طريقة جديدة لتخليل الخيار والفلفل

النهارده هنعمل مع بعض طريقة جديدة وبسيطة لتخليل الخيار والفلفل ومش هتاخد منك وقت كتير، جربيها وقولي لنا على النتيجة..
خيار مخلل
المقادير:
6 ثمرة خيار
ثمرة فلفل أحمر
كوب سكر
كوب مية
2 فص ثوم
1⁄4 كوب ملح
كوب خل أبيض
12 حبة فلفل أسود
1⁄4 ملعقة صغيرة شبت مقطّع
الطريقة:
1- قطّعي الخيار لنصفين والفلفل لقطع صغيرة، بعد كده حطّيهم على الشواية لمدة دقيقتين واقلبيهم على الناحية التانية، بعد كده حطي الخيار والفلفل في برطمان زجاجي وسيبيهم على جنب.
2- سخّني المية على النار وضيفي عليها الخل والسكر وحبوب الفلفل والشبت والملح والثوم، وقلّبيهم على نار هادية لحد ما السكر والملح يدوبوا تماما في المية، وبعدين ارفعي الخليط من على النار، وضيفيه على برطمان الخيار.

3- سيبي البرطمان لمدة ساعة علشان يبرد، وبعد كده حطّيه في التلاجة لمدة يوم كامل وبعدين طلّعيه.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،