أحمد عفيفي يكتب : محمد خان .. مصري اكتر مني!!

ماهو لما ييبقى المخرج المبدع محمد خان بقاله خمسين سنة واكتر عايش في مصر ومش راضيين يمنحوه الجنسية ىالمصرية لانه باكستاني الاصل ، يبقى احنا دماغنا دي ضربت .. ولما يبقى الاخوان اللي عندنا عندهم جنسية مصرية ويقبلوا العمى في عنيهم ولايقبلوش مصر .. يبقى احنا عمى مش بنشوف .. وبعدين عايز اقول حاجة .
تفتكروا محمد خان لو اخد الجنسية المصرية ، حياخد معاها مثلا 100 مليون جنيه وسوف يتمتع متعة مابعدها متعة بكل المزايا اللي المصريين بيتمتعوا بيها .. حوش ياحواش .. هو احنا لاقيين ناكل .. ده احنا حالنا يصعب ع الكافر .. ولا يعني اسم الله سوف يُمنح صك الحرية المطلقة اللي مش موجودة في اى بلد تانية ؟ .. الراجل عايز الجنسية لأنه مصري وحاسس بمصر اكتر من كتييييير جدا معاهم الجنسية وبيولعوا في البلد ليل نهار.
الواحد ممكن يموت عشان ياخد الجنسية الامريكية او الايطالية عشان يتمتع بمزايا المواطنين هناك .. انما هنا عندنا وخلينا نتكلم بصراحة حياخد ايه ؟ .. إش ياخد الريح م البلاط .. لكن اللي اسمها مصر دي ليها سحر ميحسش بيه غير اللي محروم من جنسيتها .. انا فاكر في مسلسل " اوبرا عايدة " الراجل العجوز اليوناني اللي كان بيحوّش القرش ع القرش عشان يخلّي اوبرا المحامي يرفع له قضية لجل ياخد الجنسية المصرية وهو بينه وبين القبر فركة كعب .. ولمّا سأله اوبرا : هى حتفرق معاك في ايه وانت يمكن في لحظة " تفيّص " والسر الالهي يخرج ؟ .. فرد عليه ردا أبكاني : حاموت وانا مصري .. انت مش حاسس رغم مصريتك يعني ايه مصر .. مش عارف قيمة انك مصري .. وقليلين جدا جدا جدا اللي عارفين المعنى ده.
ومحمد خان انا اعرفه من يجي 30 سنة .. ظهر في اول التمانينات مع مجموعة السينما الجديدة اللي جات بعد سينما المقاولات .. كان معاه الله يرحمه عاطف الطيب وبشير الديك السيناريست المبدع وخيري بشارة وداود عبد السيد وسمير سيف .. الستة دول غيّروا مفاهيم الناس عن السينما خاصة الشباب الجديد .. وكانوا بيحبوا بعضهم بدرجة خطيرة وعندهم هدف ورؤية وطموح لاحدود له .. فرضوا نفسهم على الساحة بعد ماكانوا بيوفروا تمن عشاهم عشان يعملوا فيلم محترم .. وكان نور الشريف صديق حميم لهم وكان نجم كبير .. وقف جنبهم وكان القاسم المشترك في افلامهم .. خان مثلا اخرج له " ضربة شمس " .. وعاطف الطيب اخرج له " سواق الاتوبيس " ومن قبله " الغيرة القاتلة ".. وداود عبد السيد عمل له " البحث عن سيد مرزوق " .. وسمير سيف عمل رله " دائرة الانتقام " .. افلام محترمة عايشة لحد دلوقتي في ذاكرة السينما وستظل .
وفاكر اني قابلت محمد خان بعد فيلمه التحفة " طائر على الطريق" اللي قام ببطولته احمد زكي وفردوس عبد الحميد .. وبعده فيلم " الحريف " لعادل امام .. وحضرت العرض الخاص بتاع الفيلم في مدينة السينما بدعوة شخصية من محمد خان .. وعملت معاه حوار طويل عن الفيلم ده .. فقال لي يومها .. الحريف هو الجزء التاني من طائر على الطريق .. لم افهم وقتها .. اش جاب لجاب .. مال سواق االبيجو احمد زكي بلاعب الحواري والساحات الشعبية عادل امام .. فقالي " فارس " في طائر على الطريق هو نفسه " فارس " في الحريف .. دعك من الاحداث .. انا احكي عن انسان مهمش في المجتمع محروم من اقل اقل الحقوق .. مع انه " فارس " لو أُتيحت له الفرصة سيقود الدفة ولا اجدع مراكبي .
واذكر انني كتبت عنوان حديثي معه عن فيلم الحريف : الحريف يترك الكرة ويمارس اللعبة الاخطر .. حين ادرك " فارس " ان ملعب الكرة الصغير ماهو الا ملعب كبير على المستوى الاخر .. يحدث فيه وعليه كل الالاعيب القذرة من اجل المكسب وتحقيق الهدف .. غير ان الفرق انك تكسب من الكرة في ساحة شعبية قروشا قليلة .. فلو لعبت بنفس شروط اللعبة في الملعب الكبير كمجتمع يمكن ان تكسب الملايين.
خان اخرج افلاما للسينما المصرية تمنحه وحدها الجنسية بلا شروط .. وبلا قيود .. الرغبة .. عودة مواطن .. خرج ولم يعد .. زوجة رجل مهم .. احلام هند وكاميليا .. وكله افلامه في كوم وهند وكاميليا في كوم تاني على الاقل بالنسبة لي .. لو ابويا بيموت .. وهند وكاميليا بيتذاع في التليفزيون حشوف الفيلم الاول وبعدين اشوف حكاية ابويا .. هو نفس الخط اللي ماشي عليه محمد خان .. فئة المهمشين في المجتمع اللي محدش حاسس بيهم .. خادمتان " نجلاء فتحي وعايدة رياض " هند وكاميليا .. طحنتهم الظروف المجتمعية الظالمة وحرمتهم من اقل حقوقهم كبني ادمين .. لكن يظل الحلم هو الدافع والسبيل الى تحقيق الاهداف .. احلم ماشاء لك ان تحلم .. واذا فقدت القدرة على الحلم فاعلم انك انتهيت.
محمد خان في " ضربة شمس " كشف لنا تفسخ مجتمع ساده الفساد وتوغل فيه .. وفي " عودة مواطن " اجبرنا على التفكير بجدية .. نسافر نبحث عن لقمة عيش ام نبقى في بلدنا وننتزعها عنوة من ايادي القادرين على سرقة احلامنا وطموحاتنا .. وفي " خرج ولم يعد " .. دعانا بشياكة متناهية على الخروج بره الاطار الجامد المتجمد للفضاء الاوسع والاكثر رحابة .. نعود للجذور والارض فنستمد منها القوة والعزيمة فنكون اكثر جرأة وصلابة في المواجهة والتحدي.
محمد خان مصري اكتر مني ومنك .. ومنحه الجنسية شرف لمن يمنحها له اكثر من تشرّفه هو بها .. طيب ما محمد مرسي مصري ابا عن جد .. والمرشد بديع مصري .. والشاطر مصري والبلتاجي مصري وحجازي مصري وابو اسماعيل مصري " بس امه امريكية " .. ومحمد خان باكستاني .. بس بذمة ربنا وانا راضي ضميرك .. مين اللي يستحق انه يحمل الجنسية .. هو .. ولا اللي عاملين مصريين بالاسم فقط .. وفعلهم نجس وواطي وابن كلب .. محمد خان مش حيكسب حاجة لما ياخد الجنسية .. لكننا حنكسب كمصريين ان عندنا مخرج مصري بقيمة وقامة محمد خان .. امنحوه الجنسية وانتوا مغمضيين .. واسحبوها من ناس كتير جدا .. لحد دلوقتي مش عارفين قيمة يعني ايه تقول انا مصري.