أنا بحب واحد من حوالي سنتين، ووقفنا جنب بعض كتير لحد الحمد لله ما جه اتقدم لي، والموضوع واقف على أنهم يسألوا علينا وإحنا نسأل عليهم.. المشكلة بقى إن بابا وماما منفصلين من حوالي 11 سنة، ومن ساعتها وإحنا مانعرفش حاجة عن بابا. بس جه أهل خطيبي عايزين يعرفوا هو فين، أنا لما رحت سألت في المكان اللي كنا عايشين فيه أيام زمان سمعت كلام كتير وحش عن بابا.. أنا خايفة أوي إن لو خطيبي راح سأل زي أنا ما سألت يعرف الكلام ده والموضوع يبوظ. ممكن تقولوا لي لو بيحبك هيسامح، وممكن كمان تقولوا إن حقه يعرف.. أنا ماقولتش حاجة في ده، بس أنا برضه مش ذنبي إن أبويا كده، وكمان مش هو اللي رباني، يعني أنا ماليش أي علاقة بيه.. ليه أتاخد بذنبه بقى! أنا دلوقتي مش عايزة أدي له العنوان القديم، وفي نفس الوقت مش قادرة أقول سبب مقنع.. أنا بجد مش عايزة أخسره، والموضوع واقف على كده..