السلام عليكم ورحمة الله وبركاته.. أنا بنت في سن الجامعة ووالدتي متوفاة.. فطبعا ليّ احتياجات خاصة كبنت ومش باعرف أقولها لبابا. كذا مرة أقول له يديني فلوس كده ليّ، بس هو مش بيديني فلوس إلا لو كان عارف الفلوس دي هاجيب بيها إيه بالضبط.. وبعد ما أجيب يسألني جبت إيه، وبكام، وبقي كام... وكده، ومش قادر يفهم إني بنت وعايزة حاجات ماينفعش أقول له عليها.
قلت لعمتي قبل كده علشان تفهمه بينه وبينها، راحت قالت له على طلبات البيت بصفة عامة، فطبعا قال لها: "لا.. أنا اللي باجيب كل حاجة وباريحها"، وماعرفتش تفهمه برضه اللي أنا عايزاه بالضبط.
ماليش جدة مثلا تقول له أو حاجة، وأنا أتكسف أوي لو قلت له حاجة زي دي، مرة واحدة قالت لي اكتب الحاجات اللي أنا عايزاها في ورقة وأديها له، وهتكون مرة واحدة وخلاص هيفهم بعد كده، بس طبعا مستحيل أكتب له حاجات زي دي ما أقدرش خالص.
يا ريت حد يقول لي أعمل إيه؟؟ بس قدروا إني باتكسف أوي، ومش عارفة أعمل زي ما البنت دي قالت لي أرجو الرد.. وجزاكم الله خيرا.
angle92
صديقتنا الجميلة.. مشكلتك بسيطة أوي ولها مجموعة حلول؛ منها إنك تتغلبي على خجلك وتطلبي من باباكي مبلغ، ولما يقول لك: "ليه؟"، قولي له: "هاجيب حاجات خاصة بيّ أو هاجيب حاجات بناتي"، وقولي له: "هابقى أوريها لك بعدين"، وممكن لما تشتريهم وأنت داخلة تحطيها في مكان ظاهر له لدقايق؛ علشان تعرفيه أنك فعلا اشتريتي حاجات.
أو الحل الثاني أنك تطلبي من عمتك إنها تقول له إنك عايزة فلوس تعملي بيها كذا وكذا، وهي هتعرف تقول له عنك وبعدين خلاص مش هتحتاجي توضحي في كل مرة.
أو ممكن تستخدمي كلمات مؤدبة في التعبير عن احتياجاتك، وتكتبي ورقة زي ما صحبتك قالت، يعني تكتبي "أنا عايزة مبلغ كذا علشان اشتري ملابس داخلية" مثلا.. ومش لازم تكتبي تفسير كل حاجة هتشتريها، وسيبيها في مكان يشوفوا الصبح، وأنت ما تكونيش موجودة علشان ماتتعرضيش للإحراج.
عايزاكي تفهمي أن ده باباكي والحياء حلو طبعا، بس لو هيكون عقبة في حياتنا يبقى لازم نخف منه شوية مع بعض الناس، وماتفتكريش أن باباكي كائن مختلف عنك تماما ومش هيفهم احتياجاتك دي، أو هيعتبر طلباتك جرأة وقلة أدب؛ بخاصة لو طلبتيها بأدب وذوق.
أنت ممكن تلمحي للموضوع لو جه إعلان في التليفزيون، أو حتى تاخدي فلوس من عمتك وتشتري اللي محتاجاه، وهي تبقى تستردهم من باباكي، وتقول له إنك إنتي احتاجتيهم ليه، ولو سألك قولي له: "اشتريت حاجات خاصة كنت محتاجاها"، وأكيد هو هيستوعب.
