نهى البلك تكتب: السبوع

أول ما سمعت
سمعت آدان
بيكبّر
قلت : الله أكبر
يتشاهد
قلت : الله واحد ..
حى على صلاة
حى على فلاح
ولا أجمل من كداهوه استفتاح

الجدة
, وبإيدها البضّة
شدتنى على الغربال شدّة
دى سلوك
تشبيك
قضبان
شبابيك
لا سفنجة
ولا ريشة مخدة !

واترشّ الملح وطال ريقى
بان طعمه ف دمعى وتعريقى
لو كانت أوسع
أو أحلى
ما احتفلوا بسجنى وتحديقى !!

واندقّ الهون
آه يا ودانى !
من يومها وانا اتجنّ جنانى
من يومها وانا باسأل نفسى
أنا إيه كان جابنى وودّانى ؟!

دقّة :
إسمعى لكلام الناس
دقة تانية :
واوعى م الوسواس
دقّة :
حاسبى
وامشى مكسوفة
" لأة "
: كلمة قبيحة ,
محذوفة
كل " تيييت " على كلمة :
كلمة حق ..
كل " تيييت ":
على كلمة .. معروفة !
والشريط لاسود
على عيونك
مش ح يخفى
صورة مكشوفة !..


خطّى يا أمى السبع خطوات
فكّى عنى السِحر
والنَفَثات
خطّى وارقينى
خطّى ورّينى
الزمن ماشى
فوقنا , زي الموج , مايهداشى

خطّى قبل امّا الطوفان ييجى
ينقلب للجَد تهريجى

وابقى تحت الخطوة
منداسة
كلمة ممحيّة
فى كراسة


زى صفحة
من تاريخ مشطوب
زى نملة
تحت قالب طوب

خطّى لاجل اتعلم المشية
قبل ما ادرس صحة أو أشيا

عَدّى سبعة
من يمين لشمال
سبعة شرق
وسبعة رايحة الغرب
قبل ما احفظها
فى جدول ضرب !


خطّى سبعة
السبعة بسم الله
علّمينى : لا إله
إلاه

الأوّلة : رقوة
والتانِية : تقوى
والتالِتة : مأوى
والرابِِعة : بنية
من كل ديب أقوى

والخامِسة : صوني
والسادِسة : كوني
مريم العدرا
كونى بنت خديجة
أو حفصة
كونى بنت عائشة الطاهرة
اللى برّأها كتاب الله
والسابِِعة : صلّوا
على الهادي
مُحَمَّد
إبن عبد الله