كرات البطاطس بالجبنة على "سفرة دايمة"

أعدّتها لكم: آية خالد
النهارده هنقدّم لك وصفة جديدة للبطاطس، أكيد هيحبّها كل الأطفال، وهتبقى طريقة مميّزة للتغيير من صنع إيديكي وبخطوات بسيطة..
كرات البطاطس بالجبنة
المقادير:
3 ثمرة بطاطس متوسّطة مسلوقة
2 ملعقة كبيرة بقدونس مفروم
1⁄4 كوب جبن رومي مبشورة
1⁄4 كوب جبن موتزاريلا
4 مكعبات جبن كيري
ملعقة كبيرة زعتر
1⁄2 كوب بقسماط
1⁄4 كوب دقيق
زيت للقلي
بيضة
ملح وفلفل
الطريقة:
1- بعد ما تسلقي البطاطس على طول برّديها بالمية، وبعدها ابشري واحدة منهم، واهرسي الاتنين التانيين لحد ما يبقوا ناعمين جدا من غير أي كتل، وضيفي البطاطس المبشورة على اللي هرستيها، وضيفي عليهم البقدونس والزعتر والملح والفلفل، وإذا حسيتي إن العجينة طريّة زيادة عن اللزوم ومش متماسكة ممكن تزوّدي عليها ملعقة بقسماط كبيرة.
2- في طبق متوسّط اخلطي الجبن الرومي المبشورة مع الموتزاريلا والكيري، لحد ما يبقى مزيج ناعم ومتجانس.
3- خدي من عجينة البطاطس شوية في إيدك واحشيهم بالجبنة، وغلّفيهم بعجينة البطاطس كويس، لحد ما تبقى كورة محكمة ومقفولة ومغطية كل الجبنة.
4- حطّي الكور في الدقيق الأول وبعدها في البيض، وبعد كده في البقسماط، وحطّيها في طبق وغطّيها كويس، وحطّيها في الفريزر لمدة ساعتين لحد ما تتجمّد، وبعدها طلّعيها واقليها في زيت غزير وسخن لحد ما لونها يبقى دهبي، وقدّميها.. وبالهنا والشفا.
وبكده تكون خلصت وصفتنا النهارده..
استنونا بكره مع وصفة جديدة..
سلام،،،