أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ما تتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور.. على سفرة النهارده هيكون موجود الخشاف على الطريقة السورية وسلطة البنجر بالزبادي، وشوربة البصل بالجبنة، والفرموزا باللحمة المفرومة، وجيلي بقطع الفراولة، وعلى السحور هنقدّم لك كرات البطاطس الهندية.
الخشاف على الطريقة السورية الخشاف على الطريقة السورية المقادير: 10 ثمرة بلح 1⁄2 كوب شرائح أناناس 3 ملعقة كبيرة قشطة 8 كوب ماء مغلي 10 ثمرة مشمشية 1⁄4 كوب زبيب 1⁄4 كوب فستق 1⁄2 كوب سكر 10 ثمرة قراصيا 1⁄4 كوب جوز 1⁄4 كوب لوز ثمرة تفاح ثمرة موز الطريقة: 1- اسلقي اللوز والفستق المقشر مع السكر، وبعد كده انقعيهم في الميه اللي سلقتيهم فيها. 2- ضيفي الزبيب والجوز والبلح والقراصيا والمشمشية للوز والفستق المنقوع، وسيبيهم لمدة من 3 ل4 ساعات. 3- قطّعي الموز والتفاح والأناناس قطع صغيرة وضيفيهم على الخشاف. 4- حُطّي الخشاف في التلاجة وبعد كده طلّعيه وزيّنيه بالقشطة، وقدّميه بارد لضيوفك.
سلطة البنجر بالزبادي سلطة البنجر بالزبادي سلطة البنجر من السلطات المفيدة جدا، وهتكون مناسبة لجو رمضان بعد يوم طويل من الصيام لأنها بتمد الجسم بالعديد من الفيتامينات والعناصر الغذائية المفيدة للجسم. المقادير: 8 ثمرة بنجر 11⁄2 كوب زبادي 2 قطعة جبنة ريكفورد أو جبنة قريش بقدونس للتزيين الطريقة: 1- اغسلي البنجر واسلقيه لحد ما يستوي وبعد كده شيلي القشرة من عليه واشطفيه بميه باردة، وقطّعيه بالطريقة اللي تعجبك، ورصّيه في طبق التقديم. 2- اخلطي الزبادي مع الجبنة الريكفورد أو القريش، وبعد كده ضيفي الخليط على قطع البنجر، وفي الآخر زيّني الطبق بالبقدونس المفروم. وبالهنا والشفا.
شوربة البصل بالجبنة شوربة البصل بالجبنة المقادير: 2 ملعقة كبيرة زبدة 2 ملعقة كبيرة زيت زيتون 2 ثمرة بصل كبيرة مفرومة كوب جبنة موتزاريلا ملعقة كبيرة دقيق 3 كوب شوربة ملح وفلفل كوب لبن عيش توست محمص الطريقة: 1- سخّني الزبدة والزيت في طاسة على النار، وبعد كده شوّحي فيهم البصل لحد ما يبقى لونه دهبي، وبعد كده ضيفي عليهم الدقيق، وقلّبيهم كويس على النار لغاية ما الدقيق يبقى لونه دهبي. 2- ضيفي اللبن والشوربة وقلّبي الخليط كويس وتبّليه بالملح والفلفل، وسيبيهم لغاية ما الخليط يغلي على النار. 3- قللي درجة الحرارة شوية، وسيبي الشوربة على النار لمدة 10 دقائق، وبعد كده ارفعيها وحطّيها في طاجن ورشّي على الوش الجبنة الموتزاريلا، ودخّلي الطاجن في فرن ساخن لمدة 5 دقائق، وبعد كده طلّعيها وقدّميها.
الفرموزا باللحمة المفرومة الفرموزا باللحمة المفرومة الطبق الرئيسي النهارده هو الفرموزا باللحمة المفرومة، وهي معجنات سعودية طعمها لذيذ وطريقتها سهلة وبسيطة. مقادير العجينة: 4 كوب دقيق 1⁄2 ملعقة كبيرة خميرة فورية 1⁄2 كوب زبدة سايحة ملعقة صغيرة ملح 2 بيضة مخفوقة مقادير الحشو: 1⁄2 كيلو لحمة مفرومة ثمرة طماطم مقطّعة قطع صغيرة 2 ثمرة صغيرة بصل مفروم ملعقة كبيرة زبدة ملح وفلفل للتزيين: بيضة مخفوقة مع ملح وفلفل حبة البركة الطريقة: 1- اخلطي الدقيق مع الملح، وبعد كده اعجنيه مع السمنة والبيض المخفوق، لغاية ما تتكون عجينة متماسكة. 2- دوّبي الخميرة في ربع كوب ميه دافية وسيبيها لغاية ما حجمها يزيد، وبعد كده ضيفيها على العجينة واعجنيها كويس مرة تانية، وسيبيها في مكان دافي لمدة نص ساعة تقريبا لغاية ما العجينة تخمر. 3- لتحضير الحشو؛ شوّحي البصل مع الزبدة على النار وبعد كده ضيفي عليه الطماطم وقلّبيهم مع بعض شوية لغاية ما الطماطم تتسبّك، وبعد كده ضيفي عليهم اللحمة المفرومة، وقلّبيهم مع بعض وسيبيها على نار متوسطة لغاية ما اللحمة تنزل الميه اللي فيها، وبعد كده تبّليها بالملح والفلفل والبهارات، وسيبيها لغاية ما تستوي، وارفعيها من على النار. 3- بعد ما العجينة تخمر، قطّعيها دواير صغيرة، وافردي كل قطعة بالنشابة، وبعد كده ضيفي على كل قطعة ملعقة صغيرة من الحشو، وبعدين طبّقي كل أطراف العجينة على الحشو على شكل مستطيل. 4- رصّي الفرموزا في صينية مدهونة بالسمنة، بحيث تكون أطراف العجينة لأسفل، وادهني الوش بالبيضة المخفوقة وزيّنيها بحبة البركة، وبعد كده دخّلي الصينية في الفرن لحد ما قطع الفرموزا وشها يحمرّ، ورصّيها في طبق التقديم، وزيّنيها بشرائح الطماطم.. وبالهنا والشفا.
جيلي بقطع الفراولة جيلي بقطع الفراولة المقادير: 1⁄2 كيلو فراولة 3 باكت جيلي بودرة 4 كوب ماء ساخن 1⁄2 كوب سكر الطريقة: 1- دوّبي الجيلي في 3 أكواب ميه سخنة على النار، وبعد كده ضيفي عليهم السكر وقلّبيهم مع بعض لحد ما يدوب. 2- قطّعي الفراولة قطع صغيرة وحُطّيها على الجيلي. 3- صُبّي الجيلي في كاسات التقديم وزينيه بقطع الفراولة، وحُطّيه في التلاجة، ولما يجمد قدّميه وممكن تزينيه بالكريم شانتيه.
كرات البطاطس الهندية للسحور.. كرات البطاطس الهندية النهارده هنقول لك إزاي تعملي كرات البطاطس الهندية واللي ممكن تقدّميها على السحور. المقادير: 4 ثمرة بطاطس مسلوقة ومهروسة قرن فلفل أخضر (بارد أو حامي) مفروم 1⁄4 كوب كزبرة خضراء مفرومة 1⁄4 كوب نعناع أخضر مفروم ملعقة صغيرة بيكينج بودر ملعقة صغيرة كمون كوب بقسماط ملح وفلفل زيت للتحمير الطريقة: 1- حُطّي البطاطس المهروسة في طبق واسع وضيفي عليها الملح والفلفل والكمون والنعناع والكزبرة والبيكينج باودر، وقلّبيهم كويس جدا مع بعض. 2- شكّلي خليط البطاطس على هيئة كرات حجمها متوسط، وغطّيها بالبقسماط كويس، وبعدين اقليها في الزيت وقدّميها سخنة.
وبكده خلصت عزومة النهارده.. مستنيين تجرّبي وتقولي لنا إيه رأيك.. واستنينا بكره إن شاء الله مع عزومة جديدة.. نتمنى لكم صوما مقبولا وإفطارا شهيا بمشيئة الله.. سلااام،،،