أول البرد

1
قدام التليفزيون
وف إيدي الريموت
شفت المذيعة بتضحك ضحكة مابتريحش
فاصل
إعلان عن فيلم
ندوة ف أسرار الجسم
وشكوي من البطاله
وم التعذيب ف القسم
فيه واحد فجّر نفسه
من ساعة في فلسطين
رد عليه في ساعتها
خمسة من بغداد
وباريس بتمطر تلج
والنمسا فيها حداد
والحفلة من بيروت
والنجمة من لبنان
والماتش م الاستاد
فيه فيلم ماكنش مترجم
بس لقيته uncut
كالعادة أنا اتفرجت
كالعادة أنا غيّرت
ف مكة الفجر اهو أذّن
والصلا ع الهوا منقوله
الحلقة التانية بتبدأ
طب فين الحلقة الأولي
قلبت لقيت أغنية
بالصدفه كانت وطنية
قلبت لقيت إعلان
قلبت لقيت إبليس
قلبت لقيت أخبار
قلبت لقيت تترات
قلبت لقيت زلزال
قلبت لقيت رنات
قلبت لقيت جنات
قفلت التليفزيون
ودخلت علي البلكونه
باحط إيدي ف جيبي
مالقيتش غير بالونه
نفخت لما زهقت
خدني الهوا وبردت
الليلة الدنيا برد
بابص أشوف الشارع
مافيش ف الشارع حد.
2
خشب
عملت نفسي لوح خشب
أنا فرصتك يالا الحقي
طب ليه مُصره تغرقي؟
نفسي خلاص قرّب يضيق
باغرق ومع اني غريق
بامد إيدي أطلعك
بس الغرور بيمنعك
دلوقتي صعب إني أنفعك
سبق الفراق روح الفريق.
3
مراية الحمام
الجرح اللي ف دقني ده
والنظره اللي ف عيني دي
ومراية حمام الصبح ضباب
وأسناني وقعوا ف الحلم
وأنا جوه أحداث الفيلم
وبامثل دوري مكسور
أنا مش عارف أحب الدور
أنا متضايق من نفسي
4
محبوس
محبوس وريقي ناشف
وجرس الباب بيرن
وأنا نفسي أفتح ولكن
حد مكتف إيديا
أنا مين ومين يا تري
ع الباب ف اللحظة ديا؟