سمير البحيري يكتب: المعلم حسن شحاتة من النهاردة مفيش حكومة أنا الحكومة؟!

هو المعلم حسن شحاتة عاوز مننا ايه بالظبط ياريت يقول عشان نعرف ونفهم كيف نتعامل معه من اجل الله والوطن..الرجل مش طايقنا نحن الاعلاميين ولا حتى الشعب زي ماتقولوا كدة الضرة وضرتها.! وواخد فى وشه بعد خسارتنا من الجزائر فى ام درمان قبل سنة وتوديعنا لنهائيات كأس العالم2010 .. وبعد تجديد الثقة فيه اقتنع انه فوق اي نقد او ماشابه ذلك وقالك من النهاردة مفيش حكومة "انا الحكومة" على طريقة احمد السقا فى فيلم الجزيرة ،وهو كده وخلاص واللي مش عاجبه الكحل مايتكحلش ويسد عينيه، زي ماكنت جدتي بتقولي زمان لما كنت اغضب على الاكل.!المعلم من وقت وصوله الدوحة مساء الاثنين 13 الشهر الجاري قبل لقاء مصر وقطر بيومين ومن اول مانزل من المطار وطلع برة وجد 5 الاف مصري فى انتظاره فى موقف لم ولن يتكرر كثيرا عند وصول المنتخب لأي دولة.. قالك كده بالمفتشر مفيش تصريحات مفيش اعلام خلاص خلصنا بح وياريت كده واللاعبين والادرايين والمساعدين شملهم قرار الحكومة وقالك ولاكلمة انا الحكومة.
قلنا يمكن هذا الضغط الجماهيري منعه من التصريحات ليسرع للفندق ليرتاح ومعه لاعبيه الا ان المعلم برضه جه تاني يوم وقالك ممنوع الاقتراب والتصوير مش متكلم يعني مش متكلم وسمح الاخ مجدي عبدالغني للصحفيين الذين جاءوا من الصحف القطرية بالدخول ووقفنا زي مابيقول المثل ذي الاطرش فى الزفة، بعيداً عن الملعب ولانعي مايدور من حولنا ..طيب نكتب ايه تاني يوم ونقول ايه للجرائد التى نعمل فيها.! سكتنا وكظمنا غيظنا ليفاجئنا المعلم ليلة المباراة فى تمرينه الاخير بمننعنا من الدخول نهائياً ..بالطبع استشطنا غضبا عاوزين نعمل شغل يارجالة ولاحد سأل فينا وياريت كده ومع زحف حوالي الفي مصري ليتابعوا تمارين المنتخب أمر المعلم برضه بعدم دخولهم نهائياً عشان ايه وليه مش عارفين هى المباراة ال هايلعبها فى مونديال 2022 ال هاتستضيفه قطر ولا المعلم كان بيحلم ..ورجعت الجماهير ساخطة على المعلم ولاعبيه.
قلنا ماشي المعلم هو الحكومة ومفيش حد يقدر يتنفس بكلمة نحضر بقي للمباراة واللي فات مات وخلينا ولاد النهاردة، وزحف 50 الف مصري من المقيمين فى الدوحة الى ملعب خليفة الدولى نعم 50 الف ولن يتكرر هذا المشهد مرة ثانية مستحيل ان تلعب بره ارضك ويحضر لك 50 الف رجل من محبيك، وبدأت المباراة وكل الشعب اللي حاضر يمنّي النفس بفوز عريض على منتخب قطر الشقيق لكن العنابي عملها وليس صدفة بل عن جدارة وفاز 2/1..وجلس ال 50 الف يصبون جام غضبهم على شحاتة ولاعبيه ..فين شيكابا لا وللاعبدالله السعيد وللا احمد على وللا وللا كانوا فكوا التكتل الدفاعي ال عمله الفرنسي ميتسو مدرب العنابي وتفوق به على المعلم، وعلى فكرة ال 50 الف منقسمين مابين اهلاوية وزملكاوية واسماعلاوية ومصرواية واتحادوية بالطبع.. لكنهم شنوا حملة على تريكة وجمعة وعبدالواحد وفتحي وعبدالفضيل وفتح الله ولم يستثنوا احداً إلا وقالوا عليهم ماقال مالك فى الخمر.
وانتهت المباراة وخرج هؤلاء الآلاف زعلانين وندمانين انهم راحوا وراء الناس دي اللي كسفونا. وشاهدت الاطفال بعيني وهم يبكون بحرقة من اثار الهزيمة..طيب بالله عليكم انتم راضيين عن مستوى ابوتريكة ورفاقه القدامي وللا انا مغرض وزملكاوي حاقد عليهم.!! مش كفاية عليهم كده ياجماعة ولا احنا مش شايفين اللي مش شيفاه الحكومة وانا بصراحة مؤمن بعدم الاستجابة للضغط الجماهيري فى حالة اي شيء يخص الاندية او المنتخب لكن فى هذه المرة انا مؤمن برأي هذه الجماهير باستبعاد كبار المنتخب وكفاية عليهم كده كفوّا ووفوّا الجماعة، مش انتم معايا برضة ولا انا غلطان، طيب ياحكومة احنا راضين بمقاطعتك للصحفيين ومن هم على شاكلتهم من مذيعي الفضائيات والكل كاتم وساكت، بس وبصراحة كده انت يامعلم مش فوق مستوي النقد وانت ماشي فى سكة غلط ومهببة بهباب..استبعدت ميدو ولم تذكر لنا الاسباب؟ طبيبكم احمد ماجد قال على شاشة مودرن سبورت وعلى الهواء مباشرة ايوه شيكابالا مصاب ومحتاج 5 ايام راحة والرجل لعب بعد ماشفٌي وكسر الدنيا امام الاتحاد واحرز 3 اهداف وبرضه استبعدته ..! بلاش دول ياحكومة اين عبدالله السعيد واحمد على وعبدالله الشحات؟ ولا انت مصمم ان يكون لاعبو الاهلي لهم الغلبة فى المنتخب واعدادهم خير اعداد لناديهم الواقع بصراحة كده بلغة الكرة فى الأسابيع الاخيرة خليت الناس اقتنعت ان الاهلي لما يقع المنتخب يقع وهذه كذبة كبيرة. فالأهلي ضم كل لاعبيه من الأندية الأخرى وهم دوليون وآخرهم جدو ماعلينا.! ..طيب فين محمود شاكر الظهير الايسر للاتحاد السكندري ولا احمد فوزي ظهير ايمن المصري البورسعيدي فين دول ياسي شحاتة زي ماكان بيقول حسن مصطفي لنور الشريف فى فيلم غريب فى بيتي.! انت راكب راسك وبأعلي صوتك بتقول انا الحكومة..لأ ياسيدي انت الحكومة اه لكن احنا الشعب ولازم تسمع صوتنا وللا انت تبع لجنة السياسات ومسنود من جمال مبارك زي الناس مابتقول فهمنا ياعم شحاتة ارجوك .؟هو انت عاوز ايه بالظبط عشان نعملوه لترضي عنا وتصغي لكلامنا وكلام الشعب اللي هاينفجر منك ومن لاعبيك.. ياسيدي هو مفيش الا ابوتريكة وجمعة وعبد الواحد وجدو وجدي وجدتي وعمتي وخالتي وماما وبابا.! والى آخر القائمة ال انت مصمم عليها ولاترى غيرها بقي هي مصر يارجل مفيش لاعبين فى مركز رأس الحربة والظهيرين الاسير والايمن وخط الوسط والهجوم خلاص مفيش بح خلصنا، ارجوك ياعم حسن شحاتة اوعى تزعل من كلمة الحق الشعب ده ليه حق عليك ولازم تستحمله وكمان كلنا بنغلط ياسيدي ومفيش حد مش بيغلط وانت ماشي فى سكة غلط وللا هاتلعن سنسفيل اللي خلفونا مقبولة منك ياسي شحاتة.