يا بلدنا مات اللي اختشي

يا بلدنا مات اللي اختشي
(8)
الناس توجه وجهها
أم يمين للدينار
وأم يساراً للدولار
وبشري لصناع القرار
إحنا في عصر الازدهار
وكل الذي كان وسار كان هزار
شعب ما لوش في الفرفشة
يا بلدنا مات اللي اختشي
(9)
لا أنا عبيط
ولا حويط
ولا عندي مال
ولا ليا صيت
ولا حتي بيت
بس نويت أنا وانتويت
لا أقول ده كان ولا ياريت
لكن إن لقيت
فرصة لأهج
وأقول يلعن أبو اللي ما منك مشي
يا بلدنا مات اللي اختشي
(10)
يا بلدنا يا بلاد الحضارة
وقيراط من الحظ ولا
فدان شطارة
والعبارة
مش في الحديد ولا في الشيكارة
في حسن الإدارة
بالأمارة
تأتي الموافقة من قبل طرح الأمر للمناقشة
يا بلدنا مات اللي اختشي
(11)
كلام جرايد كتها البلا
تسعي لإثارة البلبلة
قال إيه يا ناس
القوت غلا
والزيت غلا
تسعي الحكومة جاهدة
لرفع عبء المسألة
عن الفئات العاملة
ودي قلة قليلة مهمشة
يا بلدنا مات اللي اختشي
(12)
أريد حلاً
من فتوي رايحة وفتوي هلة
وكلهم علماء أجلة
وكل واحد قال ما خلا
يحيي الصليب مع الأهلة
وخلاص ما عدش الأمر علة
كل ما في الأمر قلة
تسعي لبعض المناوشة
يا بلدنا مات اللي اختشي
(13)
عارفة الهرم
عارفة المعابد والمسلة
عارفة المذلة
واللي خلا
العقل مني راح وولي
كنت قادرأقبل أي حاجة منك إلا
يا بلدنا
تبقي بس بلاد الناس اللي...
يا بلدنا مات اللي اختشي