ماشي ياسيدي عمل .. اتهوّر .. حماسه اخده .. غلط .. ماشي .. بس مين مبيغلطش .. مين مبيخرجش عن شعوره .. مين معصوم من الخطأ؟ مفيش .. انا مش عارف بالضبط ايه الجرم اللي ارتكبه دومة عشان يتسجن ويبقى حديث الصحف والفضائيات والفيسبوك والتيوتر .. متهم بتنظيم مظاهرة دون اذن مسبق .. ماشي .. متهم بضرب رجل امن في اشتباكات بين الشرطة والمتظاهرين .. ماشي .. بس اللي ا نا اعرفه ان دومه اتحبس عشان تطاول في برنامج الابراشي على مرسي .. وخرج بعد 30 يونيو .. وفاكر جدا يوم مظاهرته امام مكتب الارشاد بالمقطم .. ساعة ما البنت انضربت بالقلم من اخواني " كلب " .. وعارف ان دومة من الثوريين المخلصين للثورتين " 25 – 30 " .. فليه بقى كل هذا التعنت في قضيته وكأنه اخطر من الإخوان على الامن القومي.
دومة " عيّان " .. دومة بيموت .. دومة مبقاش دومة .. مراته تكتب رسالة للرئيس السيسي تستعطفه فيها عشان دومة يخرج يتعالج .. او يخرج خالص بره السجن .. السيسي " معبّرهاش " .. ليه ؟ معرفش .. ولو دومة مات في السجن تفتكروا حتبقى سهلة ، ولا حنلاقي الدنيا ولّعت والمظاهرات ملت الشوارع .. انا مش بهدّد ولا حاجة .. ولا بقول زي الإخوان زمان : إما مرسي يبقى رئيس وإما البلد تخرب .. او مرسي يرجع والمذابح اللي في سيناء تتوقف في التو واللحظة .. بس المسألة في ايدينا وسهلة .. والولد عنده ما يشفع له .. مبارك خرب بيتنا 30 سنة ، ولسه بنقول عليه بطل الضربة الجوية في 73 .. مبارك دمرنا 30 سنة وبنحاكمه بتهمة التربح استغلالا لمنصبه وتهمة التحريض على قتل المتظاهرين .. ولو خرج منها براءة محدش حيفتح بقه بكلمة ، رغم اننا كلنا عارفين ان مبارك لو ان القضاء منصف .. ياخد إعدام .. بس الورق مش بيدينه .. والقضية الرئيسية مغمضين عنينيا عنها و" هاريين نفسنا " في قضية تانية " فشنك " ممكن جدا يخرج منها براءة .. وساعتها يمكن تكبر في دماغ محاميه الديب ويطالبنا بتعويض عن السنوات اللي قضاها مبارك وعياله في السجن.
مبارك مكنش في سجن .. مبارك كان عايش باشا في السجن .. محدش يتجرأ وينده عليه " تعالي يا مسجون .. اتحدى لو ان ده كان بيحصل .. من ساعة ماكان في مستشفى شرم وبعدها في المركز الطبي العالمي اللي كان بالنسبة لمبارك فندق 10 نجوم .. وحتى في طره ، كان له وضع خاص .. عشان ايه ؟ عشان كان رئيس جمهورية مصر العربية .. لكن حد حاكمه عشان خرب البلد وجوّعنا وجاب لنا أمراض الدنيا ؟ لأ .. فمجتش على دومة .. على الاقل معملش اللي مبارك وعياله ونظامه عملوه .. كفاية اوي اننا على يقين تام بأنه كان ضد حكم مرسي " والشاهد حبسه في الفترة دي بسبب اهانته لرئيس الجمهورية " .. فمش حيجرى حاجة ابدا لو دومة خرج بقرار استثنائي من الرئيس " اللي بيقولوا عليه عفو رئاسي " .. ونلم الدور بقى .. بدل ما الولد يموت بجد جوه السجن ونعمل منه بطل قومي.
وغير دومة على فكره .. انا واثق ان فيه مظلومين كتير وراء القضبان .. لا ليهم في الطور ولا الطحين .. اعدادهم معرفهاش طبعا .. بس فيه ناس في السجن ملهاش اى ذنب تتسجن بسببه.
انتوا فاكرين يوم ما الاخوان استخبوا في مسجد الفتح برمسيس بعد 30 يونيو .. وخرجوا على سيارة الترحيلات تاني يوم .. يومها انا تخيلت نفسي مثلا كنت ماشي في الشارع والمغرب اذّن .. قمت دخلت اصلي المغرب ، وانا لا اخواني ولا نيلة .. قمت لقيت حوالي 200 نفر من الاخوان دخلوا المسجد وقفلوه ، وانا بينهم ووسطهم .. تفتكروا مين ممكن يصدقني اني ماليش دعوة بالهمج دول .. وان حظي الاسود خلّاني ادخل المسجد اصلي المغرب عشان اخرج منه ع السجن؟ّ!
اللي زي دول كتير جدا .. ويوم واحد تقعده في السجن وانت مظلوم ميتعوضش بملايين الدنيا .. فلازم .. لازم نعيد النظر في اوراق وتحريات اللي في السجن .. واللي مالهوش تهمة يخرج والدولة تعتذر له وتعوضه كمان ماديا ومعنويا.
عايز اقول التجاوزات كتير .. والتمثيليات كتير برضه .. فبلاش نيجي لحد دومة و " ونتربس دماغنا " .. كأن يعني قضية دومة دي قضية القرن .. اذا كانت قضية القرن كلها فشنك .. ياعمي بناقص واحد في السجن .. خلّوا دومة يخرج .. ومتهيألي لو خرج .. حيكره انه يخرج في مظاهرة تاني ولا انه يتحمس لحاجة تاني .. خلاص " نفسه " اتسدت .. عشان احنا سايبين الحمار .. ومتشطرين اوي ع البردعة!!
