا باب الزنزانة دى).
هل كنت ف يوم غدّار؟.. (بيقولوا علىّ مأجور).
أنا نهر النيل لو فاض.. (جاى بطمى جديد).
طب فين زرع الأشعار؟.. (كل شهيد قصيدة).
أنا زارعه احواض احواض.. (فى كل شبر اتروى بالدم).
الآتى ناياتى جريح.. (حاسس بيه).
الآتى حصان مطلوق.. (من كُتر ما هو مجروح).
قلبك تَعبان مِ الريح.. (جدا).
لكن مستنّى شروق.. (آمين).
يمكن يسقينا الشاى..
يمكن يعطينا الناى..
أنا قَدّ الهوى وقدود..
لو حتى الهوى نَسّاى..
أغنية «الناس نامت»
محمد منير
كلمات إبراهيم رضوان
ألحان عبد العظيم عويضة
توزيع يحيى خليل