السلام عليكم ورحمة الله وبركاته... أنا عايزة حل حاسة إني تايهة في الدنيا وما ليش هدف؛ أنا عندي 26 سنة مطلّقة من 3 سنوات جواز سريع انتهى بطلاق سريع جواز تقليدي بس مش دي المشكلة؛ المشكلة إني مش باثق في حد وباحس إن كله طمعان في جسدي، وما كنتش مقتنعة إن في حب أو إني ممكن في يوم أحب بس حصل وحبيت، وللأسف واحد مش من نفس الديانة علاقتنا بدأت سريعا كأصدقاء وفجأة تحوّلت لحب جارف، وللأسف كل ما أبعد ألاقيه يدخل المستشفى أو يعمل حادث. بس أنا عارفة إنه مش هيغيّر دينه، وأوقات باقول إني مش بحبه أنا متلغبطة ومش عارفة أعمل إيه، هو ملأ حياتي ودنيتي وما كنتش باحس بفرق في الدين، بس لما بافكر بالعقل بارفض العلاقة بس باحس إنه الوحيد اللي فاهمني وحاسس بيّ أوقات باقول إنه مش فارق معايا؛ لأنه مش من ديني وأوقات بتصعب عليّ نفسي وأوقات باحن له، أنا متلخبطة ومش عارفة أعمل إيه أنا بابعد بس خايفة أرجع بجد تعبت ومحتاجة لحل ويكون سريع للنسيان، أرجو الرد لأني تعبانة جدا جدا ولو هتسألوا على دور الأسرة، هاقول إن الأسرة ما حدش حاسس بحد كله في وادي وما حدش بيسمع لحد!! آسفة إني طوّلت عليكم بس مستنية الرد لأني بتعذّب وبتألم من البُعد ومن القرب. التائهة في الحياة