إل...MAIL وآخره...

يا أيها العالم الملوث والفاسد والقذر ..صباح الفل
تحية حلوة وبعد.. فخامة رئيس جمهورية ضربة شمس.. لم يبق اختيار.. سقط المهر من الإعياء علي رأي عمنا أمل دنقل.. أنا خلاص اكتأبت هتخنق ياريس ومش م الحكومة بس.. لا م النظام كله بعد صلاة الجمعة كنت بشتري «الدستور» واستفزني بقوة المانشيت الرئيسي لجريدة قومية بني سويف تشيع شهيد الحدود في جنازة عسكرية مع صورة كبيرة للجنازة ومع ألمي الشديد لاستشهاده وعزائي لأسرته فقد اقشعر بدني وأنا أتذكر كم شهيداً سقط عالحدود برصاص إسرائيليين.. ولم نسمع عن جنازات هؤلاء لا حس ولا خبر.. لكن دا بقي قتله فلسطينيون.. قشعرت من المتاجرة بدم شهيد بني سويف.. أعملهم إيه بقي دبرني يا رئيس.
خالد مانش
- إزيك يا «مانش».. طبعاً الله يرحم شهيد «بني سويف» اللي مات علي الحدود هو وكل شهدائنا العظام علي مر التاريخ، وبالنسبة للاهتمام بجنازة الشهيد اللي مات برصاص حماس أكثر من الاهتمام بجنازة الشهداء اللي ماتوا برصاص إسرائيل.. لو حطيت نفسك لثانية واحدة علي كرسي الحكم وفكرت كرجل سياسة بعيداً عن العواطف.. حتكتشف إنه تصرف طبيعي ومنطقي جداً للرد علي الغضب الشعبي تجاه بناء مصر للسور العازل علي حدودها مع غزة هو.. دا علم السياسة يا«مانش».. وهو دا العالم اللي إحنا عايشين فيه.. يا عزيزي «مانش» اعلم أنك تعيش في عالم ملوث وفاسد وقذر تماماً.. عبقريتك بقي تكمن في تغاضيك عن أنه ملوث.. وفاسد.. وقذر تماماً! OK!
المذاكرة أولآ .. وبعدين الفاس بوك
خالد باشا.. بما إنك أبويا الروحي فمن حقي أطلب رأيك واستشارتك.. أما تعمل حاجة اكونت فيس بوك مثلاً وتبني فيه سنين وتعبت فيه وفجأة وبعد مرحلة تلاقيه قلب، بدل ما كنت تطمن بيه علي صحابك وتتواصلوا بقي يخليك تزعل منهم وبدل ما كان مساحة للحرية والانطلاق بقي تقييد ومراقبة.. وساعات محاسبة.. إيه أحسن حاجة تتعمل.. تهدم كل حاجة وتقفله نهائي وللا تقفله مؤقتاً لحد ما تحاول تعمل ترميم لروحك وتمنع أي حد يداخله إيي هذا الحين وللا تسيبه وكمتحف اللي يدخل فيه يفتكرك وخلاص.. مستني ردك عشان اتخنقت وزهقت من ترددي، ودعواتك لينا في عوأ المذاكرة والامتحانات بتاعت آخر سنة كلية دي.. وبيييس.
خضريانو الضربشمساوي
- إزيك يا «خضريانو».. أحب ألفت نظرك في البداية إلي إن رسالتك دي من حوالي 4 سنين كانت تعتبر نوعاً من أنواع «الفرفرة» و«الفراغ».. من منطلق إنه «أكاونت فاس بوك» إيه اللي انت بتتكلم عليه.. ولكن.. ولأن الحياة لها حسبتها الخاصة تماماً.. فقد أصبح «أكاونت البني آدم علي الفاس بوك» لا يختلف كثيراً عن إيميله أو موبايله ومتابعته لفضائيات العالم من شاشة في غرفته الخاصة.. المنظومة واحدة لهذا.. ولا تقفله ولا تلغيه ولا تشغل بالك بيه اليومين دول.. ولأن الحياة أولويات.. لهذا.. أولوياتك دلوقت يا خضريانو إنت وكل شعب ضربة شمس من طلبة وطالبات الجامعة التركيز في المذاكرة وأداء الامتحانات علي أكمل وجه.. مش علشان التعليم جميل.. لأ علشان تخلصوا الربطة السودا دي.. وتفوقوا بقي للحياة الحقيقية!
إخراس السنة ..كلاكيت تاني مرة
إزيك يا عم الشباب وكبير المنايرة.. استنيت أشوف رد فعلك في العدد بتاع 6 يناير علي إلغاء حفل الملك في الأوبرا.. لكن ملقتش تعليقات منك ياكبير فقررت أقولك ببساطة عن اليوم اللي اتلخبط بسبب حبايبنا الحلوين اللي لغوا الحفلة.. أنا يا بيه قضيت اليوم في الشارع وسط زبالة بتتحدف وأكياس مياه بتزاول خلق الله وهو دا كان راس السنة بالنسبة لي بعد ما لغوا صوت الملك يومها من قاموس شباب المنايرة المهم أنا عايزك تقولنا كواليس الغاء الحفل ورد فعل الملك منير بسببها.. سلام
مراد أليكس
-إزيك يا "مراد".. بص يامعلم.. السنة اللي فاتت.. كتبت بعد إلغاء حفل الملك في رأس السنة.. "إخراس السنة".. السنة دي حصل نفس الموقف.. مخاوف أمنية من التجمع الكبير لحوالي 60 أو 70 ألفا في وسط البلد.. لقيت إني لو كتبت حاكتب نفس الكلام.. وبيني وبينك.. ماكانش ليا نفس أكتب من زهقي.. وبالنسبة لرد فعل الملك اللي عرف أخبار الإلغاء بالتليفون أثناء استعداده للمجئ من "ميونيخ" للقاهرة من أجل البروفات.. كانت جملة واحدة.. "الموضوع عبثي لدرجة إني مش عايز أتكلم عنه".. لهذا خلاص.. وزارة الداخلية قررت إنهاء عادة حفلة الملك في رأس السنة.. تسألني.. "طب وليه مالغوش باقي الحفلات"؟! أجاوبك.. "إسألهم"!
قف للمعلم .. واصطدم بالواقع
السلامو عليكو بيقولك قف للمعلم وفه التبجيل.. طيب وبالنسبة لدكاترة كلية طب اللي بيدوا دروس وطبت عليهم مصلحة الضرايب كل واحد خد ديله ف سنانه وطلع يجري.. والدكتور اللي ساب الطلبة جوة الأودة وخد الجاكيت والمفاتيح وفك.. طيب أنا لما أشوفه تاني أحترمه إزاي؟؟ وهل فعلاً العبثية وصلت بينا لدرجة إنك تفقد الطلبة احترامهم للمهنة المقدسة دي؟؟ طب وطموحي وإيجابيتي ورفضي التام لكل اللي بيتقال عن العوأ الأزلي ده؟؟ وحالة الاندهاش اللي أنا عايشاها م الصبح دي؟؟ دا اللي بيسموه الاصطدام بالواقع؟!
dr.Niro
- صباح الفل يا «نيرو».. بصي بقي ياعسولة.. المثل قالك «قف للمعلم وفه التبجيلا».. ما قالش «قف للدكتور».. لهذا.. ليس علي الأطباء حرج فيما فعلوه.. فهم قبل أن يكونوا دكاترة وأساتذة وأطباء.. هم بني آدمين وعندهم عائلات وأسر ومستوي اجتماعي معين يطمحون في الوصول إليه.. طبعاً دا مش معناه إنهم صح.. بس دا معناه إنهم زيكوا انتوا الطلبة بالظبط.. إنتوا الاتنين (الدكاترة والطلبة).. مظلومين.. دوروا علي اللي ظلمكوا يانيرو.. وسيبك بقي من حكاية احترام المهنة المقدسة.. الزمن اختلف.. ومابقاش فيه حاجة مقدسة يانيرو.. قلبي معاكو!
إزاي الأميرة توصل للصندوق؟!
عارف يا «خوخة» اللعبة بتاعة إن فيه أميرة قدامها شوية طرق متخلفنة في بعضها وفي بعيد صندوق ويقولك لاقي الطريق اللي يوصل الأميرة للصندوق وتبقي كده كسبت؟ باختصار أنا الأميرة دي.. أنا تايهة في حياتي خلصت دراستي وبعدين.. مش باعمل حاجة ومش عارفة أعمل إيه، مش بحب حاجة معينة، ماليش هواية، ماعنديش حتي حرفة، حتي الحب مش عارفة ألاقي اللي ممكن أحبه، أنا تعبانة أوي وحاسة إني عايشة علي هامش الحياة بس مش مستنية حد يشدني جواها، حد يلاقيلي الطريق اللي أمشي فيه، أنا عايزة ألاقيه لوحدي وأزق نفسي جوه الدنيا بس مش عارفة.. أنا تعبت
Tuta
- كلامك يا tuta بيسوقنا لأساس المشكلة بتاعتك.. نظام التعليم اللي عرفك قواعد النحو وأساسيات الحساب والفيزياء والكيمياء وحشر دماغك بنصوص اللغة العربية العقيمة (كأنه شرط إنهم يختاروا أردأ النصوص للدراسة) بس للأسف نسي يعرفك إزاي تكتشفي نفسك وإزاي تحطي إيدك علي الموهبة اللي جواكي.. ما أملكش أي نصيحة ليكي غير إنك لازم توصلي للصندوق، ولازم تدوري جوا نفسك تاني علي الحاجة اللي بتحبي تعمليها.. مافيش بني آدم علي الأرض ماعندوش موهبة.. مافيش بني آدم علي الأرض ماعندوش حتة منورة يا tuta!