باتكسف من خطيبي وعاوزة أفسخ الخطوبة

السلام عليكم.. شكرا لموقع "بص وطل" أنا باتابعه من زمان لكن دي أول مرة أبعت مشكلة فيه.. أنا عمري 25 سنة مخطوبة من سنتين لواحد من أصحاب أخويا عنده 28 سنة وخلاص بنجهز في الشقة.
أنا خطيبي بيحبني موت عمره ما زعّلني غير الزعل العادي اللي ممكن يحصل بين أي اتنين مخطوبين، مافيش غير مرة واحدة اللي حصلت مشكلة كبيرة قلت له نسيب بعض فيها وجرحته أوي رغم إني أنا اللي كنت غلطانة، بس هو فضل متمسك بيّ، وهو كمان اللي صالحني وهو الحمد لله متدين وملتزم وبيراعي ربنا فيّ حتى لما مثلا بيحاول يمسك إيدي وإحنا ماشيين وأقول له حرام يبطل ويبعد ودي أكتر حاجة حرام حصلت بينا.
هو رومانسي جدا ومش فيه مناسبة تعدي غير لما يجيب لي هدية وعمره ما نسي لا تاريخ ميلادي ولا عيد حب ولا حتى مولد النبي غير لما يجيلي ويتصل ويبعت رسائل على الموبايل رغم إني عارفة إنه بيجهز الشقة بس هو بيقول مهما كان لازم أعبر لك عن حبي ليكي.
وحكاية التعبير عن الحب دي بقى المشكلة اللي مش عارفة أعمل فيها إيه يعني هو على طول بيفضل يقول كلام حلو وكلام حب وكده وأنا ساكتة وباسمع في الأول قلت مش أقول له كلمة بحبك عشان لو سبته بس مع الوقت وحتى لما حبيته وعرفت إنه طيب وحنين وبيعمل المستحيل عشان يرضيني ويقرب مني برضه مش عرفت أقولها.
وهو كان خاطب قبل كده وفركش الخطوبة عشان مامتها كانت مستعجلة على الجواز وهو كان في بداية حياته وكانت بتقول له كلام حب.
وهو نفسه يسمع مني كلمة حب كان بيلمح كل 3-4 شهور كده إنه نفسه يسمعها مني بس أنا مش قدرت أقولها خالص رغم إن نفسي والله أقولها وأسعده وأبسطه كمان.
لما قال لي من غير تلميح إنه نفسه أقول له بحبك قلت له أنت مش تقارن بيني وبين البنت اللي تعرفها قبل كده عشان مش تظلمني ولا تظلمها قال لي إنه حبني أنا وإن نفسه مايحسش إن فيه واحدة تانية تقدر تقدم له حاجة مش أقدر أنا أقدمها له.
وبعدين قال لي لكل فعل رد فعل وإنه برضه نفسه يسمعها مني عشان هتفرق معاه وأنا مش عارفة أعمل إيه طيب، وأنا باتكسف ومش قدرت أقولها والله ونفسي أقولها وأعمل له كل حاجة بس مش عارفة إيه اللي مانعني وكل ماجي أقولها أسكت.
هو اتكلم بصراحة في الموضوع 4 أو 5 مرات وبعدين بطّل يطلبها مني، بس أنا حاسة بيه إنه نفسي يسمعها وأنا باحس بكده وبعدين بطل يقولها هو كمان، وبعدين رجع تاني زي الأول.
بس أنا مش مبسوطة قلت له لما نتجوز هتسمع كل الكلام اللي انت عاوزه، وأنا خايفة عشان باتكسف من خيالي وعارفة إني ممكن مش أقولها بعد الجواز.
دلوقتي بيتكلم وبيقول كلام حب زي الأول وأكتر كمان بيحاول يقرب مني بجد، وأنا مش عارفة أعمل إيه لدرجة إني كرهت كلمة بحبك عشان مش باعرف أرد عليها أقول إيه.
ونفسي أبسطه عشان هو بيشتغل شغلانتين عشان يقدر يكمل مصاريف الفرح، وبيعتبر إن أنا الحاجة الحلوة اللي في حياته كلها، ده غير إنه مهما كانت مشاغله دايما هو اللي بيتصل وهو اللي بيسأل وهو اللي بيجي لحد عندي إلا لو عنده شغل مش بيجي بس بيتصل بيّ كل يوم، وكل يوم كلام الحب، والغريبة بقى إن كل يوم بيخترع كلام جديد أحلى من اللي قبله.
دلوقتي هو إمبارح لمّح تاني إنه نفسه يسمع كلمة حب مني وأنا قفلت عليّ الأوضة وعيّطت، وبافكر أفسخ الخطوبة عشان مش قادرة أسعده، بس كده أبقى ظلمته وتبقى تاني مرة تتفركش له خطوبة، أنا منهارة.. ساعدوني.

س.م


الصديقة العزيزة في البداية شكرا لكِ على ثقتك في "بص وطل" ونتمنى من الله أن نكون على قدر هذه الثقة الغالية، ونرحب دوما بمشاركتك كل مشكلاتك ومحاولة الوصول إلى حلول فيها.
في البداية دعيني أخبرك بأنه لا توجد مشكلة ضخمة في الأمر تستدعي تفكيرك في فسخ خطبتك من هذا الشخص، الأمور كلها بسيطة ولكن ذلك الخوف الذي يسكننا مع اقتراب موعد الزواج يصور لنا مشكلات من فراغ ولكن مع ضبط النفس وحسن التصرف نجد أن هذه المشكلات أمور صغيرة في خضم مشكلات الحياة.
أنتِ تقولين إنك تحبين خطيبك لكنكِ غير قادرة على التعبير عن كلمة الحب له بالكلام، وهو أمر طبيعي ويختلف من فتاة لأخرى على حسب الخجل، والخجل أمر محمود جدا أن يكون من صفات أي شخص سواء كان ذكرا أم أنثى، إلا أنه يكون محبوبا أكثر في الأنثى.
إذن فلا مشكلة لديك من هذا الخجل ومن أن تعبري عن كلمة الحب بالكلمات، يمكنك التعبير عن الحب بأشياء كثيرة منها طريقة المعاملة الابتسامة... أمور عديدة يمكنك فعلها دون أن تتوتري أو أن تخجلي من التعبير عن الحب بالكلمات فقط.
اعلمي أيتها الصديقة أن التعبير عن الحب لا يكون بالكلمات فقط، أخبري خطيبك بهذا الأمر وأن هناك العديد من الأمور التي نفعلها في حياتنا للتعبير عن الحب، قد تكون مكالمة له بعد يوم شاق من التعب خيرا ألف مرة من قول كلمة أحبك، وأكثر صدقا في إيصال الرسالة.
لا تحزني أيتها الصديقة من خجلك، ولا تدعي الشيطان يجد منفذا يدخل به فيعكر صفو خطوبتك بأفكار غير صحيحة بالمرة، إن كنتِ تخجلين الآن من قول كلمة الحب فاعلمي أنك ستقولينها فيما بعد؛ لأن الحياء والخجل الموجود الآن سيخف تدريجيا مع طول العشرة بينكما بعد أن يجمع الله بينكما على خير.
الصديقة العزيزة.. لا تسمحي للشيطان بأن يفسد عليكِ فرحة الحياة وفرحة خطوبتك من شخص يحبك كما تقولين ويراعي الله فيكِ، فلا تسمحي للشيطان بأن يفسد هذا الأمر، وفكري جيدا واعلمي أن ما بكِ أمر طبيعي لا عيب فيه وأن التعبير عن الحب له طرق متعددة ليس بالكلمات فقط فالكلمات أسهل ما في الأمر لكن الأفعال دوما هي ما لها عظيم الأثر في النفس وتعيش مدة أطول بكثير..
جمع الله بينكما على خير ووفقكما في حياتكما ومستقبلكما..

لو عايز تفضفض لنا دوس هنا