عبد الرحمن الأبنودي يكتب: من كل بستان «يا دى الرئيس»

1

يا دى الرئيس.. اصبُر على شعبَك
جيت بعد ما اتْجَرَّفْنا دور ودورين
فإذا ما التقيتناش كلِّنا جنبك
بكره تلاقينا ما دام علينا أمين.
■ ■ ■
إنت نبيل وكل شىء بِحْساب
واحنا ما زلنا متَرْبِسين ويّاك
ماعادش فاضِل حدّ مش كداب...
من يوم ما جيت وانت تاعِبْنا معاك!!
■ ■ ■
إنت شجاع لا شكّ وشايفها
وعارف الداء الدفين.. يا حكيم
واحنا اللى بنكسَّر فى مجاديفها
نغرَّقوها.. ونِعملوا مظاليم!!
2

لو ادُّوهانى لِحُكْمَها ببلاش
حافشل واضيَّع فى القمار إسمى
لو باسوا يدِّى الجوز ما احْكُمْهاش
محتاجة منَّك معجزة رسمى!!
■ ■ ■
مِنْ كُتْر ما عِشنا بِنِتدَبِّس
نِمشى معاك ساعة وساعة لأ
خَطوة معاك.. وخطوة بِنْتربِس
أخدنا ع اللى ما بيقولوش الحق!!
■ ■ ■
ولو الإيدين كشِّتْ وما اتمدِّتْش
والأغنيا خافوا على القرشين
اتبرَّعُوا كام مرّة.. وما رجْعِتْش
ولا حدّ قال راحت فلوسهم فين!!
3

ساعْةِ التَّحدِّى لا لُقْمة ولا هِدْمَه
فاحْتَه الكنال بالفاس وبانْيَه السَدّ
لا يْهمّ قطع الميّه والضلمة
وحتى قطع الرزق ساعة الجدّ!!
■ ■ ■
واحنا معاك ولا بُدَ نِنْسَى ما فات
ونبتدى حتى ان مَلانا اليأْس
مصر بسَبَعْ تِرْواح لا حلمها مات
ولا زِهِقْنا من انتظار الشمس!!