مش عيب لما تطلبي إن علاقتكم تكون في النور

بصراحة كل مرة بابعت لكم فيها وتجاوبوني ماتتصوروش قد إيه بابقى فرحانة، وثقتي بتزيد كل مرة عن اللي قبلها.
أنا مرتبطة عاطفيا بإنسان لسه بادئ يشتغل من شهرين وهيتعين قريب إن شاء الله.. المشكلة إني وهو نفسنا نخلي الموضوع ده رسمي في أقرب فرصة، بس الظروف المادية لا تسمح.
أنا من فترة للتانية باحاول أعرف طلبات أهلي من العريس اللي ممكن يتقدم لي، وعرفت إنهم مش طالبين كثير أهم حاجة إنه يكون إنسان بيحبني وشاريني.
ومن يومين كنا بنتكلم وقلت له على الطلبات اللي أهلي ممكن يطلبوها، وقال لي كده طمنتيني شوية، وقلت له إنهم حتى مش عايزين من الأول شقة تمليك، ممكن إيجار في البداية لغاية ما ربنا يكرمنا.
وعرفت من أمي إن فيه أهالي بياخدوا المهر بعد كتب الكتاب، والشبكة بتبقى بعد الخطوبة؛ يعني بتبقى قراية فاتحة سنة، وبعدها الخطوبة، وكتب الكتاب لما تخلص الشقة، ودة مخليني متحمسة إنه يجي يتقدم لي.
بس أنا مش عارفة هل ده ممكن ينفع؟؟ هو بصراحة أول مرتب ليه 750 جنيه غير العمولات، هل ممكن أهلي يوافقوا على إنه يقرأ الفاتحة بس بدبل، وبعدها بسنة يقدم الشبكة؟؟
هو بيقول لي إن قدامه مش أقل من سنتين علشان يقدر يكوّن نفسه ويجي يتقدم؛ علشان مايصغرش نفسه قدام أهلي أو يقولوا إنه مش قد الكلام، أنا مش عارفة أقول له إزاي كلام أمي؟؟ أنا مش عايزاه يحس إني باضغط عليه أو إني مستعجلة على الخطوبة.. مش عارفة أعمل إيه؟ شكرا على اهتمامكم بينا.

lolla19


صديقتنا العزيزة.. مما يُثِير في قصتك هو خوفك من أن يظن حبيبك إنك مستعجلة على الخطوبة -مجرد خطوبة- وإعلان اللي بينكم بشكل يحفظ كرامتك وسمعتك، ويؤكّد لك خوفه عليكِ وحرصه علشان ماتضيعيش منه.
صديقتنا العزيزة.. بوضعك ده إنتي معرضة لأن أي حد يعجب بيكِ ويجي يتقدم لك، وأكيد هو عارف ده كويس ما دام إنك مش مخطوبة رسمي، وأكيد أسرتك لو جه لك حد مناسب هتحاول تضغط عليكي علشان توافقي سواء بالإجبار أو بالإقناع، ومحاولة تشكيك في حبه له ورغبته الحقيقية فيكي كشريكة للحياة.. فماذا سيكون موقفه؟ وهل ساعتها سيقول لك وافقي وهو بيمثل إنه شهيد الظروف، وإنك ماصبرتيش وخنتي حبكم؟ أم سيقلل مدة السنتين؟
من حقك إن يكون فيه بينكم حاجة تحفظي بيها كرامتك، وهو لو بيحبك فعلا المفروض يبذل أقصى ما في وسعه لتنفيذ ده؛ لأن المفروض إن هو كمان عايز كده، وبالنسبة لظروفه اللي قلتيها دي فهي مش بطالة، وأحسن من ناس كتير جدا، وتساعده أوي إنه يجيب دبلتين وفي حفل عائلي بسيط زي آلاف الشباب، وتعلنوا اللي بينكم علشان سمعتك إنتي وكرامتك إنتي قدامه وقدام أسرته قبل أي حد تاني.
فهميه إنه يجي يتقدم رسمي وخاصة زي ما قلتي إن أهلك مش طالبين كتير، وحتى لو كان كتير يتقدم؛ علشان بس يثبت حسن نيته، ويعمل اللي عليه ويسيب الباقي على ربنا.. لكن مقابلات وخروج وكلام في التليفونات من غير رابط شرعي بينكم ده شيء المفروض هو نفسه مايرضهوش ليكي.

لو عايز تفضفض لنا دوس هنا