أهله بيحبوني بس هو بيحب حبيبته

السلام عليكم.. عندي مشكلة ويا ريت لو حد يديني رأيه فيها.. أنا بحب شخص وهو إنسان محترم جدا جدا؛ بس هو كان مصدوم نتيجة تجربة حب سابقة، ففيه واحدة كان مرتبط بيها كانت حطاه كبديل لشخص تاني بتحبه؛ يعني بالبلدي "ركناه على الرف" لحد ما تحسم أمرها مع حبيبها.

المهم العلاقة بينهم انتهت، واتفقوا على إنهم يبقوا إخوات؛ المشكلة إنه مجروح، وأنا مش عارفة إزاي أقدر أنسيه؟ وهل هاعرف أخليه ينساها؟

مش عارفة بصراحة؛ خاصة إن أخته كلمتني وقالت لي إنه هينساها بمرور الوقت، وإن هي نفسها إن أنا وهو نرتبط؛ علشان هي بتحبني جدا ووالدته كمان زيها، أو بيتمنوا إني أكون زوجة له، وأنا كمان بصراحة بحبه؛ لأنه شخص يستاهل إنه يتحب.

فمش عارفة أعمل إيه في الموضوع ده؟ أحاول أنسيه حبه الأول ولا أبعد عنه خالص؟ بجد خلاص مابقيتش عارفة.. أرجو الإفادة وشكرا.

queen

عزيزتي.. ليه عايزة تجرحي نفسك من البداية، الحب هو إحساس متبادل بين الطرفين مش طرف واحد، وإن الطرفين لازم يكون الحب بينهم متبادل؛ ولكن المشكلة والشعور اللي بيحس بيه حبيبك ده إنتي مالكيش علاقة بيه، ومش إنتي السبب فيه علشان تعالجيه.

إنتي مش علاج للناس ومش مطلوب منك تجازفي بمشاعرك علشان تنسيه حبيبته علشان يحبك.. إنتي كمان من حقك إنك تتحبي زي ما تحبي مش تبدأي حياتك بعلاج مشكلات الناس.

عزيزتي.. هذا الفتى ماصارحكيش بالحب، ولا وضح لك حتى إنه معجب بيكي ليه عايزة تقربي منه وتجرحي نفسك في النهاية؛ لمجرد إن أخته ومامته عايزينك تتجوزيه؟!!

فكري كويس إنتي هتتجوزيه هو مش أهله؛ علشان كده لازم هو اللي يختارك وبنفسه، ومش علشان تكوني بديل لحد أو تعالجي مشكلة إنتي مالكيش دخل فيها وفي الآخر تجرحي نفسك.

وبالنسبة لمشكلته اللي كانت السبب فيها واحدة تانية فممكن تكون محتاجة وقت وممكن لأ؛ بمعنى تاني إن البنت دي ممكن ترجع حياته تاني وتحاول تقرب منه، وفي الحالة دي هتكوني إنتي الخسرانة ودورك انتهى معاه بمجرد رجوع حبيبته ليه أو حتى عدم رجوعها ليه.

عزيزتي.. شيلي الشخص ده من تفكيرك واعرفي إنك لسه ماحبتيهوش؛ لكن مشاعرك مجرد إعجاب، فكري في مستقبلك وحياتك أكتر وابعدي عنه تماما.

وماتسمعيش كلام من أهله لأنه في الأول والآخر هو أهم عندهم منك وعايزينه يخرج من الأزمة اللي هو فيها بيكي إنتي، وفهميهم إنك مش هتقربي من حد لسه بيفكر في حبيبته، وممكن يفكر يرجع لها تاني، ماتجرحيش نفسك بأيدك.

فكري في مستقبلك وحياتك أكتر، ولو هو اللي جالك بعد فترة وطلب منك الارتباط الرسمي ممكن تفكري بعد لما تتأكدي تماما إنه مش بيفكر في حبيبته، وإنه مختارك إنتي علشان حبك مش علشان ينسى واحدة تانية بيكي.

هو ده الحب يا عزيزتي مشاعر متبادلة بين الطرفين.. فكري كويس في حياتك، وفكري في نفسك أكتر من كده.. إنتي مش أقل منها علشان تدخلي حياته بس علشان تخليه ينساها، وبعد كده يا يحبك يا لأ.. ابتعدي عنه تماما وماتسمعيش أي كلام من أهله، فكري وخدي قرارك السليم قبل فوات الأوان.. وأتمنى لكي السعادة في حياتك إن شاء الله.

لو عايز تفضفض لنا دوس هنا