عبد المنعم حسين يكتب:مصر الجديدة

لقيت مصر الجديده
فى ميدان التحرير
الكل فى واحد
والواحد للغير
طابور طويل لافف
متشابك
لا تعرف مين الأول
ولا فيه حد أخير
لا فيها ابيض ولا اسود
ولا مسلم ولا قبطى
وما عرفت مين الغنى
ولا لقيت فيها فقير
شفت العفريت بيطلع
من بدن مصر
وتسكن مكانه ملايكه
قلت هو ده التغيير

شفت مصر الجديده
فى ميدان التحرير
الإراده والعزيمه
وازاى اللى انت عاوزه
لازم يصير
وعمر الشباب
اللى وارى التراب
بيجرى جناين
ونسمة عبير
ويجرى نهر
وكل ما يدى
لسه حاسس بالتقصير

لقيت مصر الجديده
فى ميدان التحرير
وشوش سمحه مبتسمه
لا نفاق ولا تزوير
بتدعك الفساد
تحت كعوب الولاد
وبتغزل أمل وضمير
بتكتب للذكرى
وتنقش بكره
اللى جه
وفرد شاله الحرير
ولفك يا مصر
ولف بيكى على اللى جاى
ومسح من ساعتك التأخير

لقيت مصر الجديده
فى ميدان التحرير
ومصر التايهه
رجعتلى ثايره
رجعتلى شابه
شاهره مفاتنها
لابسه التُلى والحرير
وبعد ما ضاعت سنين
وتاهت منى
لقيتها جايه فى حضن ابنى
تعاتبنى .. وتلومنى
آه يا بنتى وأمى
باعترف ما كان كفايه
استجير
د انا بيكى صِغِرت تلاتين سنه
قلبى العليل طاب
وصلبت ضهرى اللى انحنى
وبقيت صَغير
واخيرا فى مرايتى
لقتنى انا
دُقت فى ريقى طعم الهنا
ولأول مره لما افرح
اطير

لقيت مصر الجديده
فى ميدان التحرير
مصر النضيفه
مصر الشريفه
القويه العفيه
المستحميه
بعرق شباب التحرير
مصر الجديده
الكل فيها أجير
الكل فيها أمير
الكل فيها فى واحد
والواحد
من اجل الغير
بتجرى فى مشوار واحد
مشوار
من اجل الخير