اديني رأيك: بحبه بس شخصيته ضعيفة

السلام عليكم.. أنا مخنوقة جدا وحاسة إني مش فاهمة نفسي ولا الناس، أنا كنت بحب ابن خالتي من وإحنا أطفال ولما وصلت للجامعة اتقدم لي ابن خالة تاني ورفضت، واللي بحبه ماتحركش ولا عمل أي حاجة.
حسيت إني لوحدي أوي حتى مافكرش يعبر ليّ عن مشاعره بس أنا حاسة إنه بيحبني، المهم في الوقت ده اتعرفت على شاب كان معايا في الكلية من خلال الفيسبوك، وبعدين شفته خلال عمل خيري وحسيت إني حبيته أوي لدرجة إني كنت بابكي لو حصل له حاجة..
بس هو ظروفه معقدة، هو في الجيش ولسه مالقاش شغل وحاجات كتير، أنا حاسة إنه طيب أوي في زمن كداب، وأنا كنت محتاجة أحس بالأمان، بس هو ماعندوش ثقة بنفسه ودايما بيحسسني إني أمه، وكل حاجة يعملها علشان خاطري، وجه قابل بابا في الشغل وقال له إنه عايز يرتبط بيّ..
أنا دلوقتي حيرانة وحاسة إني مش بحبه زي الأول وقلبي واجعني، مش عارفة ليه محتارة وحاسة إني من كتر ما فكرت بقلبي جه اليوم إني أفكر بعقلي بلا حب بلا كلام فاضي، خايفة أظلمه لأنه مايستحقش كده ومش عارفة أعمل إيه..
هو كان بيكلمني في الموبايل بس دلوقتي قطعنا كلامنا لأنه اتجاوز معايا في الكلام، يعني دلوقتي ممكن يتطمن بس لكن هو مابقاش يكلمني زي الأول، وأنا حاسة إنه ضعيف ومش طموحي، أنا عايزة حد يكون ناجح لأني فشلت كتير ومش حابة أكرر ده تاني أرجوكم أفيدوني.
أرجوك اديني رأيك..

Nahmh


لو عايز تفضفض لنا دوس هنا