ادينا رأيك: اتحرشوا بيّ وخطيبي ماخافش عليّ

السلام عليكم.. أنا مخطوبة بقالي 6 شهور، وكانت خطوبتنا عن طريق جواز الصالونات؛ لكن إحنا قربنا من بعض أوي في وقت صغير، لدرجة إننا حسينا إن جوازنا مش جواز صالونات ولا حاجة، ومن فترة وأنا راجعة من الشغل حصل ليّ تحرش جنسي، وواحد اتهجم عليّ، وكنت تقريبا تحت البيت، وخطيبي معايا على التليفون وسمع صوت صويتي طبعا.. هو خاف عليّ جدا؛ خاصة إن شغله في محافظة تانية غير محافظتنا، وماكانش فاهم أنا باصوت ليه.

ولما روحت طبعا كنت منهارة، وقلت له بعد كده أنا مش عارفة أعمل إيه تاني وأنا رايحة الشغل؛ لإن شارعنا هادي جدا، مع إن الوقت ماكانش متأخر خالص، كنت مستنية منه خوف عليّ أكتر من كده، كان يقول لي سيبي الشغل ده أو حاجة كده يعني؛ فلقيته استقبل الموضوع عادي، وقال لي: "خلاص لازم باباكي يوديكي وترجعي في تاكسي"، وكأن التاكسي ده حاجة أمان.

أنا من وقت الموضوع ده وأنا مش قادرة أتكلم معاه بطبيعتي، كنت مستنية منه خوف أكتر من كده.. أنا خفت أقول لأهلي؛ لأني متأكدة إنهم هيخلوني ماروحش الشغل تاني؛ لأنهم بيخافوا عليّ قوي، وخايفة أصارحه بالكلام اللي جوايا ده علشان مانزعلش مع بعض؛ خاصة إن موضوع إنه مابيخافش عليّ ده حصل بينا كذا مرة، وكان بيحلف لي إنه بيخاف عليّ جدا؛ بس خوفه عليّ ده مش حاساه أو مش بالطريقة اللي أنا عايزاها.

أنا مش عارفة أعمل إيه؟؟! أصارحه تاني بالموضوع ده؛ خاصة إن الموضوع المرة دي أقوى من أي مرة؛ لأنه سايب أثر نفسي وحش جدا فيّ.. أرجو الرد في أسرع وقت.

r.
لو عايز تفضفض لنا دوس هنا