احمد عفيفي يكتب : من أسوان ل « الأسواني » .. يا وجع قلبي ياني!!

والله العظيم قرفان قرف ماشفتش زيه قبل كده .. ايه الهم اللي احنا فيه ده .. نسدّها من هنا .. تتفتح من هناااااااك .. أخر حتة فيك يامصر .. أخر مكان ممكن تتوقع ان تبقى فيه مجزرة بشرية .. وجثث ولادنا على " عربية كارو " بيجرها حمار .. منظر بشع ، ويمكن أكثر بشاعة من منظر جنودنا الغلابة اللي اتقتلوا في العريش .. اللي قتلوهم إخوان .. أعداء .. عادي ومتوقع .. لكن اللي حصل في أسوان محدش يصدقه .. قبيلتين وقعوا في بعض ، بسبب يبدو تافه ، فمات في تلت ايام 24 .. مين اللي ضرب " الإسفين " بينهم ؟ .. بيقولوا الإخوان .. اصدق او مصدقش مش هى دي القضية .. القضية ان مصر واضح انها حتفضل في الهم ده كتير .. وواضح كده ان مش مكتوب لنا نفرح ونعيش حياتنا زي البني ادمين!

امبارح .. قاعد اتابع البرامج وقلبي موجوع بما فيه الكفاية .. بس منظر الجثث المتخشبة في أسوان هزّني وسد نفسي عن الدنيا .. وكيل النيابة واقف يعد فيها ويسأل الصاحيين : مين ده يابني ؟ .. ايوه يابيه ده محمد عبد العال .. وجثة مين دي يابني ؟ .. ودي يابيه بتاعت ابو احمد ابن الحاج علي .. والراجل يكتب والناس تشيل وترمي على الكارو .. كأنهم كلاب سكك ماتوا بكام رصاصة.

مسكت الريموت وجبت سي عمرو اديب ، لقيته مبّرق عينه وقاعد يشرشح لعلاء الاسواني عشان مقال كتبه او تصريح او تويتة .. بيقول فيها ان عملية الانتخابات الرئاسية غير ديمقراطية .. كلام ممكن يترد عليه خصوصا لما اللي يقوله علاء الأسواني .. لكن مش بأسلوب الهمجية التمثيلية بتاع فلة شمعة منورة .. المهم قلبت على " اون تي في " لقيت الأسواني بشحمه ولحمه مع ليليان داود.

والحقيقة ان مشكلتي مع د- علاء الأسواني اني بحبه جدا وبحترمه جدا جدا .. ومبهور به ككاتب وروائي عالمي ، لكن واضح ان عنده مشكلة أزلية مع الشرطة ومع الجيش .. قبل الثورة في يناير وبعدها ايام مجلس طنطاوي ، كان موقفه صح واقدر افهمه واتعاطف معاه .. لكنه ثبت على هذا الموقف رغم تغير الأوضاع الى حد بعيد .. لسه شايف الجانب العسكري زفت .. والشرطة ازفت منه .. وطبعا كلنا فاكرين مقاله بتاع الحاج صالح " السيسي " اللي شايف النصب حواليه وقاعد يضحك ويقول لنا بلؤم وخبث " انتوا نور عنينا " .. والحقيقة انا شايفه متجني كتير جدا على السيسي


رغم محاولته اثناء برنامج ليليان امبارح تزويق الكلام عنه بأنه راجل ذكي.. ويسمع اكتر بكتير ما يتكلم بحكم انه راجل مخابرات .. لكن علاء الأسواني شايف ان العملية الانتخابية غير ديمقراطية وبها عوار كبير .. ليه ؟ .. انا معرفش .. الإعلام كله بيطبّل للسيسي ؟ .. ممكن .. بس برضه محدش بيظهر على الفضائيات زي حمدين صباحي .. والسيسي – أخره - لحد دلوقتي يركب العجلة ويتمشى بيها شوية في الشارع .. فليه بقى تقطع يا دكتور علاء بأن الانتخابات من دلوقتي مش نزيهة وتقول زي مابيقول حسام مؤنس من حملة حمدين ان لو الانتخابات نزيهة 100% .. حمدين يكسب وهو قاعد في بيتهم .. يبقى باينة للأعمى لو السيسي كسب تبقى الانتخابات مزورة .. وده في الحقيقة ظلم بيّن .. ميرضيش ربنا ابدا .. لان الانتخابات لسه لحد دلوقتي ما بدأتش.

انا فاكر بعد رواية " عمارة يعقوبيان " قابلت علاء الأسواني في بيته في جاردن سيتي .. وكنت متعاطف جدا مع " طه الشاذلي " بطل القصة اللي انضم للجماعة الدينية نتيجة سوءات الشرطة في أيامها الغابرة .. وكان رأى علاء الأسواني اللي قاله لي صراحة ان الإرهاب نتيجة حتمية وطبيعية للقمع والاستبداد .. وده كان الاعتقاد السائد لكتير من الكتاب زي مثلا وحيد حامد " شوفوا فيلم" الإرهاب والكباب " .. وغير الأسواني ووحيد حامد .. ناس كتير - وانا منهم - كنت على يقين ان النظام في البلد هو السبب في خلق الإرهاب .. ومن هنا كتير جدا مننا كنا متعاطفين مع الإخوان المسلمين .. وكتير مننا كان شايف انهم اتظلموا واتسجنوا واتشردوا .. وعشان كده كتير مننا برضه عصر مليون لمونة وانتخب " مرسي " .. يمكن يطلع بتاع ربنا بجد ونشوف على ايده الخير .. لكن بعد التجربة السودا .. معتقدش ابدا ان فيه بني ادم عنده ذرة عقل النهارده ممكن يشوف الإخوان جماعة مظلومة ومقهورة .. بل العكس صحيح تماما ..

لكن ربما – واقول ربما – الأسواني لسه متعاطف مع بطل روايته طه الشاذلي اللي قتل الضابط في نهاية القصة .. ولسه شايف ان الشرطة مستبدة وتستاهل ضرب النار .. مع ان كل يوم يموت منهم واحد او اتنين .. عشان انا والأسواني وغيرنا نفضل عايشين .. اكيد في زحمة الإحداث وربكتها فيه تجاوزات غير مقصودة .. واكيد ان في السجن دلوقتي ناس مظلومة لا ليها في الطور ولا الطحين .. اكيد طبعا .. لكنها أخطاء حتمية للدربكة اللي احنا عايشنها من ساعة ما مرسي غار في داهية .. بس شوية عقلانية ياعم علاء .. الناس النهارده بقوا يصعبوا على الكافر .. فليه مش صعبانين عليك؟

اما عن السيسي وعدم ديمقراطية الانتخابات زي ما انت شايف .. فاصبر شوية لما بس المركب تتنيل تمشي .. ولو فيه غلط مش انت لوحدك اللي حتقف له .. كل واحد حر ومحترم حيقف بالمرصاد لأى تجاوز حيحصل .. فبلاش نولع الدنيا اكتر ماهى والعة .. واذا كنت مش قادر تطفي النار معانا .. فبلاش وحياة ابوك تنفخ فيها .. لانها لو شعللت اكتر .. يبقى خربت يا دكتور علاء .. ولا اظنك ابدا تسعى لهذه النهاية!!