الشيطان اتمرن في موقر من «أجا»

أخيرا استجابت الست الحكومة لإلحاح أخيها شيطان التزوير وشكاواه من قعدته مدة طويلة عطلاناً بدون شغلة ولا مشغلة ما أثار قلقه وخوفه من فقدان لياقته وانخفاض مستواه التزويري، وفاجأته مفاجأة سعيدة بدعوة الناخبين في دائرة «أجا» بمحافظة الدقهلية لكي يقعدوا (يوم الخميس الماضي) في بيوتهم مرتاحين حتي تنتهي من عملية «توقير» و«تحصين» موقر جديد يمثلهم في مجلس شارع قصر العيني وينضم إلي جيش أغلبيتها المزورة متأخرا خمس سنوات.. معلهش.
وحسبما أفاد مصدر ابن جنية يهوي التلصص علي الست وأدمن اختلاس النظر إلي مفاتنها المكرمشة من ثقب باب العائلة، فإن اختيار دائرة «أجا» بالذات من بين ست دوائر بقيت منذ عام 2005 محرومة من متعة تمثيلها بموقرين مزورين، جاء بالصدفة البحتة وبعد حوار أخوي دار بين الحكومة والأستاذ الشيطان علي هامش لقاء جري بينهما عندما قامت حضرتها باستدعاء هذا الأخير وكلفته بالاستعداد لعمل اللازم في انتخابات دائرة الرجل الذي قدم لمصر خدمات أرضية وبحرية بترولية جليلة مقابل بضعة مليارات تافهة، لكنه اضطر للاستقالة والاستغناء عن «خدمات» النيابة حتي يتفرغ لتحقيقات النيابة.
يقول المصدر المذكور إنه سمع الحكومة تزف لشيطان التزوير خبر تكليفه بمهمة اختيار خليفة للرجل الأرضي البحري في دائرة «منشية ناصر» بالقاهرة، وبعد أن قالت له كلاما روتينيا مالوش أي لزمة عن طبيعة المهمة وضرورة إتمامها علي أكمل وجه لأن «مصر الجديدة» مستهدفة، تنهدت حضرتها ورق صوتها وختمت قائلة :
خلاص ياسيدي استريحت.. آدي الشغلانة اللي إنت طالبها جاتلك لغاية عندك عشان تبطل تشتكي من القعدة والراحة.
متشكر جدا جدا.. بس مكسوف أقولك إن....
مكسوف ؟!.. مكسوف من إيه ياشيطان ياخويا؟، قولي إحنا اخوات.. مش كده ولا إيه؟
طبعا، طبعا.. لذلك عايز أصارحك بأن قعدتي من غير تدريب وشغل طالت شوية، وحاسس إني ما بقتش في الفورمة قوي، وإنتي عارفة إنك السنة دي عندك انتخابات تشريعية مزورة، وبعدها بشهور جاية الرئاسية.. يعني ح يبقي فيه كبسة شغل كبيرة ولازم أبقي مستعدلها لأن زي ماقلتي فعلا «مصر الجديدة» مستهدفة وهناك خطر علي الاستثمار والاستقرار والحاجات دي..
بقولك إيه.. الكلام ده أنا حافظاه.. خلينا في حكاية إنك مش في الفورمة..ليه بقي ياسيدي مش في الفورمة ؟ ما أنا عملالك صالة «جمانيزيم» كاملة مجهزة بكل أدوات التمرين علي التزوير.. ما بتستخدمهاش ليه إن شاء الله؟!
مين قالك بس إني ما باستخدمهاش.. لكن اللي عايزك تفهميه إن أفضل تدريب علي مهنتنا دي..
تقصد الشيطنة ؟
لأ التزوير.. أفضل تدريب عليه هو ممارسته الفعلية علي أرض الواقع وليس في صالات «الجمانيزيم»..
طيب ما أنا لسه مكلفاك بمهمة دائرة «منشية ناصر».. أليست هذه أرض واقع برضه، ولا دي أرض مجتمعات عمرانية جديدة ؟!
نعم هي أرض واقع.. بس بالنسبة ليَّ مش كافية للتدريب واستعادة كامل لياقتي المطلوبة لتنفيذ المهمات الكبيرة اللي منتظرانا السنة دي والسنة الجاية..
طيب تقترح إيه دلوقتي ؟! أمشيلك شوية موقرين تانيين عشان حضرتك تشتغل وتتمرن وتنبسط ؟!
ولماذا هذا التعب ما انت عندك ست دوائر فاضيين وجاهزين فعلا.. ما تشوفيلي حاجة منهم أشتغل فيها..
ست دواير !! بتوع إيه دول ؟!
ما عرفش بتوع إيه.. بس أهم موجودين فاضيين وانتي نسياهم.. اديني واحدة وخلاص.. عندك دايرة اسمها «أجا»، ودايرة تانية اسمها أ.....
خلاص.. ما ترصهمليش، خد «أجا» اللي إنت قولت عليها دي واتمرن فيها براحتك.. يلزم خدمة تاني؟
شكرا..
العفو.. شرفت الشوية دول.