مي كساب تكتب: نفسي أحس إن ليا ضهر

كان نفسي أكتب كلام حلو من قلبي.. كان نفسي أقول سنة جديدة سعيدة.. بس مش عارفة أقول إيه.. جوايا حاجات كتير.. مش عايزة أقول كلام كبير بس جوايا بركان وأحاسيس متلخبطة، صدقوني أنا مش متشائمة، ولا حزينة.. بالعكس.. السنة اللي فاتت حصلت لي حاجات حلوة كتير، وربنا إداني حاجات حلوة كتير، بس أنتوا عارفين بقي الإنسان طماع، بيبقي عايز كل حاجة والكمال لله وحده، بس أنا من حقي أحلم زي أي حد.. نفسي في مدينة فاضلة وناس صافية، ومصريين بجد.. نفسي نقف جنب بعض، ونحترم بعض، ونكبّر بعض، ونصفي لبعض، ونبطل نهدم بعض.. نفسي أحس إن ليا ضهر.. نفسي أقول ولاد بلدي ضهري وسندي.. نفسي أفتح الجرايد ما احسش إن الفنان عبارة عن جماد، ماعندوش لا دم ولا لحم ولا أهل.. نفسي نخاف من ربنا، ونحب ربنا.. نفسي ناخد حقنا، نفسي ما نبقاش زي القرع بنمد لبره.. نفسي نتعلم الدرس قبل ما نبقي احتياطي مش أساسي.. نفسي نفوق قبل ما ننام علي طول.. نفسي في حاجات كتير قوي.. الرضا والستر يارب.