كنت عاوزة أسألكم عن الزوج اللي بيدور طول الوقت على ست تانية في حياته، عايز يتجوزها جواز متعة عرفي، وكمان تشاركه المسئوليات المادية، رغم إنه بيحب مراته ومابيرفضلهاش طلب، وعنده منها 3 أولاد، ومراته بتلاحظ خياناته المتعددة دي.. فمرة تفوّت ومرة تتخانق ومرة تطلب الطلاق، وهو يقول لها جوازي بيكي جواز مسيحيين، تقول له يعني تطلقني لأ إنما تتجوز عليّ آه؟! يقول لها أيوه علشان العيال اللي بيننا هنعمل فيهم إيه؟! يبقى تبرروا اللي بيعمله ده بإيه؟ يعني لا هو محروم من زوجة كويسة، ولا هو بيكره مراته أو حتى مابيحبهاش، ولا عنده قدرة مادية على الزواج التاني.. تبرروا اللي بيعمله ده بإيه؟ ممكن تجاوبوني؟
sendrela
السلام عليك ورحمة الله وبركاته صديقة "بص وطل" العزيزة.. أما بعد، لا أدري هل يبحث زوجك عن زوجة ثانية عن طريقك؟ ولا بيحب واحدة ثانية وعاوز يتزوجها؟ ولا مقضيها كلام معك عن زوجة ثانية من باب أن تظلي على استعداد دائم لتلبية طلباته وتحت أمره وعينك ماتغفلش عن طلباته، من باب إنه حقك ومتفرّطيش فيه؟ يعني اللي عاوز يتجوز واحدة ثانية بيقول لك علشان يستأذنك؟ ولا علشان فعلا محتاج يتجوز واحدة ثانية تشبع رجولته بعد ما انشغلتِ أنتِ بالأولاد ونسيت جمالك ودلالك و.. و.. الحقيقة أنا متحيّرة زيك! ليه الرجل يتجوز على مراته؟ وعلى كل حال القانون والشرع أعطى للرجل حق التعدد في الزوجات على شروط، هي: أن لا يكون زواجه ضررا لبيته وأولاده وزوجته، علشان كده لازم تعرف الزوجة الأولى وتختار تبقى مع أولادها وزوجة ثانية، ولا فركش وأولادها يدفعوا الثمن علشان هي طبعا هتتجوز.. اشمعنى هو؟! وإن وافقت الأولى أن تعيش معه على ضرة أن يعدل بينهما في السكن والمصروف، وفي ليالي المبيت (العلاقة الحميمة يعني). قال تعالى: {فَإِنْ خِفْتُمْ أَلَّا تَعْدِلُواْ فَوَاحِدَةً} والعدل شرط، ومن لم يعدل فجزاؤه عند الله يبتليه بالحرمان، مما يمكّنه من ظلم الآخرين، مثل الصحة، والمال.. إلخ، مما يشجع الرجل على هدم بيته وحياته بظلم نفسه، ومراته وأولاده والزوجة الثانية كمان، لمجرد شهوة جسم أو شهوة امتلاك. الجئي إلى ربك يساعدك ويهديه، وفهميه أن شهوة ساعة ستخرب بيته وحياته لقيام الساعة، علشان كده يشغّل دماغه ويستخير ربه قبل ما يظلم نفسه بزرع الكُره في نفسك ونفس ولاده، من غير سبب قهري يقدر يعيش من غيره.