غادة عادل تكتب: وأنا طفلة مفكرتش إني أطلع برة شارعنا.. وولادي نفسهم يسيبوا البلد كلها

علشان نتكلم عن المستقبل طبيعي جدا إننا نفكر الأول في اللي فات.. يعني لازم نرجع كام سنة لورا.. أنا عملت كده فعلا، واكتشفت أن طفولتي كانت مختلفة خالص عن أولادي، اللي كنت متصورة أنهم أكيد هيكونوا شبهي في كل حاجه.. طبعا دي كانت سذاجة مني!
أنا مثلا كنت طفلة مخلصة قوي لأحلامي، وكل حلم عندي لازم ياخد وقته وحقه.. يعني أنا مثلا عشت كام سنة وجوايا حلم إني أكون مدّرسة.. أخرج من بيتي كل يوم وفي إيدي شنطة زي بتاعة «الميس» اللي في الفصل عندنا، بعدها بوقت طويل، حلمت إني أكون مطربة مشهورة، وطبعا أغني أغاني عاطفية، ويكون ليا معجبين مستنيين الأغاني بتاعتي.. وقتها كنت لما أحكي لأخويا خالد عن حلمي ده، ألاقيه هو كمان له أحلامه «الكبيرة» و"المهمة» زي إن بابا يجيب له عربية كبيرة بتشتغل بالريموت كنترول! البنت اللي كانت بتحلم تبقي مدّرسة وبعدين مغنية، لف الزمن بيها وبقت ممثلة.. الناس تعرفها، وأم نفسها تعرف أولادها بيحلموا بإيه هما كمان.. حاولت أقعد مع أولادي، وأستدرجهم عشان أعرف كل واحد منهم بيفكر في إيه، لكني فشلت.. قلت الحل إني استفرد بكل واحد منهم، وأمارس سلطاتي عليه كأم وأعرف أحلامه إيه بالضبط.. بصراحة اتفاجئت جدا من أحلام أولادي.. لقيتها مختلفة تماما عن أحلامي وأحلام أخويا اللي كان تحقيقها صعب قوي بالنسبة لنا.. أنا مثلا غيرت أحلامي مرتين بس طول عمري كله، لكن كل مرة أقعد فيها مع أولادي ألاقي أحلامهم اتغيرت تماما، وفي وقت قليل جدا.. ده غير إن أحلامهم كلها تكنولوجيا ولعب وكمبيوترات، واكتشفت كمان إن علاقتهم ونظرتهم للغرب مش مجرد تقليد قصة شعر زي ما كنا بنعمل..لا دول بيفكروا إن كل حياتهم تكون هناك، ويسافروا ويسيبوا البلد أصلا، ده أنا لما كنت طفلة مفكرتش إني أبعد أو أطلع برة شارعنا، وماريو ابني عاوز يسافر هو وأصحابه ويسيبوا البلد كلها.. مريم بنتي هي كمان بالرغم من أنها شبهي في حاجات كتير زي حبها للناس و«الصحوبيات»، لكن أحلامها مختلفة عني خالص.. يعني مش عاوزه تبقي مدّرسة ولا ممثلة ولا مغنية، حتي بعد ما أغنية السبوع بتاعة فيلم «عيال حبيبة» انتشرت وعاشت علينا دور النجمة.. كل ده مفرقش معاها في أحلامها.
الاختلاف ده بيفرحني قوي، وبيخلني أحس أن أولادي واعيين وأحلامهم مناسبة لأيامهم، بس في نفس الوقت بيخليني خايفة عليهم وقلقانة علي مستقبلهم، وبيخليني أحاول أقرب منهم أكتر، وأعيش معاهم بكرة بتاعهم، وأنصحهم «نصيحة أم» وأحاول أوريهم قد إيه بلدهم جميلة، وأفهمهم إزاي يخلوها أحسن بدل ما يفكروا إنهم يسيبوها.. باحاول أرسم معاهم اللي جاي.. بس يارب يسمحوا لي أعمل كده.