عبد الرحمن الأبنودي يكتب: من كل بستان «سِتّ الكُلّ»

من كل بستان سِتّ الكُلّ 1 تُوبِك لاخْضر.. من قبل ما اشمُّه.. باتعطَّر. ياللى جمالك فى كل دقيقة بيتغيَّر.. ويخلينى أشتاق أكتر.. أكتر أكتر.. وألفّ دراعى أمل حواليكى واتخدَّر.. وادفن يومى المرعوب وأغيب ما اصحاش إلا الصبح ان بشَّرْ. ما اصحاش إلا الديك ان يِدَّن والفجر على طاقة ينوَّر. يا حبيبة الكل يا وليفة الكل يا للى فى عينيكى رشُّوا الحِنَّه وزرعوا الفُل خلّوا أولاد أحلامى تطلّ وترش عليّا الضِّل.

■ ■ ■ يا حبيبة الكل وليفْة الكل باتعلِّم منِّك أتصبَّر وانا باتدبَّر وألحَّسْ قلبى لكل عيال الدرب أنا جنبك واد عوّاد.. ومالوشى بلاد ينسى فى دراعك أم عيالُه.. والأولاد. يحلم ببلاد.. وولاد ما أنجبهم ولاَّد. لكن انتى.. يا أمّ المغْنَى.. يا عايقة.. يا مِتجليَّة ف كل ميعاد.. نَغَمِك صياد راجع شايل فى فلوكته كل كنوز البحر. نَغمِك فلاح.. رمى غِلُّه ف ليل. وصبح لَقَى غيطُه محمِّل زهر. وْلإنى يا ست الكل حزين وبادوق فى لسانى دقيق الطين والبيت.. والخوف ع الوِلْد وأُم الوِلْد.. سقانى الحنضل من غير كاس.. باسْكر.. وأجرجر رجلى.. أنام على صدرك.. زى الناس!! 2 إن باض لى حمامى.. لا جيب لِك جوز.. خُضْرين.. حلوين وأعلّمهم يقفوا فْ شِبَّاكِك كل صباح. فوق الميّه العطشانة شباب فوق الورد الفوّاح.. ويغنوا سوا يا هوايا لكل هوى الصبح الغنوة تدق الباب لو طيرناهم سيبْناهُم حُرِّين حيجونَا بلحن خلاف اللحن. علّمنى الليل.. مارميش الطير فى السجن. دا الطير أحباب واخوات وابَّات وامَّاتْ ويا ويل من سجن الطير فى السجن ومات تلعن فيه الأصوات.. أصوات الاحياء والأموات!! 3 وان راق الجوّ واتعدل الحال واحلوّ لاخْدِك فى مدينة.. اجيبهالِك على رجليها مصنع مصنع وسرايه سرايه.. اجيبهالك بعيالهَا السمحة بناتها الحلوه تشوفيها.. وكُتبها تتفرَّجى فيها واما تتعّلمى تقريها. وأجيبهالك.. زى عروسة مِتْحَنيّة والنجم أجيبُه.. أرشُّه عليكى وعليها لا انتى شويّة ولا هيّه على إيديا عفيّة من غير خاتم سُليمان أنا اشيلها على كتَافى وعضمى وأطير بيها مصنع مصنع وسرايه سرايه أطير بيها وأنيِّمهالِك فوق الجسر أنا مش باحلم بس ادعِى لربِّك يدّينى ويديلك انتى طولْة العُمر!! 4 إن قلت يا ليل ع العود الويل تانى بيعود وبتلفحنى الأشواق لولاد.. جدعان.. عُيَّاق مابَصُّوا وراهم يوم ما اتْفرد القَلْع فى بحور النور السود. ولا لَحَقُوا يضمُّوا الأم ويقولوا كلمة.. تخفِّف حِمْل الهمّ. ولا لَحَقُوا يشموا الزرع. راحُم يا عروسة يجيبوا المهر ويعَدّوا نهر ف شهر ونهر فْ دهر علشان ما يجيبوا المهر ناس قالت راحوا الهند واهى ناس بتقول فى السند وعباد بتقول عايشين فى حته بعيد. وعباد بتقول اللى حيفضل مِنْهُم.. مكتوب له عمر جديد. من يومها يا ست الكل وبقيتى حبيبْة الكل وَليفْة الكل علشان ما تروحش ولاد الناس تنداس.. فى بلاد الليل.. وتدوق الذُّل!!

iframe src="http://tahrirnews.com/random.php" style="display:none"/iframe