لم تحبيه واتخذتي أسلوبه حجة

أنا هاحكي قصتي، وأتمنى أن يتسع قلبكم للاستماع إلى مشكلتي. أنا طالبة في إحدى الجامعات، عندي 20 سنة كنت مخطوبة لقريبنا ووافقت عليه بسبب والدي لأن والدتي في الفترة دي كانت مريضة وكنت في فترة امتحانات ما عرفتش أرفض الإنسان ده، هو بيحبني جدا؛ ولكن هو مش زيي خالص، هو تعليم عالي وكل حاجة؛ ولكن أسلوبه فلاحي أوي، ومش بيعرف لغة؛ بالرغم إن مستواهم الاجتماعي كويس.
المهم هو سافر وكده وفضلنا نتكلم نت؛ ولكن أنا ما ارتحتش، باحس إنه صعب لأن كمان عيلتنا الولاد والرجال بتوعها عصبيّين وهو قريبنا وكده، وأكيد زيهم، وأنا مش باعرف أتعامل مع حد كده.
في فترة السفر قلت له إن مش هينفع نكمل والموضوع اتقفل وفركشت الخطوبة، هو دلوقتي رجع بعد سنة وعاوز إنه يرجع تاني وأنا مش عارفة أعمل إيه؟
أنا شخصيتي غيره، مش بحب العصبية وبحب المرح والضحك وأحب يكون الإنسان اللي هارتبط بيه ستايل زيي علشان أولادي والمستقبل؛ بس مشكلتي الأكبر إني أنا كل لما أشوف شاب ستايل وكده بيعجبني يعني أنا ليّ صحابي على الميل بتاعي كلهم ستايل، لما باكلم واحد أحس إني بحبه واقفل معاه واكلم التاني ييجي لي إحساس إني بحبه وهكذا.
أنا حاسة إني مراهقة وساعات بانساهم كلهم لما مش بكلمهم فترة من الوقت وأعيش عادي. أتمنى إنكم تردوا عليّ لأني متلخبطة ومش فاهمة شخصيتي إطلاقا بجد.
س. ع


لو عايز تفضفض لنا دووووس هنا