شالوا عبده حطوا شاهين.. الزند قال ماحناش لاعبين؟

صُباعه كفيل بخروجك عن شعورك بل وصيامك.. وتناكته في الكلام تذكّرك بصفوت الشريف وزمن الزنّ الجميل.. وشجاعته تحسسك بأسامة بن لادن وهو بيهدد أمريكا ومن يعيش في أمريكا!!؟

إنه المستشار أحمد الزند -رئيس نادي القضاة- الذي يصرّ على أن يفقدك جزءا من صيامك بتصريحاته الهادئة المتزنة الرزينة.. وفي آخر مفاجآته دعا الزند إلى جمعية عمومية طارئة لنادي القضاة.. لييييه..؟

مش للإصرار على استقلال السلطة القضائية.. لأ لأ لأ.؟

ولا للمطالبة باحترام القانون وعدم تلويثه بالخوض في السياسة وخروجه عن روح الحكم.. لأ لأ لأ.؟

المستشار الزند زعلان من اختيار المستشار أحمد مكي وزيرا للعدل..؟

يعني مش عاجبه إن رئيس الوزراء المكلف من رئيس الجمهورية اختار مستشار وزيرا للعدل.. المفروض كان اختار بتاع جرجير مثلا؟! ولا كان لازم يشاور الزند قبل ما يختار؟! ولا المفروض إن المستشار الزند يبعت اسم الوزير اللي هو عايزه؟؟

وهل ده مش تدخّل من السلطة القضائية -اللي هو مابيمثلهاش على فكرة- في أعمال السلطة التنفيذية؟ ولا إحنا بس اللي المفروض ما نتدخلش في أحكام القضاء واستقلاليته المزعومة، ونادي القضاة هو اللي من حقه يتدخل في تشكيل الحكومة؟؟

وأنا من هذا المزنق وأنا صايم بادعو مرسي وقنديل إنهم يغيروا المستشار أحمد مكي علشان المستشار الزند مايزعلش، وهاتوا له وزير يخليه مبسوط..؟

لو ما ينفعش نغيّر اسم الوزير يبقى بدل المستشار أحمد مكي هاتوا الممثل أحمد مكي، وآهو فانكي وكووول آخر حاجة ممكن يعجب المستشار الزند..؟

عزيزي المستشار أحمد الزند.. أبوس زندك اسكت.. في رمضان بس على الأقل..؟

أقول لك اقطع شوية زي الكهربا والميه، حرام إحنا في الصيام والحر ومش ناقصة تصريحات تفطّر..؟

اللهم إني صائم..

اللهم إني صائم..