السلام عليكم ورحمة الله وبركاته.. أنا مخطوبة بقالي سنة و6 شهور عن حب الحمد لله، وخطيبي بيسافر الكويت بيشتغل علشان يجيب الشقة بس بنتواصل على النت. المشكلة اللي عندي أنه في أول الخطوبة حصلت مشاكل بينا كتير، ودي حاجة طبيعية في الأول لأنه عصبي جدا، بس أنا الحمد لله هادية فبامتص عصبيته دي، ومابردش لحد ما يهدى لأني بحبه.
بس بعد ما اتعرفنا على بعض أكتر بقينا متفاهمين، وزاد حبنا أكتر من الأول وهو كان بيثق فيّ جدا، ماكنش بيعارضني أما كنت بانزل في أي مكان، وأختي الكبيرة كمان اتخطبت بردو في نفس وقت خطوبتي تقريبا..
وهو بعد ما اتعرف علينا أكتر وعلى مشاكلنا، عرف إن خطيبها مابينزلهاش في أي مكان خالص ولا حتى تروح لقرايبنا، وهي بتستحمل وبتسمع الكلام علشان بتحبه فأما خطيبي شاف كده، بدأ يعمل زيه علشان يعرف إذا كنت هاسمع كلامه ولا لأ.
وبقت بتحصل ما بينا مشاكل علشان أنا ساعات باعارضه أما يطلب مني أعمل حاجة وأنا شايفة إنها غلط، أو ماكنش بيعارض فيها الأول وأنا حاسة أنه بقى بيتحكم فيّ زيادة، مش عشان هو كده علشان يبقى زيه ويعرف إذا كنت هاسمع كلامه في كل حاجة زي أختي ولا لأ، وأنا والله مش قصدي ماسمعش كلامه أو أعند معاه، أنا بس ماكنتش متعودة منه في الأول على الطريقة دي وكمان مابحبهاش..
وأنا دلوقتي بحبه وعارفة أنه بيحبني بس خايفة لا المشاكل دي تنهي علاقتنا لأنه عنيد جدا، وأنا ساعات باعند أما بلاقيه كده، وعايزة حل يحافظ على حبنا وعلى علاقتنا. أرجوك اديني رأيك..