أحمد عفيفي يكتب : مقدرش ع «الحمار »!!

مفيش مشكلة خالص ان يصدر حكم بالإعدام على 528 " بغل " من الإخوان المجرمين .. اللهي يحرقهم بجاز نفر نفر على القرف اللي البلد عايشة فيه بسببهم .. بس العدد ده فردا فردا .. هل استقر في ضمير المحكمة وارتاحت وهى بتحيل أوراقهم الى فضيلة المفتي .. انا مش بتاع قانون ولا بفهم فيه .. بس اعرف مثلا ان لو واحد قتل واحد المحكمة بتقعد لها يجي 4 سنين عقبال ماتحول أوراقه للمفتي .. بتحاول تدور له على اى حتة ينفد منها من عشماوي وياخد تأبيدة ، ولما متلاقيش بتصدر حكمها وهى مرتاحة الضمير .. فما بالك بقى ب 528 متهم .. وحسب ما عرفت في جلستين مش اكتر أنهت المسألة .. وطست الحكم .. وتقوم الدنيا ولا تقعد في مصر والعالم .. سيبك من بره دلوقتي وخلينا في مصر .. لو أبديت مجرد الدهشة من الحكم ده .. تبقى ابن كلب وغبي وعميل وطابور خامس وإخواني طبعا .. حتى لو حلفت على مصحف انك مش إخواني وانك تقبل العمى ولا تقبلهمش ع الأرض ماشيين.
بس لو انت ثورى بجد – ده كلامهم مش كلامي – لازم تؤدي التحية تعظيم سلام للقاضي اللي اصدر الحكم ده .. انتوا الشر بعينه .. لاعاجبكم العجب ولا الصيام في رجب .. المحكمة تدّي براءة تصوتوا زي النسوان " هما اللي لسه بيقولوا " .. تتأخر في الحكم تولولوا زي الأرامل وتقولوا فين العدالة الناجزة .. ولما يحكم قاضي على 528 واحد بالإعدام في جلستين تقولوا ايه ده وازاى وحرام .. انتوا عايزين ايه بالضبط .. ربنا ياخدكم!!
... ده الكلام اللي بيقولوه من امبارح على كل واحد – وانا منهم – مندهش من الحكم .. مع ان الدهشة لها مبررها .. وانا سمعت امبارح القانوني الكبير عميد كلية الحقوق محمود كبيش في مداخلة مع عمرو اديب وقال ان من حق القاضي يصدر الحكم اللي هو عايزه .. بس من حقنا نسأل هل استوفيت كل شروط المحاكمة العادلة واعطيت للدفاع كامل حقوقه للدفاع عن المتهمين .. هل ثبت ووقر في يقينك ان كل واحد من ال 528 متهم يستحق حكم الإعدام .. مع ان الحكم صدر غيابيا على اكثر من 300 لم تسمع قطعا اى كلمة منهم ولم تحقق معهم النيابة أصلا .. ولم يجد كبيش اى حرج في ان يبدي هو الأخر استغرابه من هذا الحكم.. وغيره وغيره .. وفي المقابل ايضا هناك حقوقيون وأسماء كبيرة تقولك : اللي نطق به القاضي عين العقل .. ولازم كده .. خليّهم يخافوا ويتلمّوا الكلاب دي.
طيب عايزين نتخيل – انا اللي بقول – ان مثلا المتهمين في قضية كرداسة 50 واحد .. وكلنا عارفين حكاية مجزرة كرداسة واللي حصل فيها بعد فض رابعة .. وصدر حكم بالإعدام على الخمسين اللي قتلوا يومها كل ضباط القسم بطريقة بشعة .. هل ممكن يبقى رد الفعل زي رد فعل الحكم بإعدام 528 قتلوا نائب مأمور قسم مطاى .. صحيح سرقوا السلاح وحرقوا القسم وبهدلوا الناس هناك أخر بهدلة .. بس من حق اللي عايز يندهش يندهش .. انما لو صدر حكم بإعدام الكلاب اللي عملوا مذبحة كرداسة .. انا اول واحد حازغرد واصلي لربنا ركعتين شكر على القصاص العادل.. فمفيش داعي نقعد نخوّن في بعض لمجرد اختلاف الرأى في قضية بعينها .. لأننا كده مش حنخلص .. ولا بقينا عارفين مين مع مين ولا مين ضد مين .. وهل انا عشان مستغرب من حكم ضد الإخوان ابقى إخواني .. طيب ما انا عندي حق .. وزي ما انت عندك مبرراتك .. انا كمان عندي مبرراتي .. فاكرين كلنا حكم حبس بنات الساعة 7 الصبح 11 سنة .. والكلام ده من شهرين تقريبا .. اللي اصدر الحكم ده قاضي .. وبعد عشرة ايام يجي قاضي تاني يقوم يديهم براءة ويجيب لهم شيبسي وحاجة ساقعة في الجلسة ويخرجهم من القفص .. بعد اسبوع واحد .. من النقيض للنقيض .. وزعلان اوي اني مندهش .. ؟
عايز تقول مثلا ان ده حكم ثورى.. اصدرته محمكة ثورية .. ارفع لك القبعة واضرب لك تعظيم سلام .. نتفق ع المبدأ .. حنمشيها محكمة ثورية ولا عادية .. لو ثورية .. هات لي بقى الرؤوس الكبيرة اللي في السجن دلوقتي من اول المرشد لحد اصغر واحد في الجماعة مرورا طبعا بالافندي اللي كان رئيسنا .. واضربهم بالنار في ميدان عام .. وكل الشعب حيصفق لك .. وبالمرة اوعي تنسى مبارك والحاشية بتاعت اهله والخراب اللي حطنا فيه وخدنا له الى يومنا هذا .. الحق حق .. ثورية تبقى ع الكل.
مش ثورية وعايزين قضاء عادي بس عدالة ناجزة " قوام قوام " .. برضه تعظيم سلام .. بس ع الكل .. ع الكبار اللي خطّطوا .. على مرسي وحجازي والبلتاجي والعريان وكل الشلة الوسخة دي .. ده احنا داخلين على سنة ومرسي لوحده عنده قضايا اقل قضية فيهم إعدام .. انما ايه اللي حاصل .. ؟ .. تعالي يا مرسي عندك جلسة في قضية قطع طريق قليوب .. وروح وتعالى تاني عندك جلسة في قضية الاتحادية .. واوعى تنسي عندك بعد يومين جلسة التخابر .. وكل قاضي يرفع الجلسة ويأجل مع استمرار حبس المتهمين .. وشكلنا كده حنقعد في قضية مرسي 10 سنين عقبال ما نسمع حكم يشفي غليل كل أمهات الضحايا اللي ماتوا .. فاشمعنى بقى يعنى مع سي " خره " مفيش عدالة ناجزة .. ومع ال 528 .. عدالة ناجزة زي الكتاب مابيقول .. هو احنا مش قادرين ع الحمار .. نقوم نتشطر ع البردعة ..
ما الاخر عشان انا زهقت .. كل الإخوان كلاب .. من كبيرهم لصغيرهم .. ملعون ابوهم واحد واحد .. فاما تخلّصونا منهم مرة واحدة .. وتنجزوا وتخلصوا .. واما تطبقوا القانون صح .. واللي يسري هنا يسري هناك .. مش في المنيا " ناجزة " .. وفي القاهرة " عاجزة " .. مش في المنيا " اعدم اعدم " .. وفي القاهرة " موت ياحمار " .. عايزين عدالة ناجزة نعم .. بس مش مسلوقة .. متعملوش زي اللي طس البنات 11 سنة .. والقاضي اللي بعده براءة وشيبسي وعصير تفاح ..!!!