سمان مشوي وزلابية في عزومة 21 رمضان

أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ما تتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور..
على سفرة النهارده هيكون موجود مشروب الكركديه الساقع وسلطة الفجل الأحمر وشوربة الفاصوليا البيضاء بالخضار وسمان مشوي بالخضار وزلابية وعلى السحور هنقدّم لك فول بالجبنة الشيدر والبطاطس..

كركديه
كركديه
المقادير:
كوب ورق كركديه
كوب سكر
4 كوب ميه
الطريقة:
ضيفي الميّه والسكر على الكركديه، وحُطّيه يغلي على النار، وبعد كده صفّي العصير وحُطّيه في الثلاجة يبرد، وممكن تضيفي له سكر لو حسّيتي إن طعمه محتاج، وبعد كده قدّميه لضيوفك.

سلطة الفجل الأحمر
سلطة الفجل الأحمر
المقادير:
5 ثمرات فجل أحمر
2 ملعقة زيت زيتون
1⁄4 ملعقة صغيرة ملح
2 ملعقة صغيرة خل
ملعقة ثوم مفروم
2 ثمرة بصل
الطريقة:
1- قطّعي الفجل والبصل شرايح رفيعة، واخلطي الثوم والملح والخل مع بعض في طبق.
2- رصّي الفجل والبصل في طبق التقديم وضيفي عليهم الخليط اللي حضّرتيه، واستمتعي بسلطة صحية وطعم رائع في أقل من 10 دقايق.

شوربة الفاصوليا البيضاء بالخضار
شوربة الفاصوليا البيضاء بالخضار
المقادير:
1⁄21 كوب فاصوليا بيضاء
2 ملعقة صغيرة صلصة
1⁄4 ملعقة صغيرة بهارات
1⁄4 كوب بقدونس مفروم
كوب طماطم مفرومة
3 عيدان كرفس
4 كوب شوربة
فص ثوم كبير
4 كوب ميه
2 ثمرة جزر
رشة سكر
ملح وفلفل
بصلة
الطريقة:
1- انقعي الفاصوليا في ميه لمدة 8 ساعات أو طول الليل، وبعدين اشطفيها وصفّيها.
2- حطّي الميه والشوربة والطماطم وصلصة الطماطم والبهارات في حلة على النار، لغاية ما يغلوا.
3- بعد كده ضيفي عليهم الفاصوليا، والجزر، والكرفس، والبصل، والبقدونس، والثوم، والسكر، وسيبيهم على نار عالية لحدّ ما الخليط يغلي، وبعد كده قلّلي درجة الحرارة، وسيبيهم مع بعض على نار هادية لحد ما الفاصوليا تستوي.
4- تبّلي الشوربة بالملح والفلفل وزيّنيها بالبقدونس، وقدّميها.

سمان مشوي بالخضار
سمان مشوي بالخضار
المقادير:
4 طيور سمان
1⁄2 كوب عصير ليمون
كوب بطاطس مقطّعة مكعبات
كوب طماطم مقطّعة مكعبات
كوب فلفل رومي مقطّع شرائح
كوب جزر مقطّع مكعبات
كوب بصل مقطّع شرائح
كمون وروزماري
4 فص ثوم مقطع
ملح وفلفل أسود
الطريقة:
1- تبّلي السمان بالملح والفلفل الأسود والكمون والروزماري وعصير الليمون، وسيبيهم في التتبيلة لمدة يوم كامل.
2- رصّي الخضراوات المتقطعة في صينية وحُطّي عليها السمان، وبعد كده غطي الصينية بورق فويل ودخّليها الفرن لمدة 50 : 60 دقيقة، بس شيلي الورق من عليها في آخر عشر دقايق علشان يحمرّ، وبعد كده طلّعيه واغرفيه في طبق التقديم وزيّنيه بالبقدونس.

زلابية
زلابية
المقادير:
2 كوب دقيق
11⁄4 كوب ميه
ملعقة كبيرة نشا
ملعقة صغيرة خميرة فورية
ملعقة صغيرة سكر
ذرة ملح
فانيليا
زيت للقلي
لتحضير الشربات:
2 كوب سكر
كوب ميه
عصير ليمونة
فانيليا

الطريقة:
1- اخلطي الدقيق مع الخميرة والملح والنشا والسكر، وضيفي عليهم الميه تدريجيا مع العجن المستمر، وبعد كده غطّيها وسيبيها لمدة ساعتين أو تلاتة في مكان دافي علشان تتخمرّ، بس راعي إنك تقلّبي العجينة بعد مرور ساعة بملعقة بلاستيك، وبعد كده غطّي العجينة مرة تانية وسيبيها تكمّل باقي عملية التخمير.
2- بعد كده خدي ملعقة صغيرة من العجينة دي واقليها في الزيت، وكرّري الموضوع حسب الكمية اللي محتاجلها.
3- شيلي لقمة القاضي من الزيت، وحطّيها وهي سخنة في الشربات البارد، وبعد كده شيليها منه، وحطّيها في مصفى علشان تتخلص من الشربات الزيادة، وبعد كده رصّيها في طبق التقديم.

لتحضير الشربات:
اخلطي السكر مع الميه وعصير الليمون وحطّيهم على نار عالية لغاية ما يغلوا، وبعد كده قللي درجة الحرارة وسيبيهم على نار هادية لغاية ما الشربات يعقد، وبعد كده ضيفي عليه الفانيليا، وسيبيه على جنب لغاية ما يبرد.

طاجن الفول بالجبنة الشيدر والبطاطس
للسحور.. طاجن الفول بالجبنة الشيدر والبطاطس
المقادير:
2 كوب فول مدمس
2 ثمرة بطاطس مسلوقة
كوب جبنة شيدر مبشورة
بقدونس للتزيين
ملح
الطريقة:
1- اضربي الفول في الخلاط، وبعد كده حطّيه في الطاجن، واعملي فيه فتحة من النص.
2- اخلطى البطاطس المهروسة مع الجبنة الشيدر وحُطّيهم فى الفتحة اللي في طاجن الفول.
3- رشّى شوية جبنة على الفتحة وحُطّي صينية الفول في الفرن لمدة خمس دقايق، لغاية ما تلاقي الجبنة ساحت، وبعد كده زيّنيه بالبقدونس، وقدّميه.
وبكده خلصت عزومة النهارده..
مستنيين تجرّبي وتقولي لنا إيه رأيك..
واستنينا بكره إن شاء الله مع عزومة جديدة..
نتمنى لكم صوما مقبولا وإفطارا شهيا بمشيئة الله..
سلااام،،،