أحمد عفيفي يكتب : سؤال عقدة .. مش لاقي له إجابة!!!

فاجأني ابني عمرو وهو صيدلي ومعي هنا في الكويت واحنا الاتنين بنتفرج على ابراهيم عيسى في برنامجه الأهم " هنا القاهرة " .. فاجأني بسؤال " ابن كلب عقدة " .. وكان ابراهيم عيسى يتحدث بوضوح كعادته دائما وب اللزمة التي لا تفارقه ابدا

" عشان بس المسائل تبقى واضحة " .. كان يتحدث عن 25 يناير اللي جاى وقال ضاحكا : اذا انت منزلتلوش هو حيطلع لك .. فانزل احسن .. محدش ضامن لو هو اللي طلع لك وانت مرضتش تنزل له ممكن يعمل فيك ايه؟


لكن ابراهيم عيسى نفسه معندوش اجابة واضحة .. " ومعذور " على اللي ممكن يحصل في 25 يناير .. كل الاحتمالات مفتوحة وواردة .. ممكن جدا تبقى مجرد وقفة احتجاجية للساعة 7 وبعد كده كل واحد يروح لحال سبيله .. وممكن جدا يحصل العكس .. الناس ترفع مطالبها " ويا سبحان الله .. هى هى نفس مطالب الثورة في ال 18 يوم .. كأنك يا بو زيد لا اتنيلت رحت ولا اتهببت جيت " .. ممكن الناس تصمم متسبش الميدان الا بعد حزمة مطالب حيوية .. إقالة الحكومة القنديلية المقندلة بستين نيلة .. الغاء الدستور الغرياني .. " الخازوق المغري اللي حنلبسه كلنا " .. حل مجلس الشورى اللي " موافق دوغري " على قرارات المرشد والشاطر ثم مرسي .. " وترتيب الأسماء مقصود " .. إعادة محاكمات قتلة الثوار بأى طريقة تجيب حق الشهداء ووقف مهزلة مسلسل البراءة للجميع .. إلى جانب طبعا العيش والحرية والعدالة الاجتماعية اللي مفيش حاجة واحدة منها اتحقق .. بل بالعكس بقت انيل من الأول بكتير .


طيب تعالوا نتخيل السيناريو المتوقع لهذا اليوم الأهم في تاريخ مصر كما اتمنى ان يكون .. الثوار يرفعون مطالبهم التي ذكرتها .. قام مرسي " مدّيها الطرشة " وقال زي صاحبنا خليهم يتسلوا ويفكوا عن نفسهم شوية .. قام الثوار اللي عمرهم ماكانوا بيتسلوا ابدا رافعين الشعار والمطلب القنبلة : يسقط يسقط محمد مرسي .. ارحل ارحل مش عايزينك .. ارحل يعني امشي يمكن مبيفهمشي .. والشعب يريد اسقاط النظام .. ايه بقى الي ممكن يحصل لو ده حصل ؟

معقولة نشوف دم تاني في الميدان وخراطيم مياه وخراطيش ورصاص حي ونبحث عن الطرف التالت ؟ .. معقولة نلاقي عماد اديب نط في وشنا تاني وبيقول : عندي معلومات أكيدة بأجندات أجنبية لخراب البلد ؟ .. معقولة نلاقي سيد او " سيء علي " جايب واحدة بنت كلب متأجرة وبتقول انها اتدربت في قبرص وقبضت ملايين عشان تقلب نظام الحكم؟ .. معقولة نلاقي عمرو اديب مثلا لو مرسي أقال الحكومة يقوم قايم يصرخ ويقول الله اكبر الله اكبر .. كده الثورة نجحت.. احنا عايزين ايه تاني ..؟


طيب .. الناس في الميدان مش ناوية تمشي واذا مرسي مرضيش يمشي بالذوق يبقى لازم يمشي بالعافية .. لا وايه .. لازم يتحاكم كمان .. والداخلية وحسب قانون المظاهرات الجديد بتاع مكي قامت استعملت العنف بالجامد أوي ، فمات يجي 50 واحد .. معتمدة في ذلك على تصريح هشام افندي قنديل : سنضرب بيد من حديد اذا خرجت الأمور عن السيطرة .. قامت الناس ثارت اكتر .. وليلة اللي خلفوا اهلك يا نظام وسخ سودا .. زمان كنا لمّا نشوف دم .. نجري .. دلوقتي لمّا بنشوف دم " بنغلي " .. وزادت اوي : ارحل ارحل مش عايزينك.


اضطر الجيش انه ينزل .. ممكن يعمل ايه؟ .. حيحمي الشعب ولا حيحمي النظام ؟ .. ولو حمى النظام .. فهل ممكن يقتل الشعب زي ماحصل وبيحصل في سورية ؟ .. خلينا في الافتراض التاني - وان كان مستبعد جدا - .. لكن لو حصل .. حنخاف ونكش والقتل بقى على الملأ بالمدافع والدبابات؟ .. ولا كل واحد حيموت .. وراه الف على الاقل حيحزنوا عليه وينزلوا الميدان عشان يجيبوا حقه ؟ .. معنى كده ان فعلا ومش هزار نلاقي 50 مليون متظاهر وثائر مالين مصر كلها من شرقها لغربها ومن شمالها لجنوبها .. وفي الاخر .. بعد 18 يوم .. بعد شهر بعد سنة لازم الشعب يفرض كلمته وإرادته وسلطته وسطوته .. ونلاقي مرسي فعلا مشي ونظامه سقط والإخوان غاروا في ستين داهية.


وارجع لسؤال ابني عمرو اللي لسه مقلتوش .. واللي فعلا سؤال ابن كلب عقدة : مين حيجي مكان مرسي لو مرسي مشي ؟ .. هو ده السؤال اللي عمرو رماه في وشي وراسه والف جزمة لازم يسمع مني إجابة عليه كأني مثلا المحرّك الرئيس للثورة التانية .. وكل خطوة عندي محسوبة بالورقة والقلم .. فقلت له لمجرد إشغاله حتى افكر في إجابة قاطعة للسؤال العقدة : دي لو نجحت حيكون أحسن مافيها ان ملهاش قائد .. دي ثورة شعب.


فرد بوعيه الشبابي الأفضل مني مليون مرة : لأ .. دي كانت اكبر غلطة يا سي بابا .. والعذر الوحيد للي قاموا بيها انهم خرجوا ليها بعفوية من غير مايفكروا ويبحثوا عن إجابة السؤال .. لو ربنا كرمنا ونجحنا .. مين اللي حنختاره عشان يحكمنا؟ .. ثم أكمل .. ده با فتراض ان الثورة نجحت .. انما قل لي ازاى النظام يسقط من غير قوة عسكرية سواء جيش او شرطة تقف مع الشعب وتجبره على الرحيل؟ .. هل ده ممكن يحصل وقيادات الجيش والشرطة " متأخونة " ؟ .. ولا عايز تقنعني ان محمد مرسي والإخوان عندهم دم وبيحسوا ، ولمّا يتأكدوا ان الناس مش عايزاهم .. فيلموا عزالهم ويتوكلوا على الله ويمشوا ؟


قلت له : أكيد الناس اللي حتنزل عندها تصور كامل للي حيحصل .. لو كذا يبقى كذا .. ولو كذا يبقى كذا .. يعني أكيد استفادوا من التجربة الأولى اللي كانت لها ولا شك أخطاء كثيرة بسبب قلة الخبرة السياسية والتجربة الميدانية


فأعاد عليا السؤال : يابابا سؤالي واضح .. لو مشي مرسي .. مين حيجي مكانه؟
فقلت له : لولا اني عارفك وعارف موقفك الثوري لقلت انك مش عايز مرسي يمشي
فرد : يمشي في ستين الف سلامة والباب يفوت جمل .. بس مين الجاهز عشان الأمور تتلم وبسرعة .. ونبدأ بقى نبني بجد
... معرفتش اجاوب فرميت السؤال نفسه في وجهه هو : طيب انت شايف إيه؟


فرد : ما انا لو كنت عارف كنت حسألك ليه .. ثم قال : انا حا اريحك .. زي ابراهيم عيسى ما بيقول : لو جبت مين وسألته ايه اللي ممكن يحصل في 25 يناير 2013 مش حيعرف يجاوب .. يمكن الشباب يفاجئونا بحاجات مكناش نعرفها .. يمكن - والكلام لعمرو ابني - يكونوا فعلا استفادوا من الثورة الأولى اللي وصلتنا للنقطة صفر .. عموما وده اللي اقدر اقوله لك .. الشعب المصري ده شعب عبقري .. ميتغلبش .. والاهم من ده كله إرادة ربنا فوق كل شيء .. زي ما خطّط للأولى وباركها .. برضه حيقف معانا في التانية ويباركها .. عشان تفضل دايما محروسة.


فقلت له : ده انت كده شايفها ثورة تانية بجد؟
فرد قاطعا : وانت شايف حل تاني؟