أحمد عفيفي يكتب: «الكورة» في ملعبك يا حمدين !!

من امبارح ومن ساعة بيان السيسي .. والإخوة الأحباب اللي عايزين حمدين نازلين سلخ في السيسي .. وعاملين نكتة قالها زمان محمود عزب " واحد راح للبقال وقاله عندك جبنة .. البقال قال له لأ .. وهو عنده جوّه " .. طبعا عزب افندي كان بيقول النكتة دي عشان نضحك من سخافتها .. يقوم الاخوة بتوع حمدين – ولهم كل الاحترام – يقولوا ع السيسي نفس النكتة .. " سألوا وزير الدفاع انت حتترشح للرياسة .. فقال لهم لأ .. وهو ناوي يترشح .... ههههههه " .. انا في رأيي ان اللي زي دول ناس مغيّبة وفكرهم قاصر بدرجة مفزعة .. لأنهم بيتجاهلوا تطور الأحداث وحتمية اللحظة .. وعن نفسي أكاد أجزم ان السيسي مكنش في باله أبدا ان يرشح نفسه .. لكن .. من ساعة ما طلب من الناس التفويض بمحاربة الإرهاب .. اللي نزلوا الشارع يوم 26 يوليو - وكانوا ملايين تسد عين الشمس - كانوا نازلين بمطلب إضافي وأساسي في نفس الوقت .. عايزينك رئيس لمصر .. ومن ساعتها وأعداد غفيرة من الشعب المصري بتحب السيسي .. شايفه فيه خلاص البلد م اللي هى فيه .. ووقفته لحد اللحظة ضد الإخوان مش وقفة سهلة ولا هينة .. .. ولولا رجولته وجسارته مكنش الإخوان غاروا من سكتنا .. وبلاش وحياة ابوك انت وهى تقوللي : ماكان لازم يعمل كده .. مش هو جيشنا .. اوكيه .. طبعا جيشنا .. بس كان ممكن ميعملش كده .. وكنا طبعا قلنا عليه ماقاله مالك في الخمر وعندنا حق .. بس كان ممكن يصدّر لنا الطرشة .. ومنكم لهم اصطفلوا .. فتخيلوا لو ده حصل .. كان وضعنا ايه دلوقتي .. ومرسي - وكلنا عارفين مرسي - لسه قاعد بياكل بط في قصر الاتحادية.
فعايزين نخلص من النكتة السخيفة " هو قال انه مش حيترشح واترشح " .. وبلاش نلت ونعجن في كلام ناس فاضية .. ومع كل احترامي ليها مش فاهمة ايه اللي بيحصل في مصر .. ومين اللي يقدر يواجه .. ومين اللي يقدر يخوّف .. ومين البعبع بتاع الإخوان .. وامريكا ودول الغرب؟
خلصنا بقى من الجزئية السخيفة دي .. وندخل على الأهم .. السيسي قال بصريح العبارة : انا مش حيكون لي دعاية انتخابية بالطريقة التقليدية اللي انتم متصورنها .. وده معناه انه لا حينزل في ندوات ولا مؤتمرات دعائية ولا حيروح مدن لا في الصعيد ولا في بحري .. ومعروف ليه طبعا .. لأنه مستهدف .. ورصاصة بجنيه ممكن تخلّص عليه .. وكونه مرشح عادي زيه زي حمدين مثلا .. فمش منطقي انك تأمنه بقوات شرطة وجيش وهو مش وزير دفاع .. والا تعمل كده مع حمدين .. مع ان حمدين محدش حاطه في دماغه خالص .. انما السيسي لأ .. مش ممكن نقوله منك للناس .. لو عايزينك حيشيلوك فوق دماغهم .. لو مش عايزينك .. حيقتلوك!!.
طيب كون السيسي يعلنها دون الإفصاح الصريح انه مش ناوي يلف ويخطب في الناس زي اى مرشح .. ده بالمنطق كده في صالح مين ؟ .. حد عاقل يرد عليا .. مش يعتبر الكلام ده في صالح حمدين مليون في المائة .. انا مش نازل ياحمدين .. انزل انت ولف مصر مدينة مدينة وقرية قرية ونجع نجع .. مفيش اكتر من كده فرصة ذهبية لحمدين عشان يعمل له شعبية رهيبة وهو بيعرض برنامجه ع الناس .. وماشاء الله .. حمدي بتاع خطب امسك الخشب .. " والله ما اقصد اى سخرية " .. قصدي انه خطيب " مفّوه " .. وعنده خبرة في تأجيج مشاعر الناس ولمس احاسيسهم ومشاعرهم .. وخصمك او المرشح اللي قصادك بيقولك : اتوكل على الله .. منك للناس .. وانا بعيد .. لو شاطر هاتهم في صفك .. وانا اول واحد حقف معاك .. لو مقدرتش رغم الفرصة دي اللي مش ممكن تلاقيها على طبق من ذهب لحد تاني .. يبقى تعترف بالأمر الواقع .. وعشان مصر اللي انت بتحبها ياحمدين تساند بإخلاص اللي الشعب اختاره.
انا بس مش عاجبني في حمدين حاجة .. وهو اما ابقى رئيس او مش لاعب معاكم .. اكتر من مرة سألوه : لو السيسي مثلا نجح واصبح رئيس مصر وطلب منك مثلا تبقى رئيس وزراء او وزير .. تقبل ؟ .. فيكون رده بعنجهية فيها من المراهقة الشيء الكثير : مش حمدين صباحي اللي شخص يعيّنه .. اما ان أتي بانتخاب الشعب وإلا .. فلا . طيب ليه ياعم حمدين .. افرض فعلا ان السيسي شايف ان لك شعبية كبيرة في الشارع واحنا عارفين ده .. فليه ترفض – مش حتى تعتذر – وتقولها بعنجهية سخيفة : مش حمدين اللي يعينه شخص .. طيب افرض الرئيس الجديد شايف انك ممكن تكون سند له في مكان ما .. تقدر من خلاله تخدم مصر اللي انت بتقول انك بتحبها .. ايه المشكلة ؟ .. لا مع حمدين مشكلة ، ومشكلة كبيرة كمان .. اما ان اكون رئيسا او بلاها من اصله .. ومفيش مناسبة يجي فيها الا ويقول : لو الانتخابات نزيهة اكيد حنجح .. والحقيقة انا مش عارف على اى اساس عنده الثقة دي.. وجابها منين.
لكن .. ما علينا .. الكورة دلوقتي في ملعبك .. انت الوحيد اللي ممكن تلف وتعمل مؤتمرات .. وحتلاقي كتير يدعموك ماديا .. فانطلق ياعمنا وربنا يّيسر لك أمورك .. وعندك جمهور حاضر ومالي الاستاد .. وحارس مرمي تمام .. وخط دفاع مفيش كده .. وخط وسط فاهم وخبرة .. وجناحين واحد يمين وواحد شمال مفيش منهم اتنين .. وانت راس الحربة .. الكل بيخّدم عليك .. وأدي الكورة من الدفاع للوسط .. و" ثرو " محصلش .. وانت والجون .. هزيت الشبكة .. حلال عليك .. لكن تشوط فوق العارضة او على يمينها او شمالها .. او تتخض من " الحارس " اللي قدامك .. فتقوم " تشأط " له الكورة وتديها له في ايده .. يبقى متنفعش تكون راس حربة .. ولا حتى تلم الكور من ورا الجون!!