أحمد عفيفي يكتب : السيسي .. رئيس رغم انفه!!

لو سألتني عن نفسي انا ورأيي المتواضع .. حاقولك ياريت يجي السيسي ويحكم البلد .. لأن فعلا مفيش غيره دلوقتي ينفع يقوم بالمهمة الصعبة دي .. حتقوللي حنرجع تاني لحكم العسكر ونعيده م الاول وجديد ؟ .. حاقولك أدي الله وادي حكمته .. حتقوللي بس هو صرح وقال مليون مرة انه مش ناوي يترشح .. وحارد عليك واقولك : هو فعلا مش حيرشح نفسه .
بس حتنزل ملايين حتحتاس في عدها ، وتطالبه بالترشح .. حتسألني : وهى مصر مفيهاش واحد ينفع رئيس غير السيسي ؟ .. واجيبك : فيها كتير .. بس مفيش واحد زي السيسي .. حتقوللي : خلاص يبقى اللي حصل انقلاب مش ثورة .. وارد عليك : لا .. هى ثورة .. والجيش حماها وأيدها .. ومن غيره ما كنتش ممكن تنجح ابدا .. واذا كنت مصمم انه انقلاب .. خلاص يبقى انقلاب .. اعتبره بقى انقلاب الشعب كله على حكم " وسخ " يستاهل ضرب الجزمة.
حتقوللي : ده الدستور اللي حطه مرسي بذات نفسه أعطى القوات المسلحة مزايا ما اخدهاش ايام عبد الناصر .. فليه الندالة دي ؟ .. حارد واقولك : ده صحيح .. ودي تُحسب للسيسي مش عليه .. لأنه بص لمصلحة البلد والشعب ، مش مصلحة قواته وجنوده .. وبعدين مفيش ندالة ولا حاجة .. ان كنت انت بتنيمّني بشوية امتيازات عشان ابقى في صفك - وانت اساسا ندل وابن كلب - فالندالة الحقيقية والوضاعة والخيانة اني امشي معاك وعلى هواك على حساب مصير امة.
حتقوللي الشعب المصري زي ما عمرو ابن العاص قال عنه .. وهم عبيد لمن غلب .. حارد عليك واقولك : فلتت من عمرو بن العاص المقولة دي .. واذا كانت صح كنا سبّحنا بحمد سي مرسي والإخوان بعد ما ركبوا الحكم ودلدلوا رجليهم .. حتقوللي : طيب ما انتم دلوقتي حتبوسوا ايد السيسي عشان يحكم وهو اللي غلب الإخوان وضربهم على قفاهم .. وارد عليك واقولك : ممكن جدا نبوس ايده صحيح ، بس مش عشان يحكمنا ويمسك البلد .. لكن لأنه راجل وابن راجل .. وبإيده العفّية دي حمى البلد من شوية حرامية ولاد كلب.
حتقوللي .. خلاص ان كان ولابد من حاكم عسكري .. خدوا عنان .. وارد واقولك : خدوه انتوا واشبعوا به .. عنان إيه وزفت إيه .. هو حد وصلّنا للي احنا وصلنا له غير عنان وطنطاوي؟ .. حتقوللي : أمرك عجيب .. هو طنطاوي وعنان " كخه " .. والسيسي هو اللي عسل .. ماهو كله بيلبس باريه وكاكي؟ .. حارد واقولك : ان كان نفسك في طنطاوي مثلا .. او عنان .. البسه انت .. واربط الرباط جامد .. بلا قرف .. السيسي يختلف اختلاف جذري .. طنطاوي وعنان جابوا الإخوان عشان يداروا " بلاويهم " السودا ومحدش يحاكمهم .. والسيسي ضرب الإخوان في مقتل وخلّاهم يغنوا ظلموه .. طنطاوي مهموش مصلحة البلد قصاد مصلحته هو الشخصية .. والسيسي قدم مصلحة وطنه فوق اى مصلحة تانية .. طنطاوي كان مرتعش وخايف من تهديد الإخوان بحرق البلد .. السيسي حرقهم هما .. لاهمه تهديد ولا ديالو .. اعلى مافي خيلكم اركبوه .. يا شوية بلطجية يا " عِرر" !
حتقوللي : وليه ما يكونش حمدين صباحي او عمرو موسى او احمد شفيق .. ماهم برضه شخصيات وطنية ومعروفة ولها تجربة سابقة ؟ .. حارد واقولك : اذا كان التلاتة بيقولولك : لو السيسي نزل ، كلنا حننسحب ونؤيده .. حتسألني : محبة يعني وعشق للسيسي ؟ .. حاقولك : لأ .. أمر واقع .. الناس عايزاه .. واى واحد حينزل جنبه .. يبقى ذنبه " على جنبه ".
حتقوللي : طيب افرض السيسي ركب دماغه ومرشحش نفسه؟ .. حارد واقولك : مش بمزاجه .. حتقوللي : كله بالخناق .. الا الرياسة .. بالاتفاق .. حاقولك : الكلام ده في الجواز .. وفي حاجات تانية " لا مؤاخذة " .. انما لحد مصلحة وطن .. كلمة الشعب على رقبة التخين.
حتقوللي : يعني م الأخر .. مفيش الا السيسي ؟ .. وارد واقولك : ايوه .. مفيش الا السيسي .. رضي أم أبى .. وحتبقى اول مرة تحصل في التاريخ .. الناس بتمّوت نفسها عشان الكرسي .. وملايين بتشيل السيسي رغم انفه .. عشان يقعد على الكرسي!
وهو ده الفرق .. اللي حريص ع الكرسي تخاف منه .. انما اللي الكرسي لا يعنيه من قريب او بعيد .. تطمن له .. وتحس ان اللي انت اخترته راجل .. " دكر " واسم على مسمى!