فراخ مقرمشة في الفرن على "سفرة دايمة"

قدّمي لأسرتك طبق لذيذ من الفراخ المقرمشة بطريقة سهلة وصحية..
فراخ مقرمشة في الفرن
المقادير:
فرخة كيلو ونص مقطّعة 8 قطع
1⁄4 كوب جبنة بارميزان أو جبنة رومي مبشورة
كوب لبن رايب أو زبادي مخفف بالمية
3 ملعقة كبيرة خل بلسميك أو عادي
ملعقة صغيرة كزبرة جافة مطحونة
ملعقة كبيرة زنجبيل طازج مفروم
11⁄2 ملعقة صغيرة أوريجانو
1⁄2 ملعقة صغيرة فلفل أسود
11⁄2 ملعقة صغيرة ريحان
11⁄2 ملعقة صغيرة ملح
3 كوب كورن فليكس
ملعقة صغيرة بابريكا
1⁄2 كوب زبدة مذابة
بصلة صغيرة مفرومة
ملعقة صغيرة شطة
4 فص ثوم مفروم
1⁄2 كوب دقيق
الطريقة:
1- اخلطي الشطة والبابريكا والبصل والريحان والأوريجانو والكزبرة والملح والفلفل الأسود مع بعض، وقسميهم 3 أجزاء.
2- اخلطي الزنجبيل مع الثوم والخل واللبن الرايب في طبق، ولو ماعندكيش لبن رايب ممكن تجيبي زبادي وخففيه بشوية ميه، وضيفي عليهم بعد كده جزء من خليط البهارات وقلّبيهم كويس مع بعض، وانقعي فيهم قطع الفراخ وسيبيها لمدة يوم كامل علشان تتشرّب التتبيلة كويس، ولو مستعجلة ما تسيبيهاش أقل من ساعة.
3- هاتي طبقين، اخلطي في الطبق الأول الدقيق مع الجبنة وجزء من خليط البهارات، وحطّي في الطبق التاني الزبدة وقلّبي معاها آخر جزء من البهارات.
4- كسّري الكورن فليكس بإيدك مش في الخلاط، علشان يبقى خشن والفراخ تطلع مقرمشة زي ما إحنا عايزينها.
5- غلّفي كل قطعة فراخ بخليط الدقيق والجبنة وبعد كده مرّريها في الزبدة وبعدين في طبق الكورن فليكس واضغطي عليها كويس علشان يمسك فيها.
6- افردي في الصينية ورق فويل علشان تسهّل عليكي تنضّيفها، وبعد كده رصّي فيها قطع الفراخ ودخّليها الفرن على درجة حرارة 180 لمدة ساعة أو لغاية ما الفراخ تستوي.
7- قدّمي الفراخ في طبق التقديم مع صوص الكاتشب أو المايونيز، وممكن تقدّمي معاها سلطة الكول سلو اللذيذة.. وبالهنا والشفا.
استنونا كل يوم مع وصفات جديدة..
سلام،،،