كبد وقوانص الدجاج بالبطاطس على "سفرة دايمة"

أعدّتها لكم: آية خالد
النهارده بنقدم لك طريقة عمل طبق خفيف وسريع، وهو كبد وقوانص الدجاج بالبطاطس، والطبق ده ممكن تعمليه لأسرتك على العشا ومش هياخد منك أي وقت أو مجهود..
كبد وقوانص الدجاج بالبطاطس
المقادير:
2 ثمرة بطاطس مقطّعة مكعبات
1⁄2 كيلو كبد وقوانص دجاج
1 ملعقة كبيرة زيت نباتي
1 ثمرة بصل مفرومة
ملعقة صغيرة بهارات
2 ملعقة صغيرة زبدة
4 فص ثوم مفروم
ملعقة كبيرة خل
1 ثمرة طماطم
2 ليمونة
ملح وفلفل
الطريقة:
1- اغسلي الكبد والقوانص كويس جدا وقطّعيها مكعبات، وحطي الزبدة في طاسة كبيرة وشوّحي فيها البصل والثوم، لحد ما لونهم يبقى دهبي.
2- ضيفي الكبد والقوانص وقلبيها مع البصل والتوم لمدة دقيقتين أو تلاتة، وبعدها ضيفي الخل والليمون، وقطعي معاهم الطماطم مكعبات صغيرة وقلبيهم.
3- حطي الزيت في طاسة تانية، وشوّحي فيه البطاطس لمدة 5 دقايق، لحد ما لونها يبقى دهبي، وبعد كده ضيفيها على الكبد، وحطي البهارات والملح والفلفل وقلبيهم مع بعض، وغطيهم لمدة 5 دقايق علشان البطاطس تتشرب طعم التتبيلة، وضيفي عليها مياه إذا احتاجت، وقدميها مع عيش طازة.. وبالهنا والشفا.