"الدستور الأصلي" يتخيل حوارا بين "هيكل" و"الفقي"علي باب المبنى المسحور "ماسبيرو"

لو وقف اسامه هيكل وزير إعلام المجلس العسكري أمام نفسه لحظات قليلة وسمح لضميره أن ينطق بين ضلوعه حين اسندت اليه حقيبة وزارة الإعلام لأدرك علي الفور أن التليفزيون ملك لمن يدفعون رواتب العاملين فيه وليس ملكا لمن يعينون وزيره . لو كان فكر قليلا حينما جلس علي كرسي أنس الفقي لأول مرة لأدرك أن القدر منحه فرصة ذهبيه لم تمنح لغيره ليغسل خطيئته التي سطرها في مقاله المنشور بجريدة الوفد يوم 24يناير يهاجم فيه شباب الفل والياسمين الذين قررو التظاهر في عيد الشرطة ليحررو مصر من قبضة العادلي وأسياده والذي قال فيه نصا "ولا أخفي حزني الشديد من الدعوة لمسيرة احتجاجية غاضبة غداً أمام وزارة الداخلية.. ومنبع حزني هو هذا اليوم بالتحديد.. ففيه انقلاب علي ثوابت وقيم.. ففي 25 يناير من عام 1952، أصدر فؤاد باشا سراج الدين وزير الداخلية أوامره لأبنائه من رجال الشرطة في الإسماعيلية بمقاومة قوات الاحتلال البريطاني التي حاولت نزع سلاح الشرطة..".
أتخيل الآن بعد أن لملم هيكل وريقاته وغادر ماسبيرو غير مأسوف عليه وهو يهبط السلم درجة بعد أخري لتبدو مع كل درجة منها صورة أنس الفقي أمامه وأخال حديثا خياليا دار بين الإثنين في مدخل المبني السحري الذي تتلهف كل كراسي الولاة للسيطرة عليه . أتخيل هيكل وقد فوجئ بالفقي أمامه بنصف ابتسامه تشق السخرية والتشفي طريقها بين أسنانه ودار بينهما الحوار الآتي :
-الفقي :رموك بعد اللي عملتو معاهم 'عشان تعرفو بس
-هيكل:لا يا حبيبي أنا ماترميش أنا خارج في تغيير وزاري كامل وعلي بيتي مش مقبوض عليا ورايح ع السجن .
-ماتقلقش عارف اغنية في السكة في السكة بتاعة محمد فؤاد كنت بحب اسمعها وبعدين انا سمعت ان النائب العام فتح التحقيق في اتهامات التحريض علي قتل المسيحيين قدام ماسبيرو فاكرها طبعا
-لا أنا نضيف أنا مش زيك ماتحاولش تقارن نفسك بيا -لا ياحبيبي ان جيت للحق بقي أنا القضايا بتاعتي اهدار مال عام تسهيل تربح تسهيل استيلاء علي فلوس البلد مش تحريض علي قتل مصريين
-يا أنس ركز شوية الظاهر نومة البرش نستك مش انت اللي كنت بتجيب صورة النيل والسمك والكوبري اللي فاضي والعادلي بيدبح المتظاهرين في التحرير إن كنت ناسي أفكرك ؟
-ده كان غصب عني وانت اكيد عارف ومكنش حد في مصر كلها يقدر يقول للغولة هازيع حاجه غير اللي انتي عايزاه وبعدين مانت لأول مرة في تاريخ مصر التليفزيون يحرض علنا علي قتل مصريين مش انتو برضو اللي قلتو المسيحيين بيضربو الجيش ودعيتو الناس تنزل تحمي الجيش جري ايه يا بو هيكل انت صدمة اقالتك ماثره عليك ولا إيه ؟
-أنا ماليش دعوه هما اللي قالو عايزين كده وبعدين زي ما قلتلك انا رايح بيتنا وانت في السجن
-يا حبيبي قلتلك ماتستعجلش قريب هنتقابل في حوش واحد ماتقلقش طالما بتوع حقوق الانسان والمجتمع المدني حطوك في دماغهم يبقي انسي "طير انت"
-أنا مفيش عليا دلائل ياأنس أنا نضيف قلتلك ومحدش هايقدر ييجي ناحيتي
-بيتهيألك خلاص قدام الولاد دول مفيش حد بقي بعيد عن حاجه ولو مش مصدقني ابقي اسأل مبارك ولا اوقللك إسال المشير أنت أكيد بتقابله كتير وبعدين انا عاتب عليك والله إيه الصورة اللي ظهر بيها خطاب المشير دي بالله عليك ينفع كده ده مش مستوي ولادي اللي علمتهم في ماسبيرو حاسس ان كان فيه حد قاصد ده بالذات وطريقه القطع ع المشير ووضع الكاميرات مش مريحيني انت اكيد عارف يا اسامه اه الحكاية صح قول قول
-مالكش دعوة وانت مالك يا أخي انت طلعتلي منين -من طره يا أسامه مانت عارف احنا بنشتي هناك كلنا والله نفسي تزورنا وهاتزورنا قريب انا عارف -قلتلك اسكت اسكت انا مش زيك انا مش زيكم انا وزير اعلام الثورة
-يا راجل ضحكتني والله حكومة ثورة ايه يا إسامه دانا قربت انسي ان فيه ثورة اصلا يا راجل دا انا اللي هوا أنا خايف مايلحقوش يحتفلو بالذكري الأولي لها ..
-انت عايز ايه بقي سيبني في حالي
-هاسيبك بس عايز اقللك قبل ما أمشي علي حاجه قالوهالي قبل ما ادخل الوزارة واقعد ع الكرسي بس انا معملتش بيها 'قالولي " اللي يعمل خدو مداس ينداس " سلام يا اسامه معاك ربنا هاسيبك عشان معاد الغدي بتاعي في السجن جه احنا صحيح عايشين حياتنا بس الأكل بمواعيد برضو.
هز هيكل راسه وأخذ نفسا عميقا تأكد بعده أن حواره مع انس الفقي كان خياليا وأنه لا زال علي باب ماسبيرو بعد ان غادر مكتبه منذ دقائق لكن ربا تبقي تفاصيل الحوار باقية في رأسه ..