محمود العادلي يكتب: قراقوش..و..المذبحة القضائية على الطريقة الأخوانية

يُحكي أنَّ ..أنَّ أيه ..أن قراقوش بعد أن تناول الفطار ...أتصل بأخوانه الأشرار ...... وسألهم : هل كتبتم اليوم أي قرار ....لكي أوقعه لكم ...و.... نحقق أحلامكم ....في الهيمنة على البلاد ....والتحكم في رقاب العباد ...رد الشاطر ( بعنجهية ) : أستنى علينا شوية ....فتساءل قراقوش : خيَّر ...هو لسة المرشد ماقررشي ...أنا هاقعد في الحكم ..وألا هامشي ...الشاطر : سيبك من الموضوع ده دلوقتي ...خلينا في المشاكل اللى مش عارفين نحلها ...والمصائب اللى مش عارفين نفلت منها .قراقوش : مصايب أيه ....يا شاطر بيه ..الشاطر : ما أنت عارف أهم مشاكل عندنا هي : الإعلام ....والجيش ...والشرطة ..والقضاء ... ده غير ...مشيخة الأزهر..قراقوش ( ببلاهة ) : وهنعمل أيه في المشاكل ديه ..؟!!.الشاطر : الجيش مايهمكشي منه ...أنا سربت معلومات للجرائد الأجنبية ....عشان تفضحه فضيحة عالمية .....وتخلق رأي عام عالمي .... ضده .....وضد قياداته .....ويبقى بقى يشوف ...أزاي هيقدر ينزل الشارع تاني .....وأزاي هيقدر يسيطر على البلاد.... وخللي الجماعة اللي عملوا للجيش... توكيلات يبلَّوها ويشربوا ميتها ..قراقوش : طيب والإعلام ....هنعمل معاه أيه ...الشاطر : أحنا نسلَّط علي الإعلام والإعلاميين .. الجماعة المحامين بتوعنا ...يهري الإعلاميين شكاوى ...وبلاغات ..نخليهم يلفوا حوالين أنفسهم ....ويطلعوا من تحقيق ..لمحاكمة ..ومن محاكمة لتحقيق .....كعب داير .....وبعدين أحنا نعمل نفسنا طيبيبن ...,نقول إن الحاكم بيتنازل عن الشكاوى والبلاغات المقدمة منه ....ونسيب المحامين بتوعنا هم اللى يتصدوا للإعلاميين ..عشان نشغلهم في قضاياهم ....ويسيبونا.....في حالنا .....عشان نمشي في موضوع التمكين ...والسيطرة والهيمنة على مفاصل البلاد ...قراقوش : وبالنسبة للشرطة هنعمل معاها أيه ؟الشاطر : الشرطة ديه هنفتتها ...وبالطول والعرض ..هنجيب دماغها الأرض ...قراقوش : يعني أيه بالطول والعرض ..؟الشاطر : بالطول ...هندخل ناس فيها من رجالتنا ....نعمل لهم تدريب كام شهر ..وندخلهم فيها ....أهم ينفعونا في الإنتخابات ...وكل الذي آت ....وكمان نشيل أي ضابط كبير أو صغير .....يكون مرّ على بيت أى واحد من الجماعة ....دون أن يسلم عليه ..ويبوس أيديه ...أو عمل مشكلة ..مع ( الحاج الشيخ المحامي ....المصري الأمريكاني ....الفتوة ...بالطريقة الحديثة ....فتوة الجماعة بالطريقة الشرعية الشبراوية ) ...وكمان نشيل الضابط اللى في الرتب الكبيرة ...وندخل بدلهم رجالاتنا ...والجماعة الملتحين ...نخليهم يشيلوا لحيتهم ...ونعطيهم مناصب مهمة في الشرطة ...قراقوش : طيب وبالعرض هتعمل في الشرطة ؟ الشاطر : بالعرض هتفتتها ...ونعمل شرطة لكل قطاع في البلاد ....شرطة للمحليات ..وشرطة للحلويات ...وشرطة للتسهيلات ...وشرطة للإنتخابات ...وهكذا ...قراقوش : كويس كده .الشاطر ( بعد أن شرب رشفة من كوب العرقسوس الذي أمامه ؛ أستطرد قائلاً ) : مش كده وبس ..أحنا هنعمل مليشيات على الطريقة اللبنانية ....مليشيات قانونية ....نعمل قوانين تسمح بالمليشيات الخاصة ...ونسلحهم بالقانون ...( ثم يضحك قمهقها ...أهه أهه أهه ويقول ) وسلم لي على الشرعية والقانونية ....والطعمية ..والملوخية ...على رأي الصحافة القطرية ..قراقوش : طيب القضاء اللى واقف في طريقنا زي العقلة في الزور ..هنعمل معاه أيه ؟الشاطر : هنصفيه ...تصفية اللى هيه ...هنعمل له قانون ...يخرَّج ..كام ألف من القضاة ...وندخل أتباعنا من الجماعة المحامين السَّكة ...اللى أنت عارفهم ....( اللى نص لبة ) ...قراقوش : بس دول محامين ...أجهل من أبي جهل ...دول أصلاً واخدين شهاداتهم القانونية ....بالغش ....وبالتقادم العشري ..الشاطر : يعني أيه تقادم عشري ؟قراقوش : يعني ...خدوها بالأقدمية ..وبالعشَّرة الطيبة عدة سنوات في كلياتهم .الشاطر : ماعلينا ...هما دول المخلصين ..اللى هنقولهم شمال ...يمين ....هينفذوا ..على طول ...وهما مبلمين ..قراقوش ( ضاحكا) : ده كمان نقولهم (ياسسسس ..شييي ..حا) ....يمشوا زي ما أحنا عايزين ....ما أنت شايف ...الجماعة اللى بنستوزرهم ....في وزارتنا .....واللى بنعينهم في محلياتنا ....بالإشارة ....يجيبوا أي قرار ...في شيكارة ...الشاطر : أما موضوع مشيخة الأزهر ..فعايز تكتيك كبير...قراقوش : هما رجالاتنا داخل الأزهر مش شاغلين كويس ...الشاطر : عندنا كام واحد موجودين ....وعندنا كام ملف ..كل شوية نعرضهم في إعلامنا ....عن طريق ببغاوات المشايخ والإعلاميين بتوعنا ....قراقوش : بمناسبة المشايخ ..الشيخ اللى عايز راجل ..سمعت أنه عايز يجاملنا جامد ..الشاطر : أزاي ؟قراقوش : أنت ما سمعتش أنه خللى أحد حكام الأقاليم في إجتماع ..وقال له أحنا ممكن نأدب أي واحد يفتح بوقه ...أحنا عندنا رجالتنا .الشاطر : هي ديه الرجالة ولا ..بلاش .قراقوش : قصدك هي ديه الشيوخ ولا بلاش ..

******

وهنا يفتح قراقوش التليفزيون ....فيجد المذيع ...يقول :((هذا وقد أكدت الحاجة ( التي لا تنام ) مساعدة قراقوش للشئون السياسية: إن بداية الزج بالمؤسسة القضائية في السياسة هي لحظة حل المجلس التشريعي )) ( تصفيق حاد للجهل القانوني والسياسي معا ) ....ثم دخلت ( الحاجة التي لاتنام ) في نوبة غضب أنقلبت إلى تشنج وعصبية شديدة .. وأخذت تصرخ : أزاي يا جماعة شوية قضاة يحلوا المجلس التشريعي بجرة قلم ....ده كلام ...لابد من تطهير القضاء ..وياريت نلغيه خالص .كما قال الحاج ( العاكف في مسكنه والساكن في ماضيه العنيف ) : إن القضاء لابد من تطهيره ..ولن نرض بأقل من إستبعاد 3500 مستشاراً وقاضياً ...وأعلن الحاج ( المحسوب ) على كل الموائد سواء أكانت معارضة أو مؤيدة أو ( وسط بين الفكر المتطرف جدا ..والفكر المتطرف بس )– المهم أن هذه الموائد تقربه من أضواء السلطة وبهاريز الأضواء- ...أعلن ضرورة التظاهر لتطهير القضاء ....للقضاء على القضاء...بالقضاء .....وعندما سئل لماذا تطالب بذلك قال : ده تار بايت أصلاً أنا كنت عايز ابقى قاضي ...ومعرفتش ....عشان تاريخي في السجون .. اللى جعلتني مجنون ....بتعاليم الأخوان ...وده اللى منعني من العمل بالقضاء . ومن جهة أخرى ...أعلن بعض النواب في المجلس التشريعي الملاكي ( الأهلي ) ....أن المجلس بصدد إعداد قانون تحت عنوان ( قانون الإحلال والتجديد ...أو قانون المذبحة القضائية على الطريقة الأخوانية ..) ....وبمقتضاه يتم إخراج كبار القضاة على المعاش...ويدخل القضاء في غرفة ( الإنعاش ) ..وابقى قابلني ( إن عاش) .......وندَّخل بدلهم الحاج عبده النقاش .....اللى أخذ ليسانس الحقوق بالتدليس والغش ...ولايعرف الفرق بين الجبنة القريش ..والمش ...وكمان دخل الشاويش صبحي ....اللى خد الليسانس ....ومعلوماته في القانون أي كلام يا عبد السلام ...وهي معلومات لاتزيد عن معلومات الحاج عبده البقال عن ( الفيمتو ثانية ) .... حيث يعتقد أنها نوع جديد من العيش ( الفينو )....الذي يؤكل في ( ثانية ) ... وهنا تظهر سيدة – على شاشة التليفزيون – تصرخ قائلة :

((الله يخرب بيتك ياقراقوش...أنت وجماعتك ...واللى جابوك حاكم علينا ...أنتم عاملين تهدوا في البلد ..من كل حتة .....شوية تهاجموا الجيش ..وشوية تهاجموا المخابرات ...وشوية تهاجموا.. القضا......ربنا يقضي عليكم بدري ....ويخلصنا منكم على خير .....يا ناس يامفترية ... ياللى متعرفوش ربنا .....متعرفوش إلا مصلحتكم ....ربنا يخرب بيتكم ))