فراخ بالمستردة على "سفرة دايمة"

أعدّها لكم: نيرة أحمد
النهارده هنعمل مع بعض الفراخ بصوص المستردة، طريقة جديدة وبسيطة، وممكن تقدّمي معاها رز أبيض.
فراخ بالمستردة
المقادير:
8 أوراك فراخ
1⁄2 كوب مستردة
ملعقة صغيرة فلفل أسود
1⁄2 ملعقة صغيرة بابريكا
بصلة مقطّعة حلقات
4 فص ثوم مفروم
1⁄4 كوب سكر بني
ملعقة صغيرة ملح
1⁄4 كوب خل
زيت نباتي
شطة
الطريقة:
1- اعملي فتحتين بالطول في كل ورك بالسكينة، وبعدين حطّيهم في كيس بلاستيك وسيبيهم على جنب، وبعدين امزجي المستردة والسكر البني والخل والبابريكا والملح والفلفل الأسود والشطة والثوم مع بعض كويس بمضرب اليد، وبعد كده خدي الخليط وحطّيه في كيس الفراخ، وحركي الكيس لغاية ما الخليط يغطي كل الفراخ.
2- دخلي كيس الفراخ في الثلاجة لمدة 4 ساعات (أو طول الليل)، وبعدين هاتي صينية متغطية بالفويل وادهنيها بالزيت، ورصّي عليها حلقات البصل، وبعدين طلعي الفراخ من الثلاجة ورصّيهم في الصينية، وبعد كده رشي عليهم نسبة بسيطة من الملح والشطة.
3- دخلي الصينية فرن درجة حرارته 230 درجة مئوية لمدة من 35 إلى 45 دقيقة، وبعدين خرّجي الفراخ من الفرن، وافصليهم عن الصوص الموجود في الصينية، وبعد كده حطي الصوص على النار لحد ما يغلي، وبعدين شيليه من على النار وضيفيه على أوراك الفراخ، وقدّميها.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،