أحمد عبد الحكم دياب يكتب: لملم بضاعتك واستقيل

الصبر مش معناه قبول
أو نرضى تحكمنا الفلول
اللى حصل كان ثورة مش لخمة عقول
أصحى وفوق يا عصام شرف
وأفهم أصول الثورة ومعانى الشرف
مش م الشرف يحكم بلدنا البلطجى
واللى انحرف
ويمص دمى اللى سرق واللى غرف
واللى هجرنا وانصرف
هل برضو يبقى م الشرف انك تنام
تغمض غيونك ع اللى حرمونا المنام
وتنسى الميدان والثورة وهدير الزحام
أصحى وفوق وبلاش قرف
أصل الوزارة مش حضور بالساعة
ولا شغلها تحضر فوطة وشماعة
ويحرسنا منها بلطجى خريج سجون
تسليحه قرن غزال وولاعة
أصحى وفوق وبلاش قرف
لملم بضاعتك واستقيل
روحٌ بقى
يا عم روح
قتلت فى الثورة الجميلة كل روح
وساعدت فتنة خلفت قتل ونوح
كترت فى بلدنا الجروح
يا بطئ وفاشل
خربتوا دفة الاقتصاد
ونشرتوا فوضى فى البلاد
دبلت فى عيونا الأرادة
ورضيت تفرط فى السيادة
وسكت على قتل الجنود
نسيت بلدنا الملحمة ومعنى الريادة
ما انت ابن لجنة سياستهم
واكل وشارب من فتاتهم
علشان كدا كامن فى قلب العش
راجل لا بتهش ولا تعرف تنش
ومجلسك فلول وغش
أرجوك تفارق
علشان مطرح حضرتك نكنس نرش
كفاية وش
أو ضحكة باهتة مزيفة ع الوش
عاوزين راجل يعرف يصون الحق
يقدر يقول ال لأ
ويداوى قلب اللى بكى
واللى انحرق
يكلبش أيدين اللى نهب
واللى سرق
ينقذ بلدنا م الغرق
عاوزينه ما يكونش ضعيف
ويكون شريف
أصل الشرف محتاج شجاعة تسنده
محتاج طهارة تأيده
واخلاص ووعى يرشده
عاوزينه قائد محترف
مش منحرف
ما يكونش قائد من ورق
أظن مفهوم يا شرف
وبدل كلامنا ما يوجعك
ويدمعك
خلينا نرضى نودعك
وقبل ما يزيد الغضب
وتعلى صرخات الجريح
ويهب م الميدان نفير الريح
يلغى الورق ويقطع التصاريح
خليك مريح
وقدم ورقتك واتكل
ريحنا منك واستريح