احمد عفيفي يكتب : شرشح .. يشرشح .. فهو شرشوح!!

رغم ان كتير من كلامه صح .. ورغم انه عنده حق في قرفه واستيائه من هذه المسخرة التي تحدث الآن ومنذ اعتصامي رابعة والنهضة .. إلا انه إنسان غير مسئول .. ولا يملك الحنكة واللياقة حين يتحدث عن الآخرين الذين ينتقدهم والمختلف معهم مهما علا شأنهم وارتفع .. كله عند مرتضى منصور ياخد بالجزمة!!


والأمر الذي يجب ان يدركه مرتضى منصور ويعيه جيدا انه ليس أبدا نجم فضائيات .. وان الذي يريد استضافته ، غرضه الوحيد انه يترك لضيفه العنان ليسب هذا ويغتاب هذا ويُضحك المشاهدين بكلماته وتعليقاته كأنه مثلا اللمبي .. لابد للمستشار مرتضى منصور ان ينتبه جيدا لهذا الفخ الذي أراه حريصا على الوقوع فيه " بمزاجه " ليستمر الجدل لأيام بعد حلقته .. ونشوف مين شتم مين .. ومين رد عليه ورفع قضية.


امبارح .. اخونا اللي اسمه احمد موسى اللي بيقدم " الشعب يريد " على قناة التحرير جاب عم مرتضى .. وسابه منه للكاميرا حوالي ساعتين يشتم في فهمي هويدي على مقال كتبه في الشروق " يا راجل عيب عليك وانت فوق السبعين .. يافهمي يا هويدي متخلنيش افتح الدفاتر القديمة .. احترم نفسك بقى واتلم بدل ما المك انا " .. وبعد هويدي قام داخل على ابراهيم المعلم " ياعم ابراهيم ياللي عايز تمسك النادي الاهلي .. انت نسيت انك كنت بتشيل لسوزان مبارك شنطتها " .. وبعد منه قام داخل على ايمن نور " عليا الطلاق هو هربان في لبنان وخايف يرجع ليتسجن .. ويقولك انه بيعمل عملية تجميل في صدره" .. وراح واخد في سكته بلال فضل " ياللي بتاخد ملايين في المسلسلات .. احنا مش عضاضين ياكلب " .. اى والله العظيم قال كده فعلا.


وراح بعد كده ماسك في عمك محمد البرادعي وفتح عليه ماسورة مجاري من " بقه " .. ويعف لساني ان اذكر ماقاله بقلة ادب منقطعة النظير .. اقلها " يا عميل امريكا .. ياللي ضيعّت العراق .. حطيت جزمة في بقك ومجبتش سيرة النووي اللي في اسرائيل .. احترم نفسك واستقيل يا بوب .. يا بتاع انجيلينا جولي وبوسة ع الخد ده والخد ده لا يزعل ويغير م الخد ده .. وعليا الطلاق من بيتي اللي حيدافع عن البرادعي تاني ماله عندي الا الضرب بالجزمة القديمة".


والمضحك او المبكي ان هذا الأبله اللي سايق الهبل ع الشيطنة اللي اسمه احمد موسى .. لو اختلف معاه مرتضى منصور ولا وقعوا في بعض .. فلن يتواني سي مرتضى لحظة ان يشرشح سي موسي ويمسح به البلاط .. والحقيقة اللي دايما تتوه في الزحمة ان فيه ناس لو فتحت معاها الدفاتر القديمة على طريقة مرتضى .. والله العظيم لترميها في السجن .. او على الاقل كل ما تشوفهم تتف عليهم .. عاملين النهارده ثورجية ومن الأحرار .. والبجاحة في عنيهم تغيظك .. وللأسف من ضمن هؤلاء السيد احمد موسى اللي عمل حركة اقل ما يقال عنها أنها قذرة ويستحق عليها على الأقل " قلمين على قفاه " عشان يتأدب بعد كده وهو بيتكلم عن الناس الكبار.


فمن يومين برضه كان مستضيف لواء شرطة وراح قرأ تصريح للبرادعي مترجم بالعربية عن حديث له في صحيفة أمريكية .. وفي الترجمة غير الدقيقة ان البرادعي معندوش مانع او اى مشكلة في الإفراج عن محمد مرسي .. وانه ضد فض اعتصام الإخوان في رابعة بالقوة .. وانه هو اللي عطل او اوقف خطة الداخلية في فض الاعتصام.


كلام ممكن نتناقش فيه وناخد وندي .. لانه مش رأى البرادعي بس .. لكن ان افعل مثلما فعل هذا المعتوه " الممثل درجة عاشرة " احمد موسي .. وامزق على الهواء الورقة التي قرأ منها التصريح والقي بها في الزبالة تعبيرا من جناب اللي خلفوه عن غضبه واستيائه مما قاله البرادعي .. فهذه قلة ادب ووقاحة وعدم تربية.


المسألة مش ناقصة قرود تتنطط .. واللي بيته من إزإز ميحدفش الناس بالطوب .. والوسخين زمان كتير ومعروفين بالاسم .. فبلاش قرف .. وكفاية ان داخل علينا عيد .. لا حاسين بفرحة ولا بهجة .. زي ما عدى رمضان كأنه مجاش السنة دي .. والسبب كلنا عارفينه.

ربنا يستر ويمر العيد من غير بلاوي سودا هنا او هناك .. مش ناقصين غم وهم .. كفاية علينا حكومة ضحّكت علينا طوب الأرض .. وفتحت البلد مراحيض عامة .. كل واحد مزنوق .. يجي يفك عندنا!!