خالد حبيب يكتب: فضفضة.. عن الثورة والقانون وعبد الناصر والدرجة التالتة

أعرف مقدما مقدار الجدل و الانفعالات الحادة و الردود الأفعال العنيفة، لكن اسمحوا لي أن أشرككم في خواطر متنوعة من مشاهدات على مدى شهر كامل، و أدعوكم للصبر و التفكير قبل التعليق، و أعتذر مقدما عن استخدام اللغة العامية، في الآخر هي فضفضة..
قانون: مش محتاج أفتكر و أقول حسبي الله و نعم الوكيل في مبارك و الزبانية اللي خلقوا و ثبتوا أركان أكثر نظم الحكم فسادا و افسادا و تعقيدا و شللا و خلانا بندور في حلقات مفرغة، قوانين تقنن الفساد و أجهزة تشريعية محدودة الامكانيات و عقول أكلها الصدأ و غطى عليها نظام تعليمي يخلي العبقري حمار ، و أجهزة تنفيذية غير قادرة على التنفيذ و ما بتتحركش الا بالخوف أو الرشوة، و أخيرا شعب مستنزف بالفقر و المرض و الجهل مش فاهم ولا عارف ازاي يختار. خلاها قفلت زي الدومينو بالظبط. قلنا من الأول، الثورة لازم لها قواعد ثورية لكن لو بقانون مبارك يبقى موت يا حمار!
ناصر: عمري ما حبيت جمهور الدرجة الأولى، الدرجة التالتة أبسط، من غير فلسفة و لا تقعر و لا جدل و لافتي. و جمهور الدرجة التالتة مالوش دعوة بالاعلام و التلقين. يوم التنحي خرجوا بالملايين (اقروا جمال الغيطاني أخبار امبارح)،يوم وفاته زحفوا برضه بالملايين (ماحدش يعملها لطاغية)،و بعد وفاته و رغم آلاف الكتب و المحاولات لتشويهه، كان الشعب بيشيل صوره في كل موقف صعب. لغاية امبارح آلاف فاكراه في ذكراه. كان بشر،عاش و مات فقير،عمل كوارث و حاجات عظيمة، في كل الأحوال اجتهد عشان شعبه. و شعبه، بتاع الدرجة التالتة ما بينساش، مع الاعتذار للهاي سوسايتي اللي أنا أقل منهم بكتير.
اتجاه: بنكره عبدالناصرلأنه عذب الاخوان، بس بنجاهد كل ما عندنا و عايزين الجيش يحكم عشان الاخوان لو حكمونا هتبقى كارثة، و في نفس الوقت كل يوم بنصرخ و نطالب الجيش بتسليم السلطة، و بالتأكيد قلنا كلمتنا و خلعنا مبارك بنظامه. طب عايزين مين يحكمنا و ازاي. فكرة القائمة الموحدة هجايص، بدل ما يتخانقوا عالهوا هيولعوا في بعض و هما بيقودوا السفينة و هنغرق كلنا. في الآخر لازم هيحكمنا شخص و مجموعة بفكر مش كلنا موافقين عليه و هيعملوا حاجات ممكن بعضنا يرفضها، بس لازم نختار طريق واحد و ندي فرصة كاملة للتخطيط و اتخاذ القرار و التنفيذ مع المراقبة.
عادي: يعني حد عاقل متخيل ان مبارك و لا العادلي ولا أي مخلوق هيروح المحكمة و يقول أيوه الريس قاللي اقتل المتظاهرين و أنا وافقت؟ عمرها حصلت؟ يا راجل ده الست بيظبطوها في اسكندرية في السرير مع الراجل و تعترف و يصوروها كمان،و بعدين تروح المحكمة تنكر و تثبت بالشهود و الأوراق الرسمية انها كانت في نفس الوقت بتمتحن في تانية ابتدائي في خيمة في أسوان. قلنا أحكام جنائية مش هتنفع، لازم محاكمة سياسية. يا رب الصبر.
نتايج: ثم اننا لو حكمنا بالنتايج بس يبقى العالم كله هيشجع الأهلي و البارسا و هيقدم على الجنسية الأمريكاني و يكفر ب90% من الأنبياء اللي منهم كتير قتلوهم بنو اسرائيل قبل ما يعملوا حاجة. و كلنا هناكل سبانخ و أرنبيط بدل المانجو عشان بتقوي العضل بغض النظر عن الطعم اللي عامل زي وعثاء الطريق. و الأخطر ان النتايج بس من غير الطريق اللي بيوصل ليها ممكن تبقى خادعة للغاية، زي فوايد ال 40 % بتاعة الريان، لو جت النهارده مش هنعرف نجيب زيها بكره. نفسنا نقعد و نتكلم في الخطط و الأساليب و الاستراتيجيات و المعايير مش في الأشخاص، و لو اتكلمنا أشخاص تنكلم على تجارب و أفعال و ناخد منها العبر. الكمال لله وحده.
أحكام: حكم حبس للفقي بسبب اشارة بث الماتشات. بلدي قوي يا حسين. بس غالبا هو ده النظام اللي هيمشي مع قوانين مطاطة و بتقنن الفساد، و محاكم بطيئة لغاية النهارده بتنظر في قضية طلاق ابن الفرعون منبتاح من نفرنيلة بنت خالته. يعني الخلاصة ان أي راجل من رجالة مبارك هياخد براءة في 50 قضية قتل و اغتصاب و تعذيب و مخدرات و اختلاس، بس هيتحكم عليه في قضية سرقة حبل غسيل. عالبركة..
أمن: نص ساعة جمهور الاسماعيلي و المقاولين بيضربوا بعض و الشرطة عاجزة و بتنضرب معاهم.و الأمن واقع في كل حته رغم الطوارئ . واحد نصه التحتاني عريان و انت عمال تلبسه بلوفرات من فوق. الأساس في القاعدة.احنا ما عندناش أمن محترف. نظام مبارك حول الأمن الي أعداد بلا أي تدريب أو فكر، و محترفين في توصيل ابن الباشا للنادي و تأمين وصول العيش سخن و ضرب و تعذيب معتقلين عزل في السجون. و الشعب كان خايف يواجه، أول ما جرب يرد الشرطة اختفت. محتاجين نبني شرطة من جديد بقواعد احترافية و أخلاقية، ومعاها توعية و تعليم لشعب اتعلم من الاعلام و النظام ان الحل الوحيد هو الفوضى و العنف
خبر: خبر نشر في جريدة الحياة (تخيّر السلطات في ولاية ألاباما الأميركية الذين يخالفون القانون ولم يرتكبوا جرائم عنيفة بين السجن والذهاب إلى الكنيسة كل يوم أحد لمدة عام.وأفادت وسائل إعلام في ألاباما بأن مخالفي القانون في مدينة باي مينيت في الولاية الذين لم يرتكبوا جرائم عنيفة سيحصلون على الخيار بين السجن أو الكنيسة). الله، يعني أمريكا طلعت دولة دينية ولا ايه، رغم انها أكبر قوة في العالم و كلها بيكيني و خمرة و كده. بس برضه احنا عايزين الدولة العلمانية الليبرالية المدنية ( اللي هي ايه بالظبط..؟
انتخابات: و بينما يتألق الاعلامي محمود سعد و معه الكثير من الاعلاميين و يعيد و يزيد و يعدد في مناقشة موضوع ( ايه رأيك في الطوارئ) اللي هو بالظبط زي (ايه رأيك في الحب من طرف واحد)، تعلن نتائج انتخابات الجامعات و ينجح 5 من رجال النظام القديم. نتيجة طبيعية بسبب ناس اختلفوا على تقسيم الغنايم قبل ما يكسبوا الحرب (موقعة أحد مع الفارق)، و أغلبهم أساسا ما يستاهلوش يكونوا مع الكسبانين. و هو ده اللي ممكن يحصل في الانتخابات، علمانية ولا ليبرالية ولا اخوان و مفيش أفكار أو مشروعات أو حلول، و الشعب بمزاجه يختار القديم اللي كان عارفه. دوشة عالفاضي و جعجعة بدون طحن و الشعب هو الخسران
تعريف : كل ما أتكلم في أي موضوع رياضة أو فن أو كورة ألاقي حد يطلعلي و يقول : هو ده وقته، خلينا في الثورة و بلاش هيافة. نفسي أعرف يعني الثورجي الحقيقي مش بياكل و لا يشرب، ما بيدخلش الحمام (لا مؤاخذة)؟ قاعد ليل نهار بيثور. في برامج و قنوات و جرايد و فيسبوك و مع مامته و خالته و أصحابه و البنت اللي بيحبها ثوريا في السر؟ بجد نفسي أعرف النموذج المثالي لأني كنت فاكر اني ثورجي بس التعريف مش واضح عندي. بالظبط زي اللي بيتكلم و يقول أنا صديق البرنامج، اللي هو ايه بالظبط، بيعمل ايه مع البرنامج يعني.